തിരുവനന്തപുരം: ബിനോയ് കൊടിയേരിക്കെതിരെയുള്ള തട്ടിപ്പ് കേസിൽ പാര്ടിക്കുള്ളിൽ അന്വേഷണം നടത്തേണ്ട സാഹചര്യമില്ലെന്ന് സംസ്ഥാന ഘടകം കേന്ദ്ര നേതൃത്വത്തെ അറിയിച്ചു. വിവാദത്തെ കുറിച്ച് സംസ്ഥാന കമ്മിറ്റിയുടെ വിശദീകരണം പിബിക്ക് അയച്ചു. ബിനോയ് കോടിയേരി വായ്പയെടുത്ത ശേഷം പണം തിരിച്ചടക്കാതെ മുങ്ങി എന്ന പരാതിയിൽ സംസ്ഥാന നേതൃത്വത്തിന്റെ നിലപാട് കേന്ദ്ര നേതൃത്വം തേടിയിരുന്നു.
ഇത് പാര്ടി അന്വേഷിക്കേണ്ട വിഷയമല്ലെന്നും കോടിയേരി ഒരു തരത്തിലും ഇടപെട്ടിട്ടില്ലെന്നുമാണ് സംസ്ഥാനത്ത് നടന്ന നേതൃയോഗം വിലയിരുത്തിയത്. മാത്രമല്ല പ്രശ്നം മകൻ തന്നെ പരിഹരിക്കുമെന്നും കോടിയേരി പാര്ടി നേതാക്കളെ അറിയിച്ചിരുന്നു. ഇക്കാര്യങ്ങൾ തന്നെയാണ് പാര്ടി സംസ്ഥാന ഘടകം കേന്ദ്ര നേതൃത്വത്തെയും അറിയിച്ചത്. 13 കോടി രൂപ ബിനോയ് തിരിച്ചടക്കാനുണ്ട് എന്ന പരാതിയാണ് ദുബായ് കമ്പനിയിൽ നിന്ന് പാര്ടി നേതൃത്വത്തിന് കിട്ടിയത്.
