ബംഗളൂരു: ഭാര്യയുമായുളള വഴക്ക് മൂലം കുപ്രസിദ്ധ ഗുണ്ട ആത്മഹത്യ ചെയ്തു. ബംഗളൂരിലെ ശ്രീരാമപുരം സ്വദേശി അരവിന്ദ്(34) ആണ് ഭാര്യയുമായി വഴക്കിട്ടതിന് ജീവനൊടുക്കിയത്. ദിവസകൂലിക്ക് ജോലി ചെയ്തുവന്ന അരവിന്ദ് കഴിഞ്ഞ കുറച്ച് ദിവസങ്ങളായി ജോലിക്ക് പോകുന്നില്ലായിരുന്നു.
മദ്യപിച്ച് ബോധമില്ലാതെയാണ് അരവിന്ദ് ദിവസവും വീട്ടില് എത്തുന്നത്. ഞായറാഴ്ച രാത്രി മദ്യപിച്ചെത്തിയ അരവിന്ദ് ഭാര്യയുമായി വാക്ക്തര്ക്കത്തിലായി. കുടിനിർത്തിയില്ലെങ്കിൽ താൻ രക്ഷിതാക്കളുടെ വീട്ടിലേക്ക് പോകുമെന്ന് ഭാര്യ അരവിന്ദിനെ ഭീഷണിപ്പെടുത്തിയെന്ന് പൊലീസ് പറയുന്നു. ഇതിന്റെ മനോവിഷമത്തിലാണ് അരവിന്ദ് അടുക്കളയിലെത്തി കത്തിയെടുത്ത് സ്വയം കുത്തിയത്. അരവിന്ദിനെ കെസി ജനറല് ആശുപത്രിയിലെത്തിച്ചെങ്കെലും ജീവന് രക്ഷിക്കാനായില്ല. നാല് ക്രിമിനല് കേസുകളിലെ പ്രതിയാണ് അരവിന്ദെന്ന് പൊലീസ് പറയുന്നു.
