കൊളംബോ: ശ്രീലങ്കയ്ക്കെതിരായ കന്നി ടെസ്റ്റില് സെഞ്ച്വറി നേടി ഇന്ത്യന് ക്രിക്കറ്റിലെ പുതിയ താരോദയമായി മാറിയ ഹാര്ദിക് പാണ്ഡ്യ, അച്ഛന് ഹിമാന്ഷു പാണ്ഡ്യക്ക് നല്കിയത് സർപ്രൈസ് സമ്മാനം. ഹർദിക് പാണ്ഡ്യയും സഹോദരനും മുംബൈ ഇന്ത്യൻസ് താരവുമായ ക്രുനാൽ പാണ്ഡ്യയും ചേർന്ന് ഒരു ചുവന്ന ജീപ്പ് കോംപസ് കാര് ആണ് പിതാവിന് അപ്രതീക്ഷിത സമ്മാനമായി നൽകിയത്.
മക്കളുടെ ക്രിക്കറ്റ് ഭാവിക്ക് വേണ്ടി ജീവിതം തന്നെ ഉഴിഞ്ഞവെച്ചയാളാണ് ഹിമാന്ഷു പാണ്ഡ്യ. മകന് നല്കിയ സമ്മാനത്തിന്റെ സന്തോഷത്തില് കണ്ണുനിറഞ്ഞു നില്ക്കുന്ന പിതാവിന്റെ ദൃശ്യങ്ങള് പാണ്ഡ്യ തന്നെയാണ് ട്വിറ്ററില് പോസ്റ്റ് ചെയ്തത്. ഒപ്പം ഒരു കുറിപ്പും.
'അച്ഛന്റെ മുഖം ഇങ്ങനെ തെളിഞ്ഞു കാണുന്നതില് ഒരുപാട് സന്തോഷമുണ്ട്. ജീവിതത്തില് എല്ലാ സന്തോഷവും അദ്ദേഹത്തിനുള്ളതാണ്. എല്ലാറ്റിന്റെയും ക്രെഡിറ്റും അദ്ദേഹത്തിന് തന്നെ.' എനിക്കും ചേട്ടന് ക്രുനാല് പാണ്ഡ്യയ്ക്കും വേണ്ടി സ്വന്തമായതെല്ലാം ഉപേക്ഷിച്ചയാളാണ് പിതാവ് ഹിമാന്ഷുവെന്നും പാണ്ഡ്യ ട്വിറ്ററില് കുറിച്ചു.
So glad to see his face lit up like that❤this is the guy who should get all the happiness in life and deserves all the credit, my dad! pic.twitter.com/G55mBHpraw
— hardik pandya (@hardikpandya7) August 16, 2017
വിഡിയോ കോളിലൂടെയാണ് സർപ്രൈസ് സമ്മാനത്തിന്റെ സന്തോഷം അച്ഛനുമായി പങ്കുവച്ചത്. ശ്രീലങ്കയ്ക്കെതിരായ മൂന്നാം ക്രിക്കറ്റ് ടെസ്റ്റിൽ സെഞ്ചുറി നേടിയ ഹാർദിക് പാണ്ഡ്യ, കളിയിലെ കേമനായും തിരഞ്ഞെടുക്കപ്പെട്ടിരുന്നു.
