പുതിയ സാമ്പത്തിക വര്ഷം ആരംഭിച്ചു കഴിഞ്ഞു. ഈ സമയത്ത് ആദായനികുതി സംബന്ധിച്ച കാര്യങ്ങൾ നേരത്തെ ആസൂത്രണം ചെയ്യുന്നതാണ് നല്ലത്. സെക്ഷന് 80C, 80D പോലുള്ള ഇളവുകള് പ്രയോജനപ്പെടുത്തുന്നതും ശരിയായ നികുതി ഘടന തിരഞ്ഞെടുക്കുന്നതും നികുതി ഭാരം കുറയ്ക്കാൻ സഹായിക്കും. അവസാന നിമിഷത്തെ നിക്ഷേപം പോലുള്ള സാധാരണ പിഴവുകൾ ഒഴിവാക്കുന്നതിലൂടെ വലിയൊരു തുക ലാഭിക്കാം.
പുതിയ സാമ്പത്തിക വര്ഷം (2026-27) ആരംഭിച്ചതോടെ, ആദായനികുതി കൃത്യമായി ആസൂത്രണം ചെയ്യേണ്ട സമയമായിരിക്കുകയാണ്. അവസാന നിമിഷം തിരക്ക് കൂട്ടി നിക്ഷേപങ്ങള് നടത്തുന്നതിന് പകരം, തുടക്കം മുതലേ ശരിയായ പ്ലാനിംഗ് നടത്തിയാല് നികുതി ഇളവുകള് പരമാവധി പ്രയോജനപ്പെടുത്താനും വലിയൊരു തുക ലാഭിക്കാനും സാധിക്കും. മുന്കൂട്ടി പ്ലാന് ചെയ്തില്ലെങ്കില് നികുതി കുറയ്ക്കാനുള്ള സുവര്ണ്ണാവസരങ്ങള് പലതും നഷ്ടമായേക്കാം. അവസാന നിമിഷം നികുതി ലാഭിക്കാനായി മാത്രം പണം നിക്ഷേപിക്കുന്നത് പലപ്പോഴും ശരിയായ സാമ്പത്തിക ലക്ഷ്യങ്ങളുമായി പൊരുത്തപ്പെടാറില്ല
നികുതി ലാഭിക്കാന് ഈ തന്ത്രങ്ങള് പരീക്ഷിക്കാം
ഇളവുകള് പരമാവധി പ്രയോജനപ്പെടുത്തുക: സെക്ഷന് 80C, 80D എന്നിവ പ്രകാരം ആരോഗ്യ ഇന്ഷുറന്സ്, ലൈഫ് ഇന്ഷുറന്സ്, പി.പി.എഫ് , ഇ.എല്.എസ്.എസ് തുടങ്ങിയവയില് നിക്ഷേപിച്ച് വലിയൊരു തുക നികുതിയില് നിന്ന് ഒഴിവാക്കാം.
നികുതി ഘടന തിരഞ്ഞെടുക്കുമ്പോള് ശ്രദ്ധിക്കുക: പഴയ നികുതി ഘടനയും പുതിയ നികുതി ഘടനയും താരതമ്യം ചെയ്യുക. സാധാരണയായി 10 ലക്ഷം രൂപയില് താഴെ വാര്ഷിക വരുമാനമുള്ളവര്ക്ക് പുതിയ നികുതി ഘടനയായിരിക്കും കൂടുതല് ലാഭകരം.
Related Articles
ശമ്പള ഘടന പുനഃക്രമീകരിക്കാം: എച്ച്.ആര്.എ, എല്.ടി.എ മറ്റ് അലവന്സുകള് എന്നിവ ശരിയായ രീതിയില് ക്രമീകരിക്കുന്നത് വഴി ടാക്സ് ബാധ്യത കുറയ്ക്കാം.
ക്യാപിറ്റല് ഗെയിന്സ്: ഓഹരികളോ മറ്റ് ആസ്തികളോ വില്ക്കുമ്പോള് ടാക്സ് ഹാര്വെസ്റ്റിംഗ് പോലുള്ള രീതികള് ഉപയോഗിച്ച് നികുതി ലാഭിക്കാം.
ബിസിനസ് ചെലവുകള്: ഫ്രീലാന്സര്മാരും ബിസിനസ്സ് ഉടമകളും തങ്ങളുടെ ബിസിനസ്സുമായി ബന്ധപ്പെട്ട ചെലവുകള് കൃത്യമായി രേഖപ്പെടുത്തുകയും അത് വഴി നികുതി കുറയ്ക്കുകയും ചെയ്യണം.
വരുത്തുന്ന പ്രധാന പിശകുകള് ഒഴിവാക്കാം
നികുതി ലാഭിക്കാനുള്ള ശ്രമത്തിനിടയില് പലരും വരുത്തുന്ന സാധാരണ തെറ്റുകളെക്കുറിച്ച് വിദഗ്ധര് മുന്നറിയിപ്പ് നല്കുന്നു:
അവസാന നിമിഷത്തെ നിക്ഷേപം: മാര്ച്ച് മാസത്തില് ധൃതി പിടിച്ച് നിക്ഷേപം നടത്തുമ്പോള് കുറഞ്ഞ ലാഭം നല്കുന്ന പദ്ധതികളില് പണം കുടുങ്ങിപ്പോകാന് സാധ്യതയുണ്ട്.
രേഖകളുടെ അഭാവം: കൃത്യമായ ബില്ലുകളും രേഖകളും സൂക്ഷിക്കാത്തത് കാരണം അര്ഹമായ പല ഇളവുകളും (ഉദാഹരണത്തിന് വിദ്യാഭ്യാസ വായ്പ പലിശ, ഹോം ലോണ് പലിശ) ക്ലെയിം ചെയ്യാന് കഴിയാതെ വരുന്നു.
സാമ്പത്തിക ഉപദേശങ്ങൾ: നികുതി നിയമങ്ങള് ഓരോ വര്ഷവും മാറിക്കൊണ്ടിരിക്കും. പഴയ അറിവുകളോ തെറ്റായ ഉപദേശങ്ങളോ പിന്തുടരുന്നത് സാമ്പത്തിക നഷ്ടത്തിന് ഇടയാക്കും.
പുതിയ നികുതി ഘടന: ലളിതമാണെന്ന കാരണത്താല് പലരും പുതിയ നികുതി ഘടന തിരഞ്ഞെടുക്കാറുണ്ട്. എന്നാല് പഴയ ഘടനയില് ലഭിക്കുമായിരുന്ന വലിയ ഇളവുകള് ഇവര്ക്ക് നഷ്ടമായേക്കാം.
കൃത്യമായ രേഖകള് സൂക്ഷിക്കുന്നതും നിയമപരമായ വഴികളിലൂടെ നികുതി ആസൂത്രണം ചെയ്യുന്നതുമാണ് ബുദ്ധിപൂര്വ്വമായ നീക്കമെന്ന് വിദഗ്ധര് ഓര്മ്മിപ്പിക്കുന്നു.
