ജീവനക്കാരുടെ ലാപ്‌ടോപ്പുകളിൽ എഐ ഉപയോഗം നിരീക്ഷിക്കാൻ സോഫ്റ്റ്‌വെയർ സ്ഥാപിച്ചിട്ടില്ലെന്ന് പ്രോട്ടോൺ വ്യക്തമാക്കി. ആരോപണങ്ങൾ നിഷേധിച്ച കമ്പനി തങ്ങളുടെ സുരക്ഷാ നയങ്ങളിലും എഐ ഉപയോഗത്തിലും കൂടുതൽ സുതാര്യത ഉറപ്പുവരുത്തുമെന്നും അറിയിച്ചു.
എഐ (ആർട്ടിഫിഷ്യൽ ഇന്റലിജൻസ്) ഉപയോഗം വർധിപ്പിക്കുന്നതുമായി ബന്ധപ്പെട്ട വിവാദങ്ങളിൽ വിശദീകരണവുമായി സ്വിസ് ടെക് കമ്പനിയായ പ്രോട്ടോൺ. ജീവനക്കാരുടെ ലാപ്‌ടോപ്പുകളിൽ എഐ ഉപയോഗം നിരീക്ഷിക്കാനുള്ള സോഫ്റ്റ്‌വെയർ സ്ഥാപിച്ചിട്ടില്ലെന്നും എഐ ഉപയോഗം വിലയിരുത്താൻ ജീവനക്കാരെ വീണ്ടും അഭിമുഖം ചെയ്യില്ലെന്നും കമ്പനി വ്യക്തമാക്കി. ഇത്തരം അഭിമുഖങ്ങളുടെ പേരിൽ ആരെയും പിരിച്ചുവിടില്ലെന്നും ഉറപ്പുനൽകി.
പ്രോട്ടോൺ മെയിൽ ഉൾപ്പെടെയുള്ള സ്വകാര്യതയ്ക്ക് പ്രാധാന്യം നൽകുന്ന സേവനങ്ങളിലൂടെ ശ്രദ്ധേയമായ കമ്പനിയാണ് പ്രോട്ടോൺ. സോഫ്റ്റ്‌വെയർ എൻജിനീയർമാരുടെ നിയമനം അവസാനിപ്പിച്ച് എഐ അധിഷ്ഠിത പ്രവർത്തനങ്ങൾക്ക് മുൻഗണന നൽകാൻ കമ്പനി ഒരുങ്ങുന്നതായുള്ള റിപ്പോർട്ടുകൾ നേരത്തെ പുറത്തുവന്നിരുന്നു. ജീവനക്കാരുടെ ലാപ്‌ടോപ്പുകളിൽ എഐ ഉപയോഗം നിരീക്ഷിക്കുന്ന സോഫ്റ്റ്‌വെയർ സ്ഥാപിച്ചതായും എഐ ഉപയോഗം വിലയിരുത്താൻ വീണ്ടും അഭിമുഖം നടത്താൻ പദ്ധതിയിട്ടതായും 404 മീഡിയ റിപ്പോർട്ട് ചെയ്തിരുന്നു.
ആരോപണങ്ങൾ നിഷേധിച്ച് പ്രോട്ടോൺ
ഒക്ടോബർ 31ന് എക്സിലൂടെ പുറത്തുവിട്ട പ്രസ്താവനയിലാണ് കമ്പനി ആരോപണങ്ങൾ നിഷേധിച്ചത്. ജീവനക്കാരുടെ ലാപ്‌ടോപ്പുകളിൽ എഐ ഉപയോഗിച്ച് തയ്യാറാക്കുന്ന കോഡിന്റെ അളവ് നിരീക്ഷിക്കുന്ന സോഫ്റ്റ്‌വെയർ സ്ഥാപിച്ചിട്ടില്ലെന്ന് പ്രോട്ടോൺ വ്യക്തമാക്കി. മൊബൈൽ ഡിവൈസ് മാനേജ്‌മെന്റ് (എംഡിഎം) സോഫ്റ്റ്‌വെയറിന്റെ പ്രവർത്തനത്തെക്കുറിച്ചുള്ള തെറ്റിദ്ധാരണയാണ് ഇത്തരം റിപ്പോർട്ടുകൾക്ക് പിന്നിലെന്നും കമ്പനി വിശദീകരിച്ചു.
Related Articles
സുരക്ഷാ നയങ്ങളിൽ കൂടുതൽ സുതാര്യത
എഐ ഉപയോഗം വർധിപ്പിക്കുമ്പോഴും ഉൽപ്പന്നങ്ങളുടെ സുരക്ഷയിൽ വിട്ടുവീഴ്ച ചെയ്യില്ലെന്ന് പ്രോട്ടോൺ അറിയിച്ചു. കഴിഞ്ഞ ഒരു വർഷത്തിനിടെ സുരക്ഷാ പരിശോധനകൾ കൂടുതൽ ശക്തമാക്കിയിട്ടുണ്ട്. കമ്പനിയുടെ ആഭ്യന്തര എഐ നയങ്ങൾ, കോഡ് പരിശോധനാ രീതികൾ, സുരക്ഷാ നടപടിക്രമങ്ങൾ എന്നിവയും പ്രസിദ്ധീകരിക്കും. നിലവിൽ കമ്പനിക്കുള്ളിൽ മാത്രം ഉപയോഗിക്കുന്ന എഐ അസിസ്റ്റന്റായ ലൂമോയുടെ കൂടുതൽ വികസിത പതിപ്പുകൾ ഉൾപ്പെടെയുള്ള ചില ടൂളുകൾ ഓപ്പൺ സോഴ്‌സായി പുറത്തിറക്കാനും പദ്ധതിയുണ്ട്. ജീവനക്കാർക്ക് എവിടെയൊക്കെ എഐ ഉപയോഗിക്കാം, ഏതൊക്കെ സാഹചര്യങ്ങളിൽ ഉപയോഗിക്കാൻ പാടില്ല തുടങ്ങിയ കാര്യങ്ങളും ഇതിലൂടെ വ്യക്തമാക്കും.
എൻജിനീയർമാരുടെ നിയമനത്തിൽ മാറ്റം
പ്രോട്ടോൺ സിഇഒ ആൻഡി യെൻ 2026 കമ്പനിയുടെ എൻജിനീയർമാരെ നിയമിക്കുന്ന അവസാന വർഷമായിരിക്കുമെന്ന് ജീവനക്കാരോട് പറഞ്ഞതായുള്ള റിപ്പോർട്ടുകൾ നേരത്തെ പുറത്തുവന്നിരുന്നു. അടുത്ത വർഷം മുതൽ എഐ ഉപയോഗിച്ച് ഉൽപ്പന്നങ്ങൾ വികസിപ്പിക്കാൻ കഴിവുള്ളവർക്കായിരിക്കും നിയമനത്തിൽ മുൻഗണനയെന്നും റിപ്പോർട്ടുകളുണ്ടായിരുന്നു. കമ്പനിയുടെ ചീഫ് ടെക്നോളജി ഓഫീസർ ബാർട്ട് ബട്‌ലർ, നിലവിൽ കമ്പനിയുടെ കോഡിന്റെ ഏകദേശം 90 ശതമാനവും എഐയാണ് തയ്യാറാക്കുന്നതെന്ന് പറഞ്ഞതായും റിപ്പോർട്ടിലുണ്ടായിരുന്നു. എന്നാൽ എൻജിനീയറിങ് പ്രവർത്തനങ്ങളിൽ എഐയ്ക്ക് കൂടുതൽ പ്രാധാന്യം നൽകാനുള്ള പദ്ധതിയിൽനിന്ന് കമ്പനി പിന്മാറിയിട്ടില്ല. ജീവനക്കാരുടെയും ഉപഭോക്താക്കളുടെയും ആശങ്കകൾ കൃത്യമായി പരിഹരിക്കാൻ കഴിയാത്തതിൽ ഖേദിക്കുന്നതായും പ്രോട്ടോൺ അറിയിച്ചു.
