ഈ പഴഞ്ചൻ നാണയത്തിന് ലേലത്തിൽ കിട്ടിയത് 2.62 കോടി!
“ഈ അസാധാരണമായ നാണയത്തിന് കിട്ടിയ വിലയില്‍ ഞാന്‍ അത്ഭുതപ്പെടുന്നില്ല. ഉയര്‍ന്ന വില നാണയത്തിന്‍റെ അസാധാരണവും ചരിത്രപരവുമായ പ്രാധാന്യത്തെയും മികച്ച സംരക്ഷണ നിലയെയും പ്രതിഫലിപ്പിക്കുന്നു.''
കൊളോണിയൽ ന്യൂ ഇംഗ്ലണ്ടിൽ(Colonial New England) നിർമ്മിച്ച ഒരു അപൂർവ നാണയം അടുത്തിടെ ഒരു മിഠായി ടിന്നിൽ നിന്ന് കണ്ടെത്തി. പിന്നീട് ഇത് ലേലത്തിൽ 2.62 കോടി രൂപയ്ക്ക് വിറ്റു. ഇത് പ്രതീക്ഷിച്ചതിലും കൂടിയ തുകയാണ് എന്ന് ലേലക്കാര്‍ പറയുന്നു.
1652 -ൽ ബോസ്റ്റണി(Boston)ലാണ് ഈ ഒരു ഷില്ലിംഗ് വെള്ളി നാണയം(shilling silver) നിർമ്മിച്ചത്. ഇപ്പോഴും നിലനിൽക്കുന്ന അത്തരം ഏതാനും ഡസൻ നാണയങ്ങളുടെ ഏറ്റവും മികച്ച ഉദാഹരണമായി ഇത് കണക്കാക്കപ്പെടുന്നു. ഈ അപൂർവ നാണയം യുഎസിൽ നിന്നുള്ള ഒരു അജ്ഞാത ഓൺലൈൻ ബിഡ്ഡർക്ക് വിറ്റതായി ലണ്ടൻ ആസ്ഥാനമായുള്ള മോർട്ടൺ & ഈഡൻ ലിമിറ്റഡ് പ്രസ്താവനയിൽ പറഞ്ഞു.
2.2 കോടി രൂപ കിട്ടും എന്നാണ് ലേലക്കാര്‍ പ്രതീക്ഷിച്ചിരുന്നത്. കോയിൻ സ്പെഷ്യലിസ്റ്റ് ജെയിംസ് മോർട്ടൺ ഒരു പ്രസ്താവനയിൽ പറഞ്ഞു, “ഈ അസാധാരണമായ നാണയത്തിന് കിട്ടിയ വിലയില്‍ ഞാന്‍ അത്ഭുതപ്പെടുന്നില്ല. ഉയര്‍ന്ന വില നാണയത്തിന്‍റെ അസാധാരണവും ചരിത്രപരവുമായ പ്രാധാന്യത്തെയും മികച്ച സംരക്ഷണ നിലയെയും പ്രതിഫലിപ്പിക്കുന്നു.''
ഇംഗ്ലണ്ട്, നെതർലാൻഡ്സ്, സ്പാനിഷ് സാമ്രാജ്യം, മറ്റ് രാജ്യങ്ങൾ എന്നിവിടങ്ങളിൽ നിന്നുള്ള നാണയങ്ങൾ 1652 -ന് മുമ്പ് ന്യൂ ഇംഗ്ലണ്ടിൽ കറൻസിയായി ഉപയോഗിച്ചിരുന്നു. എന്നിരുന്നാലും, നാണയങ്ങളുടെ കുറവിനെത്തുടർന്ന്, മസാച്യുസെറ്റ്സ് ജനറൽ കോടതി ജോൺ ഹളിനെ ബോസ്റ്റൺ മിന്റ്മാസ്റ്ററായി നിയമിച്ചു, വടക്കേ അമേരിക്കയിലെ ആദ്യത്തെ വെള്ളി നാണയങ്ങൾ നിർമ്മിക്കുന്നതിനുള്ള ഉത്തരവാദിത്തം അദ്ദേഹത്തിനായിരുന്നു.
വളരെ ലളിതമായ ഈ നാണയത്തിന് ഒരു വശത്ത് ന്യൂ ഇംഗ്ലണ്ടിന്റെ ഇനീഷ്യലുകൾ NE ഉണ്ട്, മറുവശത്ത് ഒരു ഷില്ലിംഗിലെ 12 പെന്നികളെ പ്രതിനിധീകരിക്കുന്ന റോമൻ സംഖ്യാ XII ഉണ്ട്. വെന്റ്വർത്ത് വെന്റി ബ്യൂമോണ്ട് ആണ് ഈ നാണയം ലേലത്തിന് നൽകിയത്. അദ്ദേഹത്തിന്റെ പിതാവ് ഇംഗ്ലണ്ടിലെ തന്റെ കുടുംബത്തിന്റെ എസ്റ്റേറ്റിൽ നടത്തിയ പഠനത്തിൽ നൂറുകണക്കിന് പഴയ നാണയങ്ങൾ അടങ്ങിയ ഒരു മിഠായി ടിന്‍ അടുത്തിടെ കണ്ടെത്തുകയായിരുന്നു.
ന്യൂ ഇംഗ്ലണ്ടിലെ ആദ്യകാല കുടിയേറ്റക്കാരനായ വില്യം വെന്റ്‌വർത്തിന്റെ പിൻഗാമിയാണ് ബ്യൂമോണ്ട്. ഒരു പൂർവ്വികൻ കോളനികളിൽ നിന്ന് യുകെയിലേക്ക് നാണയം കൊണ്ടുവന്നതായി ബ്യൂമോണ്ട് ഊഹിച്ചു.
