രാത്രികാലങ്ങളിൽ നല്ല തണുപ്പും പകൽ കനത്ത ചൂടുമെന്നതാണ് പാലക്കാട്ടെ അന്തരീക്ഷം. ഈ നില തുടർന്നാൽ വരും ദിവസങ്ങളിൽ 42 വരെ എത്തിയാലും അത്ഭുതപ്പെടാനില്ലെന്നാണ് വിദഗ്ധരുടെ നിരീക്ഷണം
പാലക്കാട്: കനത്ത ചൂടിൽ വെന്തുരുകി പാലക്കാട്. പകൽസമയത്തെ ശരാശരി താപനില 39 ഡിഗ്രിയിലെത്തിയിരിക്കുകയാണ്. വരാനിരിക്കുന്നത് കടുത്ത വരൾച്ചയുടെ ദിവസങ്ങളാണെന്നാണ് വിലയിരുത്തൽ.
മാർച്ച് മാസം തുടങ്ങുമ്പോൾത്തന്നെ പാലക്കാട്ടെ താപനില നാൽപത് ഡിഗ്രിയിലേക്കടുക്കുകയാണ്. രാത്രികാലങ്ങളിൽ നല്ല തണുപ്പും പകൽ കനത്ത ചൂടുമെന്നതാണ് പാലക്കാട്ടെ അന്തരീക്ഷം. ഈ നില തുടർന്നാൽ വരും ദിവസങ്ങളിൽ 42 വരെ എത്തിയാലും അത്ഭുതപ്പെടാനില്ലെന്നാണ് വിദഗ്ധരുടെ നിരീക്ഷണം.
നേരത്തെ, 2015ലാണ് പാലക്കാട് അന്തരീക്ഷ താപനില 40 കടന്നത്. അന്ന് 41.5 രേഖപ്പെടുത്തി. 2016 ൽ 41.9 ഉം രേഖപ്പെടുത്തി. ചൂട് കനത്തുതുടങ്ങിയ ഫെബ്രുവരിയിൽ തന്നെ മലമ്പുഴയിൽ ആടുകൾ ചത്തുവീണതും ആശങ്ക പടർത്തിയിട്ടുണ്ട്. സൂര്യാഘാതത്തിന് സാധ്യതയുണ്ടെന്ന് മുന്നറിയിപ്പും നിലനിൽക്കുന്നുണ്ട്.
വേനൽമഴയിലാണ് ഇനി പ്രതീക്ഷ. ജലസംഭരണികളിലെ വെളളം കൂടി വറ്റിയാൽ മാർച്ച് പകുതിയോടെ തന്നെ പാലക്കാട് വരൾച്ചയിലേക്ക് കടക്കും.
