ഹരിപ്പാട് ടൗൺ മസ്ജിദിൽ മോഷണം, സിസിടിവി ദൃശ്യങ്ങള് പുറത്ത്
റോഡിലൂടെ എത്തിയ രണ്ടംഗസംഘത്തിൽ ഒരാൾ മതിൽ ചാടി അകത്തു കടക്കുകയും വഞ്ചി എടുത്ത് കൂടെയുള്ള ആളിനെ മതിലിനു മുകളിലൂടെ ഏൽപ്പിക്കുന്നതും സിസിടിവി ദൃശ്യങ്ങളിൽ നിന്ന് വ്യക്തമാണ്.
ആലപ്പുഴ: ഹരിപ്പാട് ടൗൺ മസ്ജിദിൽ മോഷണം. പള്ളിയുടെ മതിൽക്കെട്ടിനകത്ത് സ്ഥാപിച്ചിരുന്ന വഞ്ചിയാണ് മോഷ്ടാക്കൾ എടുത്തു കൊണ്ടു പോയത്. ഇന്ന് പുലർച്ചെ മൂന്നരയോടെയായിരുന്നു സംഭവം. സമീപത്ത് റോഡിലൂടെ എത്തിയ രണ്ടംഗസംഘത്തിൽ ഒരാൾ മതിൽ ചാടി അകത്തു കടക്കുകയും വഞ്ചി എടുത്ത് കൂടെയുള്ള ആളിനെ മതിലിനു മുകളിലൂടെ ഏൽപ്പിക്കുന്നതും സിസിടിവി ദൃശ്യങ്ങളിൽ നിന്ന് വ്യക്തമാണ്.
ഇമാം റിയാസ് അഹ്സനി ഉൾപ്പെടെ നാലുപേർ രാത്രി മസ്ജിദിൽ ഉണ്ടായിരുന്നു. എങ്കിലും രാവിലെ 10 മണിയോടെയാണ് മോഷണം നടന്നത് ഇവരുടെ ശ്രദ്ധയിൽപ്പെടുന്നത്. വഞ്ചി തുറന്നിട്ട് രണ്ട് മാസങ്ങളിൽ ഏറെ ആയതിനാൽ 10000 രൂപയോളം ഉണ്ടാകുമെന്ന് മസ്ജിദ് സെക്രട്ടറി സുഹൈൽ പറഞ്ഞു. ഹരിപ്പാട് പൊലീസിൽ പരാതി നൽകി.