യുവതിയുടെ മാല പൊട്ടിക്കുന്ന വീഡിയോ യാഥാര്‍ത്ഥ്യമോ?
തിരുവനന്തപുരം: സമൂഹ മാധ്യമങ്ങളില്‍ ഷെയര്‍ ചെയ്യുന്ന പോസ്റ്റുകളില്‍ പലതിന്‍റേയും യാഥാര്‍ത്ഥ്യത്തെക്കുറിച്ച് ആരും ചിന്തിക്കാറില്ല. അതുകൊണ്ട് തന്നെ പലപ്പോഴും തെറ്റായ കാര്യങ്ങള്‍ വലിയ രീതിയില്‍ ആളുകള്‍ വിശ്വസിക്കുകയും അവ ഷെയര്‍ ചെയ്യാറുമുണ്ട്. ഏറ്റവും ഒടുവിലായി മറ്റൊരു ഉദാഹരണം കൂടി.
എത്രയും പെട്ടന്ന് ഷെയര്‍ ചെയ്യുക എന്ന തലക്കെട്ടോടെ യുവതിയുടെ മാല പൊട്ടിക്കുന്ന യുവാവിന്‍റെ ചിത്രവും വീഡിയോയും സമൂഹ മാധ്യമങ്ങളില്‍ പ്രചരിച്ചിരുന്നു. എന്നാല്‍ ഇത് യാഥാര്‍ത്ഥ്യമല്ലെന്നാണ് ഇപ്പോള്‍ കിട്ടുന്ന വിവരം. കഴിഞ്ഞ ദിവസം കോഴിക്കോട്ട് നടന്ന സിനിമാ ചിത്രീകരണത്തിന്‍റെ ദൃശ്യങ്ങളാണിതെന്ന് ഒരു ഓണ്‍ലൈന്‍ മാധ്യമം റിപ്പോട്ട് ചെയ്യുന്നു.
ബസ് കാത്ത് നില്‍ക്കുന്ന യുവതിയുടെ കഴുത്തില്‍ കിടന്ന മാല കള്ളന്‍ പൊട്ടിച്ചോടുന്ന ദൃശ്യങ്ങളും ചിത്രങ്ങളും ഷെയര്‍ ചെയ്തത് ഇരുപതിനായിരത്തില്‍ അധികം പേരാണ്. എന്നാല്‍ ഇത് സുരേഷ് അച്ചൂസ് സംവിധാനം ചെയ്യുന്ന ചിത്രത്തിലെ ചില ദൃശ്യങ്ങളാണ്. നടി മീരാ വാസുദേവും രാജീവ് രാജനുമാണ് വീഡിയോയിലും ദൃശ്യങ്ങളിലും ഉള്ളത്.
