ഉത്തർപ്രദേശ്: ബുലന്ദ്ഷഹറിൽ ​ഗോഹത്യ ആരോപിച്ച് ഉണ്ടായ കലാപത്തിൽ പൊലിസ് ഉദ്യോ​ഗസ്ഥൻ കൊല്ലപ്പെട്ട സംഭവത്തിൽ ഒരാൾ പിടിയിൽ. പൊലിസ് ഉദ്യോ​ഗസ്ഥനായ സുബോധ് കുമാർ സിം​ഗിനെ വെടിവച്ച് കൊന്നതിന്റെ പേരിൽ പ്രശാന്ത് നാട്ട് എന്നയാളെയാണ് പൊലിസ് അറസ്റ്റ് ചെയ്തത്. ബുലന്ദ്ഷഹർ-നോയിഡ അതിർത്തിയിൽ നിന്നാണ് ഇയാളെ അറസ്റ്റ് ചെയ്തതെന്ന് യുപി പൊലിസ് വ്യക്തമാക്കി. ഇയാൾ കുറ്റം സമ്മതിച്ചതായി പൊലിസ് പറയുന്നു.

കൊലപാതകം നടന്ന് ഇരുപത്തഞ്ച് ദിവസങ്ങൾക്ക് ശേഷമാണ് പ്രതിയെ അറസ്റ്റ് ചെയ്യുന്നത്. മുഖ്യപ്രതിയെന്ന് സംശയിക്കുന്ന ബജ്രം​ഗ്ദൾ നേതാവ് യോ​ഗേഷ് രാജ് ഇപ്പോഴും ഒളിവിലാണ്. അറസ്റ്റിലായ പ്രശാന്ത് നാട്ടിൽ നിന്ന് കൂടുതൽ വിവരങ്ങൾ ശേഖരിച്ചുവരികയാണെന്നും പൊലിസ് വെളിപ്പെടുത്തി. പശുവിന്റെ അവശിഷ്ടങ്ങൾ കണ്ടെത്തിയതിനെതുടർന്നാണ് ബുലന്ദ്ഷഹറിൽ കലാപം ആരംഭിച്ചത്. പിന്നീടത് പൊലിസ് ഉദ്യോ​ഗസ്ഥന്റെ കൊലപാതകത്തിൽ കലാശിക്കുകയായിരുന്നു.