വിക്ടേഴ്സ് ചാനലിലെ ഓണ്‍ലൈന്‍ ക്ലാസിലൂടെ ശ്രദ്ധേയനായ അധ്യാപകന്‍ മരിച്ച നിലയില്‍
ഇന്നലെ വിക്ടേഴിനായി ക്ലാസ് എടുത്ത് തിരിച്ചു പോകും വഴിയാണ് അപകടമുണ്ടായത്. വീടിന് തൊട്ടടുത്തുളള പാലത്തിൽ നിന്നാണ് ഇദ്ദേഹം തോട്ടിലേക്ക് വീണത്.
തിരുവനന്തപുരം: വിക്ടേഴ്സ് ചാനലിലെ ഓണ്‍ലൈന്‍ ക്ലാസിലൂടെ ശ്രദ്ധേയനായ അധ്യാപകനെ തോട്ടിൽ മരിച്ച നിലയിൽ കണ്ടെത്തി. വിതുര ഗവണ്‍മെന്‍റ് യുപി സ്കൂളിലെ അധ്യാപകനായ നന്ദിയോട് സ്വദേശി ബിനുകുമാറിനെയാണ് തോട്ടില്‍ മരിച്ച നിലയില്‍ കണ്ടെത്തിയത്.
ഇന്നലെ വിക്ടേഴിനായി ക്ലാസ് എടുത്ത് തിരിച്ചു പോകും വഴിയാണ് അപകടമുണ്ടായത്. വീടിന് തൊട്ടടുത്തുളള പാലത്തിൽ നിന്നാണ് ഇദ്ദേഹം തോട്ടിലേക്ക് വീണത്. കാൽ വഴുതി തോട്ടിൽ വീഴുകയാരുന്നു എന്നാണ് സൂചന. ഇദ്ദേഹം മദ്യപിച്ചിരുന്നതായും പൊലീസ് വ്യക്തമാക്കി.
44 കാരനായ ബിനുകുമാറാണ് ജൂണ്‍ നാലിന് വിക്ടേഴ്സ് ചാനലിലൂടെ ഏഴാം ക്ലാസ് വിദ്യാര്‍ത്ഥികള്‍ക്കായി ഗണിതശാസ്ത്രം ക്ലാസ് എടുത്തത്. കെഎസ്ടിഎ പാലോട് ഉപജില്ലാ കമ്മിറ്റി അംഗമാണ് ഇദ്ദേഹം. ഭാര്യ കൃഷ്ണപ്രിയ നെടുമങ്ങാട് ദര്‍ശന സ്കൂള്‍ അധ്യാപികയാണ്. എട്ടാം ക്ലാസ് വിദ്യാര്‍ത്ഥിനിയായ ദേവനന്ദയാണ് മകള്‍.
