'അസഭ്യം പറഞ്ഞു, ഭീഷണിപ്പെടുത്തി'; വെള്ളനാട് ശശിക്കെതിരെ കെപിസിസിയിൽ പരാതിയുമായി പഞ്ചായത്ത് പ്രസിഡന്റ്
പഞ്ചായത്ത് പ്രസിഡൻറിന്റെ മുറിയിൽ വച്ച് തന്നെ കൈയേറ്റം ചെയ്യുകയും അസഭ്യം പറയുകയും കൊല്ലുമെന്ന് ഭീഷണിപ്പെടുത്തുകയും ചെയ്തുവെന്നാണ് പരാതി
തിരുവനന്തപുരം: തിരുവനന്തപുരം ജില്ലാ പഞ്ചായത്ത് അംഗവും കോണ്ഗ്രസ് നേതാവുമായി വെള്ളനാട് ശശിക്കെതിരെ കെപിസിസി പ്രസിഡൻറിന് മുന്നിൽ പരാതി. കോണ്ഗ്രസ് ഭരിക്കുന്ന വെള്ളനാട് പഞ്ചായത്ത് പ്രസിഡൻാണ് കെ.സുധാകരന് പരാതി നൽകിയത്. പഞ്ചായത്ത് പ്രസിഡൻറിന്റെ മുറിയിൽ വച്ച് തന്നെ കൈയേറ്റം ചെയ്യുകയും അസഭ്യം പറയുകയും കൊല്ലുമെന്ന് ഭീഷണിപ്പെടുത്തുകയും ചെയ്തുവെന്നാണ് പഞ്ചായത്ത് പ്രസിഡൻറ് കെ.എസ്.രാജലക്ഷമിയുടെ പരാതി.
വെളളനാട് ശശിയുടെ സഹോദരൻ ശ്രീകണ്ഠൻ പഞ്ചായത്തംഗമാണ്. ശ്രീകണ്ഠനെ കൈയേറ്റം ചെയ്ത താൽക്കാലിക ജീവനക്കാരനെ പുറത്താക്കാനുള്ള തീരുമാനത്തിൽ പ്രകോപിതനായാണ് കൈയേറ്റം ചെയ്തതെന്നാണ് പരാതി. ഇതിനു മുമ്പും കൈയേറ്റം നടന്നിട്ടുണ്ടെന്നും രാജലക്ഷമി പറയുന്നു. രാജലക്ഷമി ഉദ്ഘാടനം ചെയ്ത ആരോഗ്യ കേന്ദ്രത്തിലെ ശിലാഫലകം തല്ലി തകർത്തതിന് ഇപ്പോള് റിമാൻഡിലാണ് വെള്ളനാട് ശശി.