Bobcats : ഈ ഫോട്ടോയില്‍ രണ്ട് കാട്ടുപൂച്ചകളെ കണ്ടെത്താമോ?
ഇതിലെവിടെയെങ്കിലും രണ്ട് കാട്ടുപൂച്ചകളെ കാണുന്നുണ്ടോ?
മഞ്ഞില്‍ പുതഞ്ഞുകിടക്കുന്ന ഒരു വനം. നട്ടുച്ചയ്ക്കും ഇരുട്ടു നിറയുന്ന അതിന്റെ ഉള്ളറയിലെ ചെറിയൊരു നദീതടം. അതില്‍ ചെറിയ പാറക്കല്ലുകള്‍. അതിനു ചുറ്റും ചെറു മരങ്ങള്‍. കുറുകെ വലിയൊരു മരം. മഞ്ഞ് നിറഞ്ഞ ഇരുണ്ട കാടകം.
ഇതായിരുന്നു ആ ഫോട്ടോ. എന്നിട്ട് ഒരു അടിക്കുറിപ്പും. ഇതിലെവിടെയെങ്കിലും രണ്ട് കാട്ടുപൂച്ചകളെ കാണുന്നുണ്ടോ?
അമേരിക്കയിലെ വിസ്‌കോണ്‍സിന്‍ നാച്വറല്‍ റിസോഴ്‌സസ് ഡിപ്പാര്‍ട്ട്‌മെന്റിന്റെ ഫേസ്ബുക്ക് പേജിലാണ് ഈ ഫോട്ടോയും അടിക്കുറിപ്പും പ്രത്യക്ഷപ്പെട്ടത്. ഈ ഫോട്ടോയില്‍ രണ്ട് കാട്ടുപൂച്ചകളെ കാണാമോ എന്ന ചോദ്യമാണ് ആ ഫേസ്ബുക്ക് പോസ്റ്റ് ഉയര്‍ത്തിയത്. ലിങ്കണ്‍ കൗണ്ടിയിലെ ഒരു വനത്തില്‍നിന്നുള്ളതാണ് ആ ഫോട്ടോയെന്നും പോസ്റ്റില്‍ പറയുന്നു.
പെട്ടെന്നു തന്നെ ആ പോസ്റ്റ് ശ്രദ്ധിക്കപ്പെട്ടു. ഇരുണ്ട ആ കാടിനുള്ളിലെ ചെറുനദിയോരത്ത് ഒരു കാട്ടുപൂച്ചയെ അനേകം കണ്ണുകള്‍ തിരഞ്ഞുചെന്നു. ഏറെ പണിപ്പെട്ട് അവരില്‍ ചിലര്‍ ഒരു കാട്ടുപൂച്ചയെ കണ്ടെത്തി. എന്നാല്‍ മറ്റേ കാട്ടുപൂച്ചയോ?
അതായി പിന്നെ ചോദ്യം. ഇളം നിറത്തിലുള്ള ആ കാട്ടുപൂച്ചയെ അതുപോലാരു പ്രകൃതിയില്‍നിന്നും കണ്ടെത്തുക ഒട്ടും എളുപ്പമല്ല. ചോദ്യവും അന്വേഷണവും ഉയര്‍ന്നതോടെ ചിലരൊക്കെ ആ പൂച്ചയെ കണ്ടെത്തി. അവരതിന്റെ സ്‌ക്രീന്‍ ഷോട്ട് ആ പോസ്റ്റിനു താഴെയിട്ടു. അതോടെ എളുപ്പമായി. ആ പൂച്ചകള്‍ ഇതാ ഇപ്പോള്‍ കണ്‍മുന്നില്‍.
സൂക്ഷിച്ചു നോക്കിയിട്ടും കാണാത്ത ആ പൂച്ചയെ ഇനി നിങ്ങള്‍ക്ക് കാണാം. ഇതാ ഇവിടെ അടയാളപ്പെടുത്തിയിട്ടുണ്ട് അവയെ.
കാട്ടിലെ കിടിലന്‍ ഇരപിടുത്തക്കാരാണ് ബോബ്കാറ്റുകള്‍ എന്നറിയപ്പെടുന്ന ഈ പൂച്ചകള്‍. മറഞ്ഞിരുന്ന് അപ്രതീക്ഷിതമായി ഇരയുടെ മേല്‍ ചാടിവീഴലാണ് അവയുടെ രീതി. ഈ ഫോട്ടോയിലും അതാണ് കാണുന്നത്. മഞ്ഞില്‍ തിരിച്ചറിയാനാവാത്ത രോമക്കുപ്പായവുമായി മറഞ്ഞിരിക്കുന്ന പൂച്ചകള്‍ ഒരു ഇരയെ കാത്തിരിക്കുകയാണ്.
