ഇവിടെ മഞ്ഞിന്റെ നിറം പിങ്ക്, ശുഭസൂചനയല്ല, ലോകത്തെ അത്ഭുതപ്പെടുത്തുന്ന മാറ്റം ഇങ്ങനെ
വസന്തകാലത്തും വേനല്‍ക്കാലത്തും ആല്‍പ്‌സില്‍ ഇതു സാധാരണമായി കാണാറുണ്ടെങ്കിലും ഈ വര്‍ഷമാണ് ഇത് കൂടുതല്‍ പടര്‍ന്നത്. നീലക്കുറിഞ്ഞി പൂവിട്ടു നില്‍ക്കുന്നതു പോലെ, വലിയ ഹിമപടലങ്ങള്‍ക്ക് മീതേ പിങ്ക് നിറം പടര്‍ന്നിരിക്കുന്നതു കാണാന്‍ കോവിഡ് കാലത്ത് സന്ദര്‍ശകര്‍ എത്തുന്നുണ്ട്.
റോം: ഇത്തവണ ആ കാഴ്ച കാണാനെത്തിയവര്‍ ഞെട്ടി. മഞ്ഞിന്റെ തൂവെള്ള നിറത്തിനു പകരം നല്ല പിങ്ക് നിറം. എന്താണ് സംഭവിക്കുന്നതെന്ന ശാസ്ത്രലോകത്തിന്‍റെ അന്വേഷണം പൂര്‍ണ്ണമാകുന്നതിനു മുന്‍പേ ഒരു കാര്യം വ്യക്തമായി. ഈ നിറംമാറ്റം മാനവരാശിക്ക് നല്‍കുന്നത് അത്ര ശുഭസൂചനയല്ല.
ആല്‍ഗകള്‍ കാരണമാണ് ഇറ്റലിയിലെ ഈ ഹിമ പാളികള്‍ പിങ്ക് നിറമായതെന്നാണ് ഭൗമശാസ്ത്രജ്ഞരുടെ അഭിപ്രായം. ഇത് ഐസ് വേഗത്തില്‍ ഉരുകാന്‍ കാരണമാകുമെന്ന് പ്രതിഭാസത്തെക്കുറിച്ച് പഠിക്കുന്ന ഒരു ശാസ്ത്രജ്ഞന്‍ പറയുന്നു. വടക്കന്‍ ഇറ്റലിയിലെ പ്രെസേന ഹിമാനിയില്‍ പിങ്ക് മഞ്ഞ് വീണതായി ഇറ്റലിയിലെ ദേശീയ ഗവേഷണ കൗണ്‍സിലിലെ ഇന്‍സ്റ്റിറ്റിയൂട്ട് ഓഫ് പോളാര്‍ സയന്‍സസിലെ ഗവേഷകന്‍ ബിയാജിയോ ഡിമൗറോയാണ് വെളിപ്പെടുത്തിയത്.
വസന്തകാലത്തും വേനല്‍ക്കാലത്തും ആല്‍പ്‌സില്‍ ഇതു സാധാരണമായി കാണാറുണ്ടെങ്കിലും ഈ വര്‍ഷമാണ് ഇത് കൂടുതല്‍ പടര്‍ന്നത്. നീലക്കുറിഞ്ഞി പൂവിട്ടു നില്‍ക്കുന്നതു പോലെ, വലിയ ഹിമപടലങ്ങള്‍ക്ക് മീതേ പിങ്ക് നിറം പടര്‍ന്നിരിക്കുന്നതു കാണാന്‍ കോവിഡ് കാലത്ത് സന്ദര്‍ശകര്‍ എത്തുന്നുണ്ട്.
ഈ നിറവ്യത്യാസത്തിന് ക്ലമൈഡോമോണസ് നിവാലിസ് എന്ന ആല്‍ഗ കാരണമാണെന്ന് ബിയാജിയോ ഡിമൗറോ വിശ്വസിക്കുന്നു. ഈ വസന്തകാലത്തും വേനല്‍ക്കാലത്തും കുറഞ്ഞ മഞ്ഞുവീഴ്ചയും ഉയര്‍ന്ന അന്തരീക്ഷ താപനിലയും കണ്ടുവെന്ന് ഡിമൗറോ പറഞ്ഞു: 'ഇത് ആല്‍ഗകള്‍ക്ക് വളരാന്‍ അനുയോജ്യമായ അന്തരീക്ഷം സൃഷ്ടിക്കുന്നു.' ഇരുണ്ട മഞ്ഞ് കൂടുതല്‍ ഊര്‍ജ്ജം ആഗിരണം ചെയ്യുന്നതിനാല്‍ ഈ ആല്‍ഗ പൂക്കള്‍ ഹിമാനിയുടെ ആരോഗ്യത്തിന് ഒരു മോശം വാര്‍ത്തയാണ്, അതായത് അത് വേഗത്തില്‍ ഉരുകുന്നു' , ഡിമൗറോ പറഞ്ഞു.
ആല്‍ഗകളുടെ സാന്ദ്രത പരിഹരിക്കുന്നതിനും സാറ്റലൈറ്റ് ഡാറ്റ ഉപയോഗിച്ച് ഇതു മാപ്പ് ചെയ്യുന്നതിനും കൂടുതല്‍ വിശദമായി പഠിക്കാന്‍ ഉദ്ദേശിക്കുന്നതായി ഡിമൗറോ പറഞ്ഞു. മുമ്പ് സ്വിറ്റ്‌സര്‍ലന്‍ഡിലെ മോര്‍ട്ടെറാച്ച് ഹിമാനിയെക്കുറിച്ച് അദ്ദേഹം പഠിച്ചിട്ടുണ്ട്, അവിടെ ആന്‍സിലോനെമ നോര്‍ഡെന്‍സ്‌കിയോല്‍ഡി എന്ന ആല്‍ഗയാണ് ഐസ് പര്‍പ്പിള്‍ ഉണ്ടാക്കിയതെന്ന് അദ്ദേഹം കണ്ടെത്തിയിരുന്നു. തെക്കുപടിഞ്ഞാറന്‍ ഗ്രീന്‍ലാന്‍ഡിലും ആന്‍ഡീസ്, ഹിമാലയം എന്നിവിടങ്ങളിലും ഈ ആല്‍ഗ കണ്ടെത്തിയിട്ടുണ്ട്. കാലാവസ്ഥാ വ്യതിയാനത്തിന്റെ ഫലമായി ലോകമെമ്പാടുമുള്ള ഹിമാനികള്‍ ഉരുകുകയാണ്.
കഴിഞ്ഞ അഞ്ച് വര്‍ഷത്തിനിടയില്‍ സ്വിറ്റ്‌സര്‍ലന്‍ഡിലെ ഹിമാനികള്‍ 10% കുറഞ്ഞുവെന്ന് 2019 ഒക്ടോബറില്‍ ഗവേഷണം വെളിപ്പെടുത്തി, ഒരു നൂറ്റാണ്ടിലേറെ നീണ്ട നിരീക്ഷണങ്ങളില്‍ മുമ്പ് കണ്ടിട്ടില്ലാത്ത നിരക്കിലാണ് ഇതിന്റെ വളര്‍ച്ച. അന്റാര്‍ട്ടിക്കയില്‍, ഭീമന്‍ ഡെന്‍മാന്‍ ഗ്ലേസിയര്‍ കഴിഞ്ഞ 22 വര്‍ഷത്തിനിടെ ഏകദേശം മൂന്ന് മൈല്‍ പിന്നോട്ട് പോയതായി മാര്‍ച്ചില്‍ പ്രസിദ്ധീകരിച്ച ഗവേഷണത്തില്‍ പറയുന്നു. ഇത് പൂര്‍ണ്ണമായും ഉരുകിയാല്‍ സമുദ്രനിരപ്പ് ഏകദേശം അഞ്ചടി ഉയരുമെന്ന് ഗവേഷകര്‍ പറഞ്ഞു.
