'നറുമുഗൈ' പാക്കപ്പായി, ബിഗ് ബോസിന്റെ പേരിൽ വേദനിപ്പിച്ചവർക്ക് മുന്നിൽ ഞാൻ വിജയിച്ചു': സൂര്യ മേനോൻ

'നറുമുഗൈ' എന്നാണ് ചിത്രത്തിന് പേര് നൽകിയിരിക്കുന്നത്.

soorya j menon

കലാരംഗത്ത് വർഷങ്ങളായി ഉണ്ടായിരുന്നെങ്കിലും സൂര്യ ജെ മേനോന്‍ കൂടുതല്‍ ശ്രദ്ധിക്കപ്പെടുന്നത് ബിഗ് ബോസ് മലയാളം സീസണ്‍ 3യില്‍ മത്സരാർത്ഥിയായി എത്തിയപ്പോഴാണ്. തന്റേതായ രീതിയില്‍ മികച്ച രീതിയില്‍ മത്സരിച്ച് മുന്നേറിയ താരത്തിന് ആരാധകരും ഒപ്പം തന്നെ നിരവധി വിമർശകരും ഉണ്ടായിരുന്നു. ഷോയിലെ മത്സരാർത്ഥിയായിരുന്ന മണിക്കുട്ടനോട് തന്റെ പ്രണയം തുറന്ന് പറഞ്ഞതിന് പിന്നാലെയായിരുന്നു സൂര്യക്കെതിരെ വിമർശനങ്ങൾ ശക്തമായത്. ബിഗ് ബോസിന് ശേഷം മോഡലിംഗിലടക്കമുള്ള മേഖലകളില്‍ സജീവമായി തുടരുകയാണ് സൂര്യ. താൻ ഒരു എഴുതി അഭിനയിക്കുന്ന ഒരു സിനിമ വരുന്നുവെന്ന് 2021ൽ സൂര്യ അറിയിച്ചിരുന്നു. എന്നാൽ പല കാരണങ്ങളാലും അത് നടക്കാതെ പോയി. ഒടുവിൽ ചിത്രത്തിന് പാക്കപ്പ് ആയെന്ന് അറിയിച്ചിരിക്കുക ആണ് സൂര്യ.

'നറുമുഗൈ' എന്നാണ് ചിത്രത്തിന് പേര് നൽകിയിരിക്കുന്നത്. ഇന്‍സ്റ്റാഗ്രാമിലൂടെ ആണ് സൂര്യ ഇക്കാര്യം അറിയിച്ചത്. സിനിമയുമായി മുന്നോട്ടു പോയപ്പോള്‍ തനിക്ക് നേരിട്ട പ്രശ്‌നങ്ങളെ കുറിച്ചും പരിഹാസങ്ങളെ കുറിച്ചും സൂര്യ തുറിച്ച് പറയുന്നുണ്ട്. ഈ പടം വിജയം ആയാലും പരാജയം ആയാലും, ബിഗ് ബോസിന്റെ പേരിൽ തന്നെ വേദനിപ്പിച്ച എല്ലാവരുടെയും മുമ്പിൽ സിനിമ നടന്നപ്പോൾ തന്നെ താൻ വിജയിച്ചു കഴിഞ്ഞുവെന്ന് സൂര്യ പറയുന്നു. 

സൂര്യയുടെ വാക്കുകൾ

2021 -ൽ തുടങ്ങിയ എന്റെ സ്വപ്നം ആയിരുന്നു ഞാൻ എഴുതി അഭിനയിക്കുന്ന നറുമുഗൈ എന്ന സിനിമ.ബിഗ്ഗ്‌ബോസ് ഒരു ഗെയിം ഷോ ആണെന്ന് പോലും ഓർക്കാതെ എന്റെ ജീവിതത്തിലും കരിയറിലും കൊറേ പേർ വന്നു പൂണ്ടു വിളയാടിയിട്ട് പോയി. അവർ അറിഞ്ഞിരുന്നില്ല എന്റെ സ്വപ്നങ്ങളെ ആണ് അവർ തകർത്തെറിഞ്ഞത് എന്ന് .പടം ചെയ്യാൻ തയ്യാറായി വന്ന പ്രൊഡ്യൂസർ ചേച്ചിയെ പോലും അവർ വെറുതെ വിട്ടില്ല .സൈബർ അറ്റാക്കിന്റെ മൂർദ്ധന്യാവസ്‌ഥയിൽ ഞാൻ ചേച്ചിയോട് പറഞ്ഞു ഈ പടം ചേച്ചി ചെയ്യണ്ട ,ചേച്ചിക്ക് എങ്കിലും മനസമാധാനം കിട്ടണം എന്ന് .പല രാത്രികളിലും എന്റെ സ്വപ്നങ്ങളെ ഓർത്തു ഞാൻ കരഞ്ഞു ഉറങ്ങിയിട്ടുണ്ട് .പക്ഷെ എന്റെ സ്വപ്നത്തെ വിട്ടു കൊടുക്കാൻ ഞാൻ തയ്യാറായിരുന്നില്ല .പരിശ്രമിച്ചു കൊണ്ടേ ഇരുന്നു.പടം നടക്കാത്തതിന്റെ എന്റെ YouTube ലും ഇൻസ്റ്റയിലും പരിഹാസ കമന്റ്സ് വന്നു കൊണ്ടേ ഇരുന്നു. എല്ലാം സഹിച്ചും ക്ഷമിച്ചും എന്റെ സ്വപ്നത്തിനായി ഞാൻ പൊരുതി കൊണ്ടേ ഇരുന്നു .ഇന്ന് എന്റെ പടത്തിന്റെ പാക്ക് അപ്പ് ഡേ ആണ് .എൻറെ സ്വപ്നം സർവേശ്വരൻ നടത്തി തന്നു . എന്നെ സ്നേഹിച്ചു ബിഗ്ഗ്‌ബോസ് മുതൽ എന്റെ കൂടെ നിന്ന എല്ലാർക്കും ഞാൻ ഹൃദയം നിറഞ്ഞ നന്ദി പറയുന്നു .നമ്മുടെ മനസ്സിൽ നന്മ ഉണ്ടെങ്കിൽ ദൈവാനുഗ്രഹം നമ്മുടെ കൂടെ ഉണ്ടാകും. സ്വപ്‌നങ്ങൾ അത് കാണാൻ മാത്രം ഉള്ളതല്ല ,അത് നേടാൻ ഉള്ളതാണ്. ഈ പടം വിജയം ആയാലും പരാജയം ആയാലും ഈ പടം നടന്നപ്പോൾ തന്നെ ഞാൻ വിജയിച്ചു കഴിഞ്ഞു ബിഗ്ഗ്‌ബോസിന്റെ പേരിൽ എന്നെ വേദനിപ്പിച്ച എല്ലാവരുടെയും മുമ്പിൽ.