ഭോപ്പാൽ: ലോക്സഭാ തെരഞ്ഞെടുപ്പിൽ വോട്ട് ചെയ്യാനാകാത്ത മുതിർന്ന കോൺ​ഗ്രസ് നേതാവും മധ്യപ്രദേശ് മുൻ മുഖ്യമന്ത്രിയുമായി ദിഗ്​വിജയ് സിങിനെ വിമർശിച്ച് പ്രധാനമന്ത്രി നരേന്ദ്രമോദി. ദിഗ്​വിജയ് സിങിന്റെ നടപടി കോൺഗ്രസിന്റെ ധാര്‍ഷ്‌ട്യത്തെയാണ് വ്യക്തമാക്കുന്നതെന്ന് മോദി കുറ്റപ്പെടുത്തി. മധ്യപ്രദേശിലെ രത്​ലാമിൽ തെരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. 

'കോൺ​ഗ്രസിന്റെ ധാര്‍ഷ്‌ട്യത്തിന്റെ സൂചനയാണ് ദിഗ്​വിജയ് സിങിന്റെ പ്രവൃത്തിയിലൂടെ വ്യക്തമാകുന്നത്. ഞാൻ അഹമ്മദാബാദിലേക്ക് പോയി വോട്ട് ചെയ്തു. രാഷ്ട്രപതിയും ഉപരാഷ്ട്രപതിയും വിദൂര സ്ഥലങ്ങളിൽ ആയിരുന്നിട്ട് പോലും വോട്ട് ചെയ്യാനായി എത്തിച്ചേർന്നു. എന്നാൽ ‘ദിഗ്ഗി രാജ’ (ദിഗ്​വിജയ് സിങ്) ജനാധിപത്യത്തെ കുറിച്ച് ഒട്ടും ചിന്താകുലനല്ല. അദ്ദേഹത്തെ പറ്റിയും ഭോപ്പാലിലെ സീറ്റിനെ കുറിച്ചും മാത്രമാണ് ദിഗ്​വിജയ് സിങ് ചിന്തിക്കുന്നത്'- മോദി പറഞ്ഞു.

രാജ്ഘറിൽ പോയി വോട്ട് രേഖപ്പെടുത്താൻ അദ്ദേഹം എന്തിന് ഭയക്കണം. കന്നി വോട്ടർമാർക്ക്​ ഒരു തെറ്റായ മാതൃകയാണ് ദിഗ്​വിജയ്​ സിങ്​ നൽകുന്നതെന്നും മോദി കുറ്റപ്പെടുത്തി.

മധ്യപ്രദേശി​ലെ ഭോപ്പാലിൽ നിന്നാണ്​ ദിഗ്​വിജയ്​ സിങ്​ മത്​സരിക്കുന്നത്​. ബിജെപിയുടെ സ്വാധി പ്രഗ്യാ സിങ്​ താക്കൂറാണ്​ എതിർ സ്ഥാനാർത്ഥി. ഭോപ്പാലിൽ നിന്ന്​ 136 കിലോമീറ്റര്‍ അകലെയുള്ള രാജ്ഘറിൽ ആയിരുന്നു ദിഗ്​വിജയ് ​സിങിന്  വോട്ട്. എന്നാൽ തെര​ഞ്ഞെടുപ്പ്​ ദിവസം മണ്ഡലത്തി​ലെ വിവിധ പോളിങ്​ സ്​റ്റേഷനുകൾ സന്ദർശിക്കുന്ന തിരക്കിലായതിനാൽ അദ്ദേഹത്തിന് വോട്ട് ചെയ്യാൻ സാധിച്ചിരുന്നില്ല. വോട്ടു ചെയ്യാന്‍ സാധിക്കാത്തതില്‍ ഖേദമുണ്ടെന്നും അദ്ദേഹം പറഞ്ഞിരുന്നു.