വെള്ളം കയറിയ വീടുകളിലെയും സ്ഥാപനങ്ങളിലെയും വയറിങ്, എനര്ജി മീറ്റര്, ഇഎല്സിബി, എംസിബി, സ്വിച്ചുകള്, പ്ലഗ്ഗുകള് തുടങ്ങിയവയിൽ വെള്ളവും ചെളിയും കയറിയിട്ടുണ്ടാകും. ഇത്തരത്തിൽ വെള്ളവും ചെളിയും കയറിയവയിലൂടെ വൈദ്യുതി പ്രവഹിപ്പിക്കുമ്പോള് ഷോര്ട്ട് സര്ക്യൂട്ട് ഉണ്ടാകാന് സാധ്യതയുണ്ടെന്ന് കെഎസ്ഇബി അറിയിച്ചു.
തിരുവനന്തപുരം: ദുരിതാശ്വാസ ക്യാമ്പുകളിൽനിന്നും വീടുകളിലേക്ക് തിരിച്ചെത്തുന്നവർക്ക് മുന്നറിയിപ്പുമായി കെഎസ്ഇബി. വെള്ളം കയറിയ വീടുകളിലെയും സ്ഥാപനങ്ങളിലെയും വയറിങ്, എനര്ജി മീറ്റര്, ഇഎല്സിബി, എംസിബി, സ്വിച്ചുകള്, പ്ലഗ്ഗുകള് തുടങ്ങിയവയിൽ വെള്ളവും ചെളിയും കയറിയിട്ടുണ്ടാകും. ഇത്തരത്തിൽ വെള്ളവും ചെളിയും കയറിയവയിലൂടെ വൈദ്യുതി പ്രവഹിപ്പിക്കുമ്പോള് ഷോര്ട്ട് സര്ക്യൂട്ട് ഉണ്ടാകാന് സാധ്യതയുണ്ടെന്ന് കെഎസ്ഇബി അറിയിച്ചു.
പ്രളയക്കെടുതിയില് വൈദ്യുതി മുടങ്ങിയ പ്രദേശങ്ങളിലെ വൈദ്യുതി ലൈനുകളില് അറ്റകുറ്റപ്പണികള് നടന്നുവരുന്നതിനാല് ലൈനുകൾ ചാര്ജ് ചെയ്യാനുള്ള സാധ്യത കൂടുതലാണ്. അതിനാൽ ചില നിര്ദേശങ്ങള് കെഎസ്ഇബി മുന്നോട്ട് വയ്ക്കുന്നുണ്ട്.വീടിന് സമീപം സര്വീസ് വയര്/ലൈന് കമ്പി/ എര്ത്ത് കമ്പി ഇവ പൊട്ടിക്കിടക്കുന്നതോ താഴ്ന്നുകിടക്കുന്നതോ കണ്ടാല് സ്പര്ശിക്കരുത്. ഇക്കാര്യം ഉടന് കെഎസ്ഇബി ഓഫീസിലോ 9496061061 എന്ന നമ്പരിലോ അറിയിക്കുക.
മീറ്റര് ബോക്സില് എനര്ജി മീറ്ററിനോടു ചേര്ന്നുള്ള ഫ്യൂസുകള് ഊരിമാറ്റി മെയിന് സ്വിച്ച്/ഇഎല്സിബി ഓഫ് ചെയ്ത ശേഷം മാത്രമേ വീട് ശുചീകരണം ആരംഭിക്കാവൂ. അതോടൊപ്പം ഇന്വര്ട്ടര്/സോളാര് സിസ്റ്റം ഉള്ളവര് അത് ഓഫ് ചെയ്ത് ബാറ്ററി കണക്ഷന് വിച്ഛേദിക്കണമെന്നും കെഎസ്ഇബി അറിയിച്ചു. വെള്ളപ്പൊക്കത്തിലോ സുരക്ഷാ പ്രവര്ത്തനത്തിന്റെ ഭാഗമായോ വീടുകളിലെയും സ്ഥാപനങ്ങളിലെയും എര്ത്തിങ് സംവിധാനത്തിന് കേടുവരാൻ സാധ്യതയുണ്ട്. അതിനാൽ എര്ത്ത് ഇലക്ട്രോഡിന്റെ സ്ഥിതി പരിശോധിച്ച് സുരക്ഷിതമാണെന്ന് ഉറപ്പുവരുത്തണം.
വീടുകളിലും സ്ഥാപനങ്ങളിലും വച്ചിട്ടുള്ള വൈദ്യുതി പാനലുകളില് വെള്ളം കയറിയിട്ടുണ്ടെങ്കില് നനവ് ഇല്ലാത്തവിധം പാനലുകള് വൃത്തിയാക്കി ഇന്സുലേഷന് റസിസ്റ്റന്റ് പരിശോധിച്ച് സുരക്ഷ ഉറപ്പുവരുത്തണം. ഇന്സുലേഷന് റസിസ്റ്റന്റ് പരിശോധിക്കാന് വയര്മാന്റെ സേവനം ഉപയോഗിക്കുക. വെള്ളം ഇറങ്ങിയാലും ചിലപ്പോള് കണ്സീല്ഡ് അല്ലാതെയുള്ള പൈപ്പിനുള്ളില് വെള്ളം നില്ക്കാന് സാധ്യതയുള്ളതിനാല് ഷോര്ട്ട്സര്ക്യൂട്ട് ആയേക്കും.
പാനലുകളിലെ എനര്ജി മീറ്റര്, എംസിബി, എംസിസിബി എന്നിവയില് വെള്ളം കയറിയിട്ടുണ്ടെങ്കില് പൂര്ണമായും സുരക്ഷിതമാണെന്ന് ഉറപ്പുവരുത്താന് പറ്റാത്ത പക്ഷം അവ മാറ്റി സ്ഥാപിക്കുക. എച്ച്റ്റി/എല്റ്റി കേബിളുകള് വഴി വൈദ്യുതി എത്തുന്ന വീടുകളില് കേബിളുകള്ക്ക് കേടുപാടുണ്ടോ എന്ന് പരിശോധിച്ച് ഉറപ്പുവരുത്തണം. എല്റ്റി കേബിളുകള് 500 വോള്ട്ട് ഇന്സുലേഷന് ടെസ്റ്റര് ഉപയോഗിച്ചും എച്ച്റ്റി കേബിളുകള് 5000 വോള്ട്ട് ഇന്സുലേഷന് ടെസ്റ്റര് ഉപയോഗിച്ചും പരിശോധിച്ച് സുരക്ഷ ഉറപ്പുവരുത്താം. സബ് പാനല്, ഡിബി എന്നിവ ഓഫ് ചെയ്തതിന് ശേഷമേ മെയിന്സ്വിച്ച് ഓണ് ചെയ്യാന് പാടുള്ളൂ. ഇതിനു ശേഷം ഡിബിയിലെ ഇഎല്സിബി ഓണ് ചെയ്ത് ടെസ്റ്റ് ബട്ടണ് അമര്ത്തി ഇതിന്റെ പ്രവര്ത്തനക്ഷമത ഉറപ്പുവരുത്തണം. ഇഎല്സിബി പ്രവര്ത്തനക്ഷമമാണെങ്കില് ഓരോരോ എംസിബികളായി ഓണ് ചെയ്യണം.
വെള്ളത്തില് മുങ്ങിയ വൈദ്യുതി ഉപകരണങ്ങള് പ്ലഗ്ഗില് ഘടിപ്പിക്കുന്നതിനു മുൻപ് പ്രവര്ത്തനക്ഷമത ഉറപ്പുവരുത്തണം. ഇഎല്സിബി പ്രവര്ത്തനക്ഷമമല്ലെങ്കില് അത് ബൈപാസ് ചെയ്തു വൈദ്യുതി കടത്തിവിടാന് ശ്രമിക്കരുത്. ഇഎല്സിബി പ്രവര്ത്തനക്ഷമമല്ലെങ്കിലോ പുതിയത് വാങ്ങാന് കഴിയാത്ത സാഹചര്യത്തിലോ ദുരിത ബാധിതർക്ക് അത്യാവശ്യം വെളിച്ചം നല്കാനുള്ള സൗകര്യം കെഎസ്ഇബി ഉദ്യോഗസ്ഥര് ഉറപ്പുവരുത്തുന്നതാണ്.
