ഈ വർഷത്തെ ഹജ്ജ് കർമങ്ങൾക്കായി എട്ടുലക്ഷത്തിലധികം തീർത്ഥാടകർ സൗദി അറേബ്യയിൽ എത്തിച്ചേർന്നു. 126 രാജ്യങ്ങളിൽ നിന്നുള്ളവർക്ക് ഇടനിലക്കാരില്ലാതെ സേവനങ്ങൾ ബുക്ക് ചെയ്യാൻ ‘നുസ്ക്’ സ്മാർട്ട് കാർഡുകളും പ്ലാറ്റ്ഫോമും ഇത്തവണ നിർബന്ധമാക്കിയിട്ടുണ്ട്.
റിയാദ്: ഈ വർഷത്തെ ഹജ്ജ് കർമങ്ങൾക്കായി ഇതുവരെ എട്ടുലക്ഷത്തി അറുപതിനായിരത്തിലധികം (860,000+) തീർത്ഥാടകർ വിശുദ്ധ മണ്ണിലെത്തിയതോടെ പുണ്യഭൂമി ഭക്തിനിർഭരമായി. ആകെ 15 ലക്ഷത്തിലധികം ഹാജിമാരെ സ്വീകരിക്കാനാണ് സൗദി അറേബ്യ ലക്ഷ്യമിടുന്നത്. എത്തിയവരിൽ ഭൂരിഭാഗവും (8,20,000 പേർ) വിമാനമാർഗമാണ് എത്തിയത്. 126 രാജ്യങ്ങളിൽ നിന്നുള്ളവർക്ക് ഇടനിലക്കാരില്ലാതെ സേവനങ്ങൾ ബുക്ക് ചെയ്യാൻ ‘നുസ്ക്’ സ്മാർട്ട് കാർഡുകളും പ്ലാറ്റ്ഫോമും ഇത്തവണ നിർബന്ധമാക്കിയിട്ടുണ്ട്. 'മക്ക റൂട്ട്' പദ്ധതി വഴി 12 ലക്ഷത്തിലധികം ആളുകൾക്ക് വിമാനത്താവളങ്ങളിലെ നടപടിക്രമങ്ങൾ 15 മിനിറ്റുകൊണ്ട് പൂർത്തിയാക്കാൻ സാധിക്കുന്നു എന്നത് ഈ വർഷത്തെ വലിയ നേട്ടമാണ്.
തീർത്ഥാടകരുടെ യാത്ര സുഗമമാക്കാൻ ‘ഹജ്ജ് വിത്തൗട്ട് ബാഗ്’ (ബാഗേജ് രഹിത യാത്ര) പദ്ധതി ഇത്തവണ എല്ലാ വിദേശികൾക്കുമായി വ്യാപിപ്പിച്ചു. ഇതുവഴി ലഗേജുകളും സംസം വെള്ളവും നേരിട്ട് താമസസ്ഥലങ്ങളിൽ എത്തും. ഗതാഗതത്തിനായി 33,000 ബസുകളും 5,000 ടാക്സികളും സജ്ജമാണ്. കൂടാതെ, തിരക്ക് നിയന്ത്രിക്കാൻ മണിക്കൂറിൽ 72,000 യാത്രക്കാരെ വഹിക്കാൻ ശേഷിയുള്ള മാഷാഇർ മെട്രോ രണ്ടായിരത്തിലധികം സർവീസുകൾ നടത്തും. പുണ്യനഗരങ്ങളിൽ നൂറു ശതമാനം 5G കവറേജ് ഉറപ്പാക്കിയതിനൊപ്പം ഡിജിറ്റൽ സേവനങ്ങൾക്കായി 2,400 സാങ്കേതിക വിദഗ്ധരെയും നിയോഗിച്ചിട്ടുണ്ട്.
ആരോഗ്യ മേഖലയിൽ സമാനതകളില്ലാത്ത മുൻകരുതലുകളാണ് ഒരുക്കിയിരിക്കുന്നത്. മക്കയിലും മദീനയിലുമായി 20,000 കിടക്കകളുള്ള ആശുപത്രി സൗകര്യങ്ങളും പുണ്യസ്ഥലങ്ങളിൽ മാത്രം 3,800 കിടക്കകളും സജ്ജമാണ്. 25,000 ആരോഗ്യ പ്രവർത്തകർ, 900 ആംബുലൻസുകൾ, 11 എയർ ഇവാക്യുവേഷൻ വിമാനങ്ങൾ എന്നിവ സേവനത്തിനുണ്ടാകും. മെഡിക്കൽ സാമ്പിളുകൾ എത്തിക്കാൻ ഡ്രോണുകളും രോഗികളെ നിരീക്ഷിക്കാൻ സ്മാർട്ട് സെൻസറുകളും ‘സെഹ വെർച്വൽ ഹോസ്പിറ്റൽ’ സേവനവും ഇത്തവണത്തെ പ്രത്യേകതയാണ്.
Related Articles
കഠിനമായ ചൂട് നേരിടാൻ വിപുലമായ സജ്ജീകരണങ്ങളാണ് മന്ത്രാലയം ഒരുക്കിയിട്ടുള്ളത്. അറഫയിലെ ജബൽ അൽ റഹ്മക്ക് ചുറ്റും ചൂട് കുറയ്ക്കാനുള്ള പ്രത്യേക സംവിധാനങ്ങൾ, റോഡുകൾ തണുപ്പിക്കുന്ന ‘കൂളിങ് ടെക്നോളജി’, ആറായിരത്തിലധികം വാട്ടർ മിസ്റ്റ് സ്പ്രേ പോസ്റ്റുകൾ, 60,000 മരങ്ങൾ എന്നിവ ഇതിന്റെ ഭാഗമാണ്. മിനയിൽ 24,000 ചതുരശ്ര മീറ്ററിൽ പുതിയ കൂടാരങ്ങളും സജ്ജമാക്കി. ശുചിത്വ പരിപാലനത്തിനായി 88,000 ക്ലീനിംഗ് യൂണിറ്റുകളും 22,000 ജീവനക്കാരും 24 മണിക്കൂറും പ്രവർത്തിക്കുന്നു. ഹറം പള്ളിയുടെ മൂന്നാം വിപുലീകരണ ഭാഗം പൂർണ്ണമായി സജ്ജമായതോടെ തീർത്ഥാടകർക്ക് ഏറ്റവും സുഖകരവും സുരക്ഷിതവുമായ ഹജ്ജ് അനുഭവമായിരിക്കും ഇത്തവണ ലഭിക്കുക.
