മ്യൂച്വൽ ഫണ്ടിന്റെ സ്പോൺസറാകാൻ സ്വകാര്യ ഇക്വിറ്റി ഫണ്ടുകൾ; അനുവാദവുമായി സെബി
വ്യവസായത്തിന്റെ വളർച്ചയ്ക്ക് മാർഗനിർദേശങ്ങൾ നല്കാൻ സ്വകാര്യ ഇക്വിറ്റി ഫണ്ടുകള്‍ക്ക് കഴിയും. യോഗ്യതാ മാനദണ്ഡങ്ങൾ പുതുക്കിയിട്ടുണ്ട്.
ദില്ലി: മ്യൂച്വൽ ഫണ്ട് ഹൗസ് സ്പോൺസർ ചെയ്യുന്നതിന് സ്വകാര്യ ഇക്വിറ്റി (പിഇ) ഫണ്ടുകൾക്ക് അനുവാദം നല്കാൻ നിർദേശിച്ച് സെബി. വ്യവസായത്തിന്റെ വളർച്ചയ്ക്ക് ഊർജം പകരാൻ തന്ത്രപരമായ മാർഗനിർദേശങ്ങൾ കൊണ്ടുവരാൻ കഴിയുന്നതിനാൽ മ്യൂച്വൽ ഫണ്ട് ഹൗസ് സ്പോൺസർ ചെയ്യുന്നതിന് സ്വകാര്യ ഇക്വിറ്റി ഫണ്ടുകളെ അനുവദിക്കാൻ ക്യാപിറ്റൽ മാർക്കറ്റ് റെഗുലേറ്റർ സെബി നിർദേശിച്ചു.
ബന്ധൻ ഫിനാൻഷ്യൽ ഹോൾഡിംഗ്‌സ് ലിമിറ്റഡ്, സോവറിൻ വെൽത്ത് ഫണ്ട് ജിഐസി, പ്രൈവറ്റ് ഇക്വിറ്റി ഫണ്ട് ക്രിസ്‌കാപ്പിറ്റൽ എന്നിവ ഉൾപ്പെടുന്ന ഒരു കൺസോർഷ്യം ഐഡിഎഫ്‌സി മ്യൂച്വൽ ഫണ്ട് ഏറ്റെടുക്കുന്നതിന്റെ പശ്ചാത്തലത്തിലാണ് ഈ നിർദ്ദേശം.
നിലവിലെ ആവശ്യകതയെ അടിസ്ഥാനമാക്കി യോഗ്യത നേടാത്ത സ്വകാര്യ ഇക്വിറ്റി ഫണ്ടുകളെ മ്യൂച്വൽ ഫണ്ടുകളുടെ (എംഎഫ്) സ്പോൺസർമാരായി പ്രവർത്തിക്കാൻ പ്രാപ്തമാക്കുന്നതിന് സെബി രൂപീകരിച്ച വർക്കിംഗ് ഗ്രൂപ്പ് അതിന്റെ കൺസൾട്ടേഷൻ പേപ്പറിൽ, ബദൽ യോഗ്യതാ മാനദണ്ഡങ്ങൾ നിർദ്ദേശിക്കുകയും നിലവിലുള്ളവ കൂടുതൽ ശക്തിപ്പെടുത്താൻ നിർദ്ദേശിക്കുകയും ചെയ്തു.
നിലവിൽ, ഒരു മ്യൂച്വൽ ഫണ്ടിൽ 40 ശതമാനമോ അതിലധികമോ ഓഹരികൾ കൈവശമുള്ള ഏതൊരു സ്ഥാപനത്തെയും സ്പോൺസറായി കണക്കാക്കുകയും യോഗ്യതാ മാനദണ്ഡങ്ങൾ പാലിക്കുകയും വേണം. സെക്യൂരിറ്റീസ് ആൻഡ് എക്‌സ്‌ചേഞ്ച് ബോർഡ് ഓഫ് ഇന്ത്യ (സെബി) ജനുവരി 29 വരെ പൊതുജനങ്ങളിൽ നിന്ന് അഭിപ്രായം തേടിയിട്ടുണ്ട്.
മ്യൂച്വൽ ഫണ്ടിന്റെ സ്‌പോൺസർക്കുള്ള ഇതര യോഗ്യതാ മാനദണ്ഡങ്ങൾ പ്രകാരം, അസറ്റ് മാനേജ്മെന്റ് കമ്പനിയുടെ (എഎംസി) പോസിറ്റീവ് ലിക്വിഡ് ആസ്തി കുറഞ്ഞത് 150 കോടി രൂപയെങ്കിലും ആയിരിക്കണം. സ്‌പോൺസർമാർ എഎംസിയിൽ വേണ്ടത്ര മൂലധനമാക്കണമെന്ന് സെബി നിർദ്ദേശിച്ചു. കൂടാതെ, എഎംസിയിലേക്ക് സംഭാവന ചെയ്യുന്ന മൂലധനം 5 വർഷത്തേക്ക് ലോക്ക്-ഇൻ ചെയ്തിരിക്കണം. കൂടാതെ, സ്‌പോൺസർമാരുടെ 40 ശതമാനം ഓഹരിയും അഞ്ച് വർഷത്തേക്ക് ലോക്ക്-ഇൻ ചെയ്തിരിക്കണം.
