ജിയോയും എയര്ടെല്ലും വിയും നേരത്തെ തന്നെ അവതരിപ്പിച്ച വോയ്സ് ഓവർ വൈ-ഫൈ സേവനം ബിഎസ്എൻഎല്ലും രാജ്യത്ത് കൊണ്ടുവന്നു. എന്താണ് VoWiFi സേവനത്തിന്റെ പ്രത്യേകതകള് എന്ന് വിശദമായി.
ദില്ലി: ഇന്ത്യയില് പുതിയ സർക്കിളുകളിലെ ഉപയോക്താക്കൾക്കായി ഭാരത് സഞ്ചാർ നിഗം ലിമിറ്റഡ് (ബിഎസ്എൻഎൽ) വോയ്സ് ഓവർ വൈ-ഫൈ (VoWiFi) സേവനം അവതരിപ്പിച്ചു. സെല്ലുലാർ കവറേജ് ഇല്ലാത്തപ്പോഴും ഉപഭോക്താക്കൾക്ക് വൈ-ഫൈ നെറ്റ്വർക്കിലൂടെ വോയ്സ് കോളുകൾ വിളിക്കാനും സ്വീകരിക്കാനും അനുവദിക്കുന്നതാണ് വോയ്സ് ഓവർ വൈ-ഫൈ (VoWiFi) സേവനം. ജിയോ, എയർടെൽ തുടങ്ങിയ സ്വകാര്യ ടെലികോം ഓപ്പറേറ്റർമാർ വളരെക്കാലമായി വോയ്സ് വൈഫൈ ആക്സസ് വാഗ്ദാനം ചെയ്യുന്നുണ്ട്. ഇപ്പോൾ പൊതുമേഖലാ സ്ഥാപനമായ ബിഎസ്എൻഎല്ലും ഈ സംവിധാനം അവതരിപ്പിക്കുന്നു എന്നതാണ് പ്രത്യേകത.
എന്താണ് വോയ്സ് ഓവർ വൈ-ഫൈ?
ഒക്ടോബര് 2-ന് നടന്ന രജത ജൂബിലി ആഘോഷങ്ങളുടെ ഭാഗമായി, ഡിഒടി സെക്രട്ടറി നീരജ് മിത്തൽ വെസ്റ്റ്, സൗത്ത് സോൺ സർക്കിളുകളിൽ ബിഎസ്എൻഎല്ലിന്റെ വോവൈ-ഫൈ സേവനങ്ങളുടെ സോഫ്റ്റ് ലോഞ്ച് പ്രഖ്യാപിച്ചു. ഇതോടൊപ്പം, ബിഎസ്എൻഎൽ മുംബൈയിൽ 4 ജി സേവനങ്ങൾ ആരംഭിക്കുകയും ഇന്ത്യയിലുടനീളം ഇ-സിം സേവനങ്ങൾ വ്യാപിപ്പിക്കുകയും ചെയ്തു.
ബിഎസ്എൻഎല്ലിന്റെ ഡിജിറ്റൽ വികാസത്തിലെ ഒരു സുപ്രധാന ചുവടുവയ്പ്പാണ് പുതിയ പ്രഖ്യാപനങ്ങൾ. വൈ-ഫൈ കോളിംഗ് സൗകര്യം ഉപയോഗിച്ച് ബിഎസ്എൻഎൽ ഉപയോക്താക്കൾക്ക് സെല്ലുലാർ റിസപ്ഷൻ കുറവുള്ള പ്രദേശങ്ങളിൽ പോലും പതിവായി വോയ്സ് കോളുകൾ ചെയ്യാൻ കഴിയുന്നു. മൊബൈൽ സിഗ്നൽ ദുർബലമാകുമ്പോൾ കോളുകൾ റൂട്ട് ചെയ്യുന്നതിന് ഓട്ടോമാറ്റിക്കായി വൈ-ഫൈയിലേക്ക് മാറുന്നതാണ് ഈ സാങ്കേതികവിദ്യ. ഭാരതി എയർടെൽ, റിലയൻസ് ജിയോ, വോഡഫോൺ ഐഡിയ (വി) തുടങ്ങിയ പ്രമുഖ ടെലികോം ഓപ്പറേറ്റർമാർ കഴിഞ്ഞ കുറച്ച് വർഷങ്ങളായി വൈ-ഫൈ കോളിംഗ് പിന്തുണ വാഗ്ദാനം ചെയ്യുന്നുണ്ട്. ഇതിന് സാധാരണയായി അധിക ചെലവൊന്നുമില്ല.
Related Articles
ഒരുപിടി പുത്തന് സേവനങ്ങളുമായി ബിഎസ്എന്എല്
സമീപകാലത്തായി വൻ നവീകരണത്തിന്റെ പാതയിലാണ് ബിഎസ്എൻഎൽ. കമ്പനി അടുത്തിടെ തമിഴ്നാട് സർക്കിളിൽ ഇ-സിം സേവനങ്ങൾ നൽകാൻ തുടങ്ങിയിരുന്നു. ടാറ്റ കമ്മ്യൂണിക്കേഷൻസുമായി കൈകോർത്താണ് ബിഎസ്എൻഎൽ ഇ-സിം സേവനങ്ങൾ നല്കുന്നത്. ടാറ്റ കമ്മ്യൂണിക്കേഷൻസിന്റെ 'മൂവ്' പ്ലാറ്റ്ഫോമാണ് ഇ-സിം സേവനങ്ങൾ എത്തിക്കുന്നത്. ഓഗസ്റ്റിൽ ബിഎസ്എൻഎൽ ദില്ലിയിൽ 4ജി നെറ്റ്വർക്ക് ആരംഭിച്ചു. 1.65 ലക്ഷം പോസ്റ്റ് ഓഫീസുകൾ വഴി ബിഎസ്എൻഎൽ സിം കാർഡ് വിൽപ്പനയും മൊബൈൽ റീചാർജ് സേവനങ്ങളും ആരംഭിക്കുന്നതിനായി ടെലികോം കമ്പനി ഈ മാസം ആദ്യം തപാൽ വകുപ്പുമായി (ഡിഒപി) ഒരു ധാരണാപത്രത്തിൽ ഒപ്പുവച്ചു. അടുത്തിടെ ഒഡിഷയിലെ ജാർസുഗുഡയിൽ പ്രധാനമന്ത്രി നരേന്ദ്ര മോദി ബിഎസ്എൻഎല്ലിന്റെ പൂർണ്ണമായും തദ്ദേശീയമായ 4ജി നെറ്റ്വർക്ക് ഉദ്ഘാടനം ചെയ്തിരുന്നു.
