തിരുവനന്തപുരം നഗരസഭാ പരിധിയിലെ അപകടകരമായ ഓവർഹെഡ് കേബിളുകൾ നീക്കം ചെയ്യാൻ പദ്ധതി തയ്യാറാക്കി. ടാഗ് ചെയ്യാത്ത കേബിളുകൾ മുറിച്ചു മാറ്റുകയും ബാക്കിയുള്ളവ ക്ലിപ്പ് ചെയ്യുകയും ചെയ്യുന്ന പദ്ധതി ആദ്യഘട്ടത്തിൽ അഞ്ച് വാർഡുകളിൽ നടപ്പിലാക്കും. ഒക്ടോബർ 12ന് പാളയത്ത് മേയർ വി. വി. രാജേഷ് ഇതിന്റെ ഉദ്ഘാടനം നിർവഹിക്കും.
തിരുവനന്തപുരം: നഗരസഭാ പരിധിയില്‍ അനാവശ്യമായി സ്ഥാപിച്ചിട്ടുള്ളതും അശാസ്ത്രീയമായി പൊട്ടിപ്പൊളിഞ്ഞ് കിടക്കുന്നതുമായ ഓവർഹെഡ് കേബിളുകളും ടെലിഫോൺ/ഇന്റർനെറ്റ് വയറുകളും നീക്കം ചെയ്യാൻ നഗരസഭ പദ്ധതി തയ്യാറാക്കി. ഇന്ത്യയിൽ വാരണാസി, മുംബൈ നഗരങ്ങളിൽ മാത്രമാണ് വിജയകരമായി ഇത് നടപ്പിലാക്കിയതെന്ന് നഗരസഭ വ്യക്തമാക്കി. ഇത്തരത്തിലുള്ള കേബിളുകള്‍ നീക്കം ചെയ്യുന്നതിന് നഗരസഭാ കൗണ്‍സില്‍ അംഗീകരിച്ച പ്രമേയത്തിലൂടെ നേരത്തെ ആവശ്യപ്പെട്ടിരുന്നു. നിരവധി അപകടങ്ങള്‍ക്കും ജീവഹാനിക്കു പോലും കാരണമായിട്ടുള്ള കേബിളുകള്‍ നീക്കം ചെയ്യാത്ത പക്ഷം നഗരസഭ നേരിട്ട് നീക്കം ചെയ്യാനും ബന്ധപ്പെട്ട സേവന ദാതാക്കളില്‍ നിന്നും നഷ്ടപരിഹാരം ഈടാക്കാനും തീരുമാനിച്ചിരുന്നു.
ടൗൺ പ്ലാനിംഗ് കമ്മിറ്റി ചെയർമാൻ പാറ്റൂർ രാധാകൃഷ്ണന്റെ അദ്ധ്യക്ഷതയിൽ ചേർന്ന കൗൺസിലർമാരുടെയും വിവിധ വകുപ്പ് ഉദ്യോഗസ്ഥരുടെയും സര്‍വ്വീസ് പ്രൊവൈഡര്‍മാരുടെയും ഫ്രാഞ്ചൈസികളുടെയും യോഗമാണ് രൂപരേഖ തയ്യാറാക്കിയത്. ഡിവൈൻ നെറ്റ് വർക്കാണ് കരാറുകാർ. ടാഗ് ചെയ്യാത്ത കേബിളുകൾ മുഴുവനും മുറിച്ചു മാറ്റിയ ശേഷം ബാക്കിയുള്ളവ ഒരുമിച്ച് മെഷീൻ ഉപയോഗിച്ച് ക്ലിപ്പ് ചെയ്യും. 101 വാർഡുകളിലും പദ്ധതി നടപ്പിലാക്കും. ആദ്യ ഘട്ടത്തിൽ 5 വാർഡുകളെ തീരുമാനിച്ചു.നഗരസഭാ മെയിൻ ഓഫീസ് സ്ഥിതി ചെയ്യുന്ന പാളയം , ഫോർട്ട്, കണ്ണമ്മൂല , തൈക്കാട്, പെരുന്താന്നി എന്നീ വാർഡുകളാണ് ആദ്യഘട്ടത്തിലുള്ളത്.
ഒക്ടോബർ 12 തിങ്കളാഴ്ച വൈകിട്ട് 5 ന് പാളയം രക്തസാക്ഷിമണ്ഡപത്തിനു മുന്നിൽ മേയർ വി. വി. രാജേഷ് ഉദ്ഘാടനം നിർവഹിക്കും. ഡെപ്യൂട്ടി മേയർ ജി എസ്. ആശാനാഥ് അദ്ധ്യക്ഷത വഹിക്കുന്ന ചടങ്ങിൽ ടൗൺ പ്ലാനിംഗ് കമ്മിറ്റി ചെയർമാൻ പാറ്റൂർ രാധാകൃഷ്ണൻ സ്വാഗതം ആശംസിക്കും. സ്റ്റാൻഡിംഗ് കമ്മിറ്റി ചെയർമാൻമാരായ കരമന അജിത്, വി. സത്യവതി, എം. ആർ. ഗോപൻ , മഞ്ജു ജി എസ് , ചെമ്പഴന്തി ഉദയൻ, സിന്ധു ശശി, നഗരസഭയിലെ ബി ജെ പി ലീഡർ പാപ്പനംകോട് സജി, എൽ ഡി എഫ് ലീഡർ എസ്.പി. ദീപക്, യു ഡി എഫ് ലീഡർ കെ. എസ് .ശബരിനാഥൻ, പാളയം കൗൺസിലർ ഷേർളി , കോർപറേഷൻ സെക്രട്ടറി ജെ. മുഹമ്മദ് ഷാഫി, സൂപ്രണ്ടിംഗ് എൻജിനിയർ സജീഷ്, എ എക്സ് ഇ സുമ എന്നിവർ സംസാരിക്കും.
