പൂച്ചകളില്‍ 'മിക്കി ഇയര്‍' ശസ്ത്രക്രിയകള്‍ ട്രെന്‍ഡിംഗാകുന്നു; ചെയ്യരുതെന്ന് അപേക്ഷിച്ച് മൃഗ വിദഗ്ദര്‍ !

വളർത്തുമൃഗങ്ങളെ അതികഠിനമായ വേദനയിലേക്ക് തള്ളിവിടുന്ന ഇത്തരം കോസ്മെറ്റിക് സർജറികൾക്കെതിരെ നിരവധി മൃഗ വിദഗ്ധർ മുന്നറിയിപ്പുമായി രംഗത്തെത്തി. 

കുട്ടികൾക്കും മുതിർന്നവർക്കും ഒരു പോലെ പ്രിയപ്പെട്ട കാർട്ടൂൺ കഥാപാത്രമാണ് മിക്കി മൗസ്. ഉയർന്നുനിൽക്കുന്ന കൂർത്ത ചെവികളാണ് മിക്കി പൂച്ചയുടെ പ്രധാന ആകർഷണീയത. മിക്കി പൂച്ചയോടുള്ള ഇഷ്ടം മൂത്ത് ചൈനയിലെ പൂച്ച വളര്‍ത്തുകാര്‍ തങ്ങളുടെ വളർത്തുമൃഗങ്ങൾക്ക് "മിക്കി ഇയർ" കിട്ടുന്നതിനായി കോസ്മെറ്റിക് സർജറി നടത്തുന്ന പ്രവണത വർദ്ധിച്ചു വരികയാണെന്ന് റിപ്പോർട്ടുകൾ പറയുന്നു. വളർത്തുമൃഗങ്ങളെ അതികഠിനമായ വേദനയിലേക്ക് തള്ളിവിടുന്ന ഇത്തരം കോസ്മെറ്റിക് സർജറികൾക്കെതിരെ നിരവധി മൃഗ വിദഗ്ധർ മുന്നറിയിപ്പുമായി രംഗത്തെത്തിയിട്ടുണ്ടെന്നും സൗത്ത് ചൈന മോണിംഗ് പോസ്റ്റ് റിപ്പോർട്ട് ചെയ്യുന്നു. 

പ്ലാസ്റ്റിക് സർജറിയിലൂടെ പൂച്ചകളുടെ ചെവികളുടെ ആകൃതി മാറ്റാൻ ശ്രമിക്കുമ്പോൾ അവയ്ക്ക് സഹിക്കാൻ കഴിയുന്നതിലും അധികമായ വേദനയാണ് അനുഭവിക്കേണ്ടി വരുന്നതെന്നാണ് മൃഗ വിദഗ്ധർ പറയുന്നത്. ചൈനയിലെ നിരവധി പെറ്റ് ക്ലിനിക്കുകളിൽ "മിക്കി ഇയർ" പ്ലാസ്റ്റിക് സർജറി പ്രോത്സാഹിപ്പിക്കുന്ന വിധത്തിലുള്ള പരസ്യ ബോർഡുകൾ പ്രദർശിപ്പിച്ചിട്ടുള്ളതായതാണ് ചൈനീസ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്. ഉടമകളെ ആകർഷിക്കുന്നതിനായി പലരും വൻ ഓഫറുകളും വാഗ്ദാനം ചെയ്യുന്നു. 

പൂച്ചകൾക്കായുള്ള ഈ കോസ്മെറ്റിക് സർജറിക്ക് രണ്ടു ഭാഗങ്ങൾ ഉള്ളതായാണ് ബീജിംഗിലെ ലവിംഗ് കെയർ ഇന്‍റർനാഷണൽ പെറ്റ് മെഡിക്കൽ സെന്‍ററിലെ ഡീൻ ലിയു യുൻഡോംഗ് പറയുന്നത്. ആദ്യഘട്ടത്തിൽ പൂച്ചകളുടെ ചെവിയുടെ അഗ്രഭാഗം നീക്കം ചെയ്യുന്ന ശസ്ത്രക്രിയയാണ്. ഇതിന് അനസ്തെറ്റിക് ആവശ്യമാണ്. ഏകദേശം അരമണിക്കൂറോളം നീണ്ടുനിൽക്കുന്ന ശസ്ത്രക്രിയയാണ് ഇത്. രണ്ടാമത്തെ സ്റ്റൈലിംഗ് ഘട്ടത്തിൽ ചെവികൾ നിവർന്നുനിൽക്കാൻ പാകത്തിന് രൂപപ്പെടുത്തുന്നത് ഉൾപ്പെടുന്നു, ഇതിന് 20 മുതൽ 60 ദിവസം വരെ എടുക്കുന്നു.

നിലവിൽ ചൈനയിൽ ഈ ശസ്ത്രക്രിയയ്ക്ക് നിയമപരമായ നിയന്ത്രണങ്ങളൊന്നുമില്ല. എന്നാൽ ഇതൊരു ധാർമിക പ്രശ്നമായി കരുതി ഇതിന് നിയന്ത്രണം ഏർപ്പെടുത്തണമെന്നാണ് മൃഗ വിദഗ്ധർ ആവശ്യപ്പെടുന്നത്. വളർത്തുമൃഗങ്ങളിൽ ശസ്ത്രക്രിയയുടെ ഫലമായി ശാരീരിക വേദനയും മാനസിക പീഡനവും ഉണ്ടാകുന്നു, ഒപ്പം അനസ്തേഷ്യയുടെ അപകടസാധ്യതകളും ഉൾപ്പെടുന്നു, ഇത് മാനസിക ആഘാതത്തിനും ശാരീരിക പാർശ്വഫലങ്ങൾക്കും ഇടയാക്കുമെന്നും വിദഗ്ധർ ചൂണ്ടിക്കാട്ടുന്നു. ഈ നടപടിക്രമം വളർത്തുമൃഗങ്ങൾക്കിടയിൽ സ്വയം വികലമായ പെരുമാറ്റത്തിനും കാരണമാകുമെന്ന് ഷെൻഷെൻ ലിയാൻഹെ പെറ്റ് ഹോസ്പിറ്റലിലെ വെറ്ററിനറി ഡോക്ടർ ചെൻ യോങ് മുന്നറിയിപ്പ് നൽകുന്നു. മിക്കി ഇയര്‍ സര്‍ജറി വ്യാപകമായതിന് പിന്നാലെ സാമൂഹിക മാധ്യമങ്ങളിലും ഈ പ്രവണതയ്ക്കെതിരെ വലിയ വിമർശനമാണ് ഉയരുന്നത്.