രാഷ്ട്രീയത്തിൽ ചേരുകയാണെങ്കിൽ വഡോദരയിൽ നിന്ന് മത്സരിക്കും; വിവേക് ഒബ്രോയി
പ്രധാനമന്ത്രി നരേന്ദ്ര മോദിയുടെ ജീവിതകഥ പറയുന്ന ‘പിഎം നരേന്ദ്ര മോദി’ എന്ന ചിത്രത്തിന്റെ പ്രമോഷനുമായി ബന്ധപ്പെട്ട് പറുൾ സർവകലാശാലയിലെ വിദ്യാർഥികളുമായി സംസാരിക്കുകയായിരുന്നു അദ്ദേഹം. ചിത്രത്തിൽ വിവേക് ഒബ്രോയിയാണ് മോദിയെ അവതരിപ്പിക്കുന്നത്.
ദില്ലി: രാഷ്ട്രീയത്തിൽ ചേരുകയാണെങ്കിൽ 2024-ലെ ലോക്സഭാ തെരഞ്ഞെടുപ്പിൽ വഡോദരയിൽ നിന്ന് മത്സരിക്കുമെന്ന് ബോളിവുഡ് താരം വിവേക് ഒബ്രോയി. പ്രധാനമന്ത്രി നരേന്ദ്ര മോദിയുടെ ജീവിതകഥ പറയുന്ന ‘പിഎം നരേന്ദ്ര മോദി’ എന്ന ചിത്രത്തിന്റെ പ്രമോഷനുമായി ബന്ധപ്പെട്ട് പറുൾ സർവകലാശാലയിലെ വിദ്യാർഥികളുമായി സംസാരിക്കുകയായിരുന്നു അദ്ദേഹം. ചിത്രത്തിൽ വിവേക് ഒബ്രോയിയാണ് മോദിയെ അവതരിപ്പിക്കുന്നത്.
രാഷ്ട്രീയത്തിൽ പ്രവേശിക്കുമോ എന്ന ചോദ്യത്തിന് മറുപടി പറയുകയായിരുന്നു വിവേക് ഒബ്രോയി. രാഷ്ട്രീയത്തിൽ പ്രവേശിക്കുകയാണെങ്കിൽ 2024-ലെ ലോക്സഭാ തെരഞ്ഞെടുപ്പിൽ വഡോദരയിൽ നിന്ന് മത്സരിക്കും. തെരഞ്ഞെടുപ്പിൽ വഡോദരയിൽനിന്ന് പ്രധാനമന്ത്രി നരേന്ദ്ര മോദി മത്സരിച്ചപ്പോൾ ഇവിടുത്തെ ജനങ്ങൾ അദ്ദേഹത്തിന് നൽകിയ സ്നേഹവും വാത്സല്യവുമാണ് അതിന് കാരണമെന്നും അദ്ദേഹം പറഞ്ഞു.
ഈ മാസം 12-ന് റിലീസിനെത്തുന്ന ചിത്രത്തെക്കുറിച്ചും വിവേക് സംസാരിച്ചു. പ്രധാനമന്ത്രിയുടെ ശരീരഭാഷയും സംസാരിക്കുന്ന രീതിയും പിഎം നരേന്ദ്ര മോദിയിലെ കഥാപാത്രം അവതരിപ്പിക്കുന്നതിനായി നിരീക്ഷിച്ചിരുന്നു. ചിത്രത്തിലെ കഥാപാത്രമാകാൻ വേണ്ടി 16 ദിവസമെടുത്തു. ഒരു രാജ്യത്തെ പ്രധാനമന്ത്രിയായ, ലോകത്തിലെ ഏറ്റവും വലിയ നേതാക്കളിൽ ഒരാളുടെ കഥ പറയുന്ന വളരെ പ്രചോദനദായകമായ ചിത്രമാണിതെന്നും വിവേക് പറഞ്ഞു.
പിഎം നരേന്ദ്ര മോദി പുറത്തിറക്കുന്നത് തെരഞ്ഞെടുപ്പ് പെരുമാറ്റച്ചട്ട ലംഘനമാണെന്നാണ് ആരോപിച്ച് കോണ്ഗ്രസ് അടക്കമുള്ള പ്രതിപക്ഷ പാർട്ടികൾ രംഗത്തെത്തിയിരുന്നു. ചിത്രം സ്റ്റേ ചെയ്യണമെന്നും ലോക്സഭ തെരഞ്ഞെടുപ്പ് പൂര്ത്തിയാവുന്നത് വരെ ചിത്രം ബാന് ചെയ്യണമെന്നും കാണിച്ച് പാർട്ടികൾ സുപ്രീം കോടതിയിൽ ഹരജി നൽകിയിരുന്നു.