കൊച്ചിയിൽ പ്രീ സ്കൂൾ വാഹനത്തിലെ കുട്ടികളുമായി യാത്ര ചെയ്യുകയായിരുന്ന ഡ്രൈവർ ജോജു സാമുവൽ ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് മരിച്ചു. വാഹനം സുരക്ഷിതമായി നിർത്തിയ ശേഷമാണ് അദ്ദേഹം കുഴഞ്ഞുവീണത്. വാഹനത്തിലുണ്ടായിരുന്ന കുട്ടികളെ പിന്നീട് സുരക്ഷിതമായി വീടുകളിലെത്തിച്ചു.
കൊച്ചി: പ്രീ സ്കൂൾ വാഹനത്തിൽ കുട്ടികളുമായി യാത്ര ചെയ്യുന്നതിനിടെ ദേഹാസ്വാസ്ഥ്യം അനുഭവപ്പെട്ട ഡ്രൈവർ കുഴഞ്ഞുവീണ് മരിച്ചു. കോളനിപ്പടി കരിങ്ങാട്ടിൽ വീട്ടിൽ കെ.ജെ. സാമുവലിന്റെയും തങ്കമ്മയുടെയും മകൻ ജോജു സാമുവൽ (61) ആണ് മരിച്ചത്.
ബുധനാഴ്ച വൈകിട്ട് മൂന്നുമണിയോടെ കുന്നത്തേരി എസ്എൻഡിപി റോഡിലായിരുന്നു സംഭവം. യാത്രയ്ക്കിടെ അസ്വസ്ഥത അനുഭവപ്പെട്ടതോടെ ജോജു വാഹനം റോഡരികിൽ നിർത്തി സമീപത്തെ വീട്ടിലെത്തി വിവരം അറിയിക്കുകയായിരുന്നു. പിന്നാലെ കുഴഞ്ഞുവീണു.
വീട്ടുകാർ ഉടൻ തന്നെ അദ്ദേഹത്തെ സമീപത്തെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സംഭവ സമയത്ത് വാഹനത്തിൽ കുട്ടികൾക്കൊപ്പം ആയയും ഉണ്ടായിരുന്നു. ആയ പ്രീ സ്കൂൾ അധികൃതരെ വിവരം അറിയിച്ചതിനെ തുടർന്ന് മറ്റൊരു വാഹനം സ്ഥലത്തെത്തിച്ച് കുട്ടികളെ സുരക്ഷിതമായി വീടുകളിലെത്തിച്ചു.
ഭാര്യ: മോളിക്കുട്ടി ജോജു. സഹോദരങ്ങൾ: ജെസി ടി ഫിലിപ്പ്, ബ്ലെസി സാം, വിജോയ് സാമുവൽ. സംസ്കാരം ശനിയാഴ്ച ആലുവ യു സി കോളേജിന് സമീപമുള്ള ബ്രദറൺ സെമിത്തേരിയിൽ നടക്കും.
