ആറ് മാസത്തിലധികം രാജ്യത്തിന് പുറത്തു താമസിച്ചാല് പ്രവാസികളുടെ ഇഖാമ റദ്ദാവും
സ്വകാര്യ മേഖലയില് ജോലി ചെയ്യുന്ന പ്രവാസികള് (ആര്ട്ടിക്കിള് 18 പ്രകാരമുള്ള വിസ) ആറ് മാസത്തിലധികം രാജ്യത്തിന് പുറത്തു നിന്നാല് വരുന്ന നവംബര് ഒന്നാം തീയ്യതി മുതല് വിസ റദ്ദാക്കാനുള്ള ശുപാര്ശക്ക് ആഭ്യന്തര മന്ത്രാലയത്തിന് കീഴിലുള്ള താമസകാര്യ വകുപ്പ് അംഗീകാരം നല്കാന് തീരുമാനിച്ചു.
കുവൈത്ത് സിറ്റി: കുവൈത്തില് സ്വകാര്യ മേഖലയില് ജോലി ചെയ്യുന്ന പ്രവാസികള്ക്ക് ഇനി മുതല് ആറ് മാസത്തിലധികം രാജ്യത്തിന് പുറത്ത് താമസിക്കാനാവില്ല. ഇത്തരത്തില് ആറ് മാസത്തിലഘധികം വിദേശത്ത് താമസിക്കുന്നവരുടെ ഇഖാമ റദ്ദാവും. നവംബര് ഒന്നാം തീയ്യതി മുതല് പുതിയ നിബന്ധന പ്രാബല്യത്തില് വരുമെന്നാണ് പ്രാദേശിക മാധ്യമങ്ങളുടെ റിപ്പോര്ട്ട്.
കുവൈത്തിലെ നിയമപ്രകാരം പ്രവാസികള്ക്ക് രാജ്യത്തിന് പുറത്ത് താമസിക്കാനുള്ള പരമാവധി ദൈര്ഘ്യം ആറ് മാസമാണ്. എന്നാല് കൊവിഡ് സമയത്ത് മാനുഷിക പരിഗണന മുന്നിര്ത്തി പ്രവാസികള്ക്ക് ആറ് മാസത്തിലധികം രാജ്യത്തിന് പുറത്തു നില്ക്കാനും താമസ രേഖകള് ഓണ്ലൈനായി പുതുക്കാനും പ്രത്യേക അനുമതി നല്കിയിരുന്നു. സ്വകാര്യ മേഖലയില് ജോലി ചെയ്യുന്ന പ്രവാസികള് (ആര്ട്ടിക്കിള് 18 പ്രകാരമുള്ള വിസ) ആറ് മാസത്തിലധികം രാജ്യത്തിന് പുറത്തു നിന്നാല് വരുന്ന നവംബര് ഒന്നാം തീയ്യതി മുതല് വിസ റദ്ദാക്കാനുള്ള ശുപാര്ശക്ക് ആഭ്യന്തര മന്ത്രാലയത്തിന് കീഴിലുള്ള താമസകാര്യ വകുപ്പ് അംഗീകാരം നല്കാന് തീരുമാനിച്ചതായാണ് റിപ്പോര്ട്ടുകള്.
പുതിയ നിയമമനുസരിച്ച് മേയ് ഒന്നിന് മുമ്പ് കുവൈത്തില് നിന്ന് പുറത്തുപോയ പ്രവാസികള് നവംബര് ഒന്നിന് മുമ്പ് രാജ്യത്ത് തിരിച്ചെത്തിയില്ലെങ്കില് വിസ റദ്ദാവും. ആര്ട്ടിക്കിള് 22, 24 എന്നിവ പ്രകാരം പ്രവാസികള്ക്ക് അനുവദിക്കുന്ന ആശ്രിത, കുടുംബ വിസകള്ക്കും ഇതേ നിബന്ധന ബാധകമാക്കിയിട്ടുണ്ടെന്ന് കുവൈത്തിലെ പ്രാദേശിക മാധ്യമങ്ങള് റിപ്പോര്ട്ട് ചെയ്തു.
Read also: എതിര് ദിശയില് വാഹനമോടിച്ച് വീഡിയോ ചിത്രീകരിച്ചു; കുവൈത്തില് യുവാവ് അറസ്റ്റില്
27 വയസുകാരനായ പ്രവാസി മലയാളി സ്വിമ്മിങ് പൂളില് മരിച്ച നിലയില്
മനാമ: പ്രവാസി മലയാളി യുവാവ് ബഹ്റൈനില് സ്വിമ്മിങ് പൂളില് മുങ്ങിമരിച്ചു. കോഴിക്കോട് പയ്യോളി സ്വദേശിയായ സിദ്ദാര്ത്ഥ് സജീവ് (27) ആണ് മരിച്ചത്. ബഹ്റൈനിലെ സ്വകാര്യ കമ്പനിയില് ഡെലിവറി സെക്ഷനില് ജോലി ചെയ്തുവരികയായിരുന്ന അദ്ദേഹം ഓഗസ്റ്റ് ഒന്നിനാണ് അവധിക്ക് ശേഷം നാട്ടില് നിന്ന് തിരിച്ചെത്തിയത്.
ഒരു റിസോര്ട്ടിലെ ഓപ്പണ് പൂളിലാണ് സിദ്ദാര്ത്ഥ് സജീവ് മുങ്ങി മരിച്ചതെന്ന് ഗള്ഫ് ഡെയ്ലി ന്യൂസ് റിപ്പോര്ട്ട് ചെയ്യുന്നു. ഒരു ജന്മദിന പാര്ട്ടിയില് പങ്കെടുക്കാന് വേണ്ടിയാണ് സുഹൃത്തുക്കള്ക്കൊപ്പം അദ്ദേഹം ഇവിടെയെത്തിയത്. നിരവധിപ്പേര് പങ്കെടുത്തിരുന്ന പാര്ട്ടിയില് നിന്ന് പുലര്ച്ചെ രണ്ട് മണിയോടെ ഒട്ടുമിക്ക ആളുകളും മടങ്ങിപ്പോയി. എന്നാല് സിദ്ദാര്ത്ഥും ഏതാനും സുഹൃത്തുക്കളും ഈ സമയം സ്വിമ്മിങ് പൂളില് നീന്താനായി പോവുകയായിരുന്നു. 2.30ഓടെ ഒപ്പമുണ്ടായിരുന്നവര് കാറിലേക്ക് തിരിച്ച് പോയപ്പോഴാണ് സിദ്ദാര്ത്ഥിനെ കാണാനില്ലെന്ന് മനസിലായത്. സുഹൃത്തുക്കള് തിരികെ വന്ന് നോക്കിയ്യപോള് പൂളിന്റെ അടിത്തട്ടില് ചലനമറ്റ നിലയില് അദ്ദേഹത്തെ കണ്ടെത്തുകയായിരുന്നു. ഉടന് തന്നെ ആംബുലന്സ് സഹായം തേടി. റിഫ ആശുപത്രിയിലെത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.