പരിശോധന ശക്തമാക്കുമെന്നും അനധികൃത മത്സ്യ ബന്ധനം നടത്തുന്ന യാനങ്ങള്ക്കെതിരെ നിയമ നടപടി സ്വീകരിക്കുമെന്നും ഫിഷറീസ് ഡെപ്യൂട്ടി ഡയറക്ടര്.
തൃശൂര്: തീവ്രതയേറിയ ലൈറ്റ് ഉപയോഗിച്ച് അനധികൃത മത്സ്യ ബന്ധനം നടത്തുന്ന യാനങ്ങള്ക്കെതിരെ കര്ശന നടപടിയെടുത്ത് ഫിഷറീസ് - മറൈന് എന്ഫോഴ്സ്മെന്റ് അധികൃതര്. മൂന്ന് ബോട്ടുകള് പിടിച്ചെടുത്ത് പിഴ ചുമത്തിയതായി ഫിഷറീസ് മറൈന് എന്ഫോഴ്സ്മെന്റ് അറിയിച്ചു. മുനമ്പം പള്ളിപ്പുറം സ്വദേശി ചീനിപ്പറമ്പില് വീട്ടില് സണ്ണി പിന്ഹീറോ എന്നയാളുടെ ഉടമസ്ഥതയിലുള്ള താനിയ, മുനമ്പം പള്ളിപ്പുറം സ്വദേശി ഓളാട്ടുപുരയ്ക്കല് റൈജുവിന്റെ വചനം 3, കൊച്ചി വെണ്ണല സ്വദേശി തറമ്മേല് വീട്ടില് നിഷാദ് ജോര്ജിന്റെ അല് ജോഹര് എന്നീ ബോട്ടുകളാണ് പിടിച്ചെടുത്തത്.
തീവ്രതയേറിയ ലൈറ്റ് ഉപയോഗിച്ച് കൂട്ടത്തോടെ മത്സ്യങ്ങളെ ആകര്ഷിച്ച് മത്സ്യബന്ധനം നടത്തുന്ന രീതി മത്സ്യ സമ്പത്ത് കുറയാനിടയാക്കുന്നതാണ്. ഇതിലൂടെ പരമ്പരാഗത മത്സ്യത്തൊഴിലാളിയ്ക്ക് മത്സ്യ ലഭ്യത കുറയും. ഇക്കാര്യങ്ങള് ചൂണ്ടിക്കാണിച്ച് തൊഴിലാളികള് നല്കിയ പരാതിയില് അഴീക്കോട് ഫിഷറീസ് സ്റ്റേഷന് അസിസ്റ്റന്റ് ഡയറക്ടര് എം എഫ് പോളിന്റെ നേതൃത്വത്തില് രൂപീകരിച്ച പ്രത്യേക സംഘമാണ് ബോട്ടുകള് പിടികൂടിയത്. ആഴക്കടലില് നടത്തിയ പരിശോധനയിലാണ് ഹൈവോള്ട്ടേജ് ലൈറ്റുകള് ഉപയോഗിച്ചുള്ള മത്സ്യബന്ധനം കണ്ടെത്തിയത്. നിയമനടപടികള് പുര്ത്തിയാക്കിയ ബോട്ടുകളിലെ മത്സ്യം ലേലം ചെയ്ത് ലഭിച്ച മൂന്നരലക്ഷം രുപ സര്ക്കാരിലേക്ക് കണ്ടുകെട്ടി. വചനം മൂന്നു ബോട്ടിന് പിഴയായി രണ്ടു ലക്ഷം രൂപയും, അനധികൃത മത്സ്യബന്ധനത്തിനും പെര്മിറ്റ് ഇല്ലാത്തതിനുമായി അല് ജോഹര് ബോട്ടിന് 2,50,000 രുപയും, താനിയ ബോട്ടിന് 2,50,000 രുപയും പിഴ ചുമത്തി, ലഭിച്ച പത്തരലക്ഷം രൂപ ട്രഷറിയില് അടച്ചെന്ന് അധികൃതര് അറിയിച്ചു.
കടലില് കൃത്രിമമായി അമിത വെളിച്ചമുണ്ടാക്കി മത്സ്യക്കൂട്ടങ്ങളെ ആകര്ഷിച്ച് ഒന്നിച്ച് കോരിയെടുക്കുന്ന മത്സ്യബന്ധനം കേന്ദ്ര-സംസ്ഥാന സര്ക്കാരുകള് നിരോധിച്ച രീതിയാണ്. 12 വാട്ടിന് താഴെ വെളിച്ച സംവിധാനം ഉപയോഗിക്കാനാണ് അനുമതിയുള്ളത്. ഇതു ലംഘിച്ച് ഇതര സംസ്ഥാന തൊഴിലാളികളെ ഉപയോഗപ്പെടുത്തി 3255 വാട്ട് ലൈറ്റ് ഉപയോഗിച്ചായിരുന്നു അനധികൃത മീന്പിടുത്തം നടത്തിയിരുന്നത്. പരിശോധനയും നടപടികളും കര്ശനമാക്കാന് തൃശൂര് ഫിഷറീസ് ഡെപ്യൂട്ടി ഡയറക്ടര് പ്രത്യേക നിര്ദ്ദേശം നല്കിയിരുന്നു. അഴീക്കോട് മുതല് കാപ്രിക്കാട് വരെയുള്ള കടല്തീരത്തും ആഴക്കടലിലും നിരീക്ഷണം ശക്തമാക്കി വരവേയാണ് മുനമ്പം, അഴീക്കോട് ഭാഗത്ത് നിന്ന് വന്ന ബോട്ടുകള് പിടികൂടിയത്. വരും ദിവസങ്ങളിലും പരിശോധന ശക്തമാക്കുമെന്നും അനധികൃത മത്സ്യ ബന്ധനം നടത്തുന്ന യാനങ്ങള്ക്കെതിരെ നിയമ നടപടി സ്വീകരിക്കുമെന്നും ഫിഷറീസ് ഡെപ്യൂട്ടി ഡയറക്ടര് അറിയിച്ചു.
