'വൈ ഐ ആം എ ഹിന്ദു ' എന്ന പുസ്തകത്തിന്റെ പേര് പോസ്റ്ററിൽ ഉപയോഗിച്ചതിനെതിരെയാണ് കേസെടുത്തത്. തെരഞ്ഞെടുപ്പ് ചട്ടം ലംഘിച്ചെന്ന് എൻഡിഎ നൽകിയ പരാതിയിലാണ് നടപടി.
തിരുവനന്തപുരം: തെരഞ്ഞെടുപ്പ് പെരുമാറ്റ ചട്ടം ലംഘിച്ചതിന് തിരുവനന്തപുരത്തെ യുഡിഎഫ് സ്ഥാനാര്ത്ഥി ശശി തരൂരിനെതിരെ പൊലീസ് കേസെടുത്തു. 'വൈ ഐ ആം എ ഹിന്ദു ' (why i am a hindu) എന്ന പുസ്തകത്തിന്റെ കവര് പോസ്റ്ററിൽ ഉപയോഗിച്ചതിനെതിരെയാണ് കേസെടുത്തത്. തെരഞ്ഞെടുപ്പ് ചട്ടം ലംഘിച്ചെന്ന് എൻഡിഎ നൽകിയ പരാതിയിലാണ് നടപടി. മ്യൂസിയം പൊലീസാണ് കേസെടുത്തത്.
തന്റെ സ്വകാര്യസ്വത്തായ പുസ്തകത്തിന്റെ പേരില് തെരഞ്ഞെടുപ്പ് കമ്മീഷന് പരാതി നല്കാന് ബിജെപിക്ക് എന്താണ് അവകാശമെന്നായിരുന്നു തരൂരിന്റെ വാദം.'വൈ ഐ ആം എ ഹിന്ദു' എന്ന പുസ്തകം എന്റെ സ്വകാര്യ സ്വത്താണ്. ഞാനൊരു എഴുത്തുകാരനാണെന്ന കാര്യം പ്രചരിപ്പിക്കാന് വേണ്ടി തിരുവന്തപുരം ഡിസിസി ഇറക്കിയ പോസ്റ്ററാണത്. അതിന്റെ പേരിലാണ് ബിജെപി പരാതി നല്കിയിരിക്കുന്നത്.- തരൂര് നേരത്തെ പറഞ്ഞിരുന്നു.
എന്നാൽ, 'വൈ ഐയാം എ ഹിന്ദു' എന്ന പുസ്തകത്തിന്റെ കവര് വച്ച് തരൂര് പോസ്റ്റര് ഇറക്കിയതാണ് യഥാര്ഥ വര്ഗീയത എന്നായിരുന്നു എന്ഡിഎ സ്ഥാനാര്ത്ഥി കുമ്മനം രാജശേഖരൻ പ്രതികരിച്ചത്.
