ടാറ്റയും മഹീന്ദ്രയും വിയർക്കും! അതിശയിപ്പിക്കുന്ന വിലയും റേഞ്ചുമായി പുതിയ എംജി വിൻഡ്‌സർ പ്രോ

വലിയ ബാറ്ററി പായ്ക്കും നൂതന സവിശേഷതകളുമായി എംജി വിൻഡ്‌സർ ഇവി പ്രോ ഇന്ത്യൻ വിപണിയിൽ. 449 കിലോമീറ്റർ റേഞ്ചും V2V, V2L സൗകര്യങ്ങളും ലെവൽ-2 ADAS സുരക്ഷാ സവിശേഷതകളും ഈ കാറിനെ വേറിട്ടുനിർത്തുന്നു.

MG Windsor EV Pro

ജെഎസ്‍ഡബ്ല്യു എംജി മോട്ടോർ ഇന്ത്യ കഴിഞ്ഞ ദിവസമാണ് ഇന്ത്യൻ വിപണിയിൽ ഏറ്റവും കൂടുതൽ വിറ്റഴിക്കപ്പെടുന്ന ഇലക്ട്രിക് കാറായ എംജി വിൻഡ്‌സറിന്റെ പുതിയ അവതാരമായ 'എംജി വിൻഡ്‌സർ ഇവി പ്രോ' പുറത്തിറക്കിയത്. ആകർഷകമായ രൂപവും ശക്തമായ ഇലക്ട്രിക് മോട്ടോറും ഒപ്പം വലിയ ബാറ്ററി പായ്ക്കോടും കൂടി ഈ കാർ അവതരിപ്പിച്ചിരിക്കുന്നു. ഇതിനുപുറമെ, ഈ കാറിൽ ചില നൂതന സവിശേഷതകളും ഉൾപ്പെടുത്തിയിട്ടുണ്ട്. ഇതാ ടാറ്റയുടെയും മഹീന്ദ്രയുടെയുമൊക്കെ ഉറക്കം കെടുത്തുന്ന എംജി വിൻഡസ്‍ർ പ്രോയെക്കുറിച്ച് അറിയേണ്ടതെല്ലാം

റേഞ്ച്
പുതിയ എംജി വിൻഡ്‌സർ പ്രോയിലെ ഏറ്റവും വലിയ മാറ്റം ബാറ്ററിയുടെ രൂപത്തിലാണ്. 52.9kWh ശേഷിയുള്ള ലിഥിയം ഇരുമ്പ് ഫോസ്ഫേറ്റ് (LFP) ബാറ്ററി പായ്ക്കാണ് കമ്പനി ഈ കാറിൽ ഉപയോഗിച്ചിരിക്കുന്നത്. ഒറ്റ ചാർജിൽ 449 കിലോമീറ്റർ വരെ സഞ്ചരിക്കാൻ ഈ ബാറ്ററി സഹായിക്കുമെന്ന് കമ്പനി അവകാശപ്പെടുന്നു. സ്റ്റാൻഡേർഡ് വിൻഡ്‌സർ മോഡലിൽ, കമ്പനി 38kWh ബാറ്ററിയാണ് നൽകുന്നത്, ഇത് ഒറ്റ ചാർജിൽ 332 കിലോമീറ്റർ വരെ സഞ്ചരിക്കാൻ കഴിയും. 

പെർഫോമൻസ്
വിൻഡ്‌സർ പ്രോയിൽ കമ്പനി വലിയ ബാറ്ററി പായ്ക്ക് ഉപയോഗിച്ചിട്ടുണ്ടെങ്കിലും, അതിന്റെ പവറിലും ടോർക്കിലും മാറ്റമൊന്നുമില്ല. സ്റ്റാൻഡേർഡ് വേരിയന്റിനെപ്പോലെ, വിൻഡ്‌സർ പ്രോയുടെ ഇലക്ട്രിക് മോട്ടോർ 136 bhp പവറും 200 ന്യൂട്ടൺ മീറ്റർ (Nm) ടോർക്കും ഉത്പാദിപ്പിക്കുന്നു. മുൻ മോഡലിലെ പോലെ തന്നെ ഇതിന്റെ ഇലക്ട്രിക് മോട്ടോർ മുൻ ചക്രത്തിന് ശക്തി പകരുന്നു. 

ചാർജ്ജിംഗ് സമയം
7.4kWh ശേഷിയുള്ള എസി ചാർജർ ഉപയോഗിച്ച് ഈ കാറിന്റെ ബാറ്ററി 9.5 മണിക്കൂറിനുള്ളിൽ പൂർണ്ണമായും ചാർജ് ചെയ്യാൻ കഴിയുമെന്ന് എംജി മോട്ടോർ അവകാശപ്പെടുന്നു. ഇതിന്റെ ബാറ്ററി 60kW ഡിസി ഫാസ്റ്റ് ചാർജറിനെയും പിന്തുണയ്ക്കുന്നു. ഈ വലിയ ചാർജർ ഉപയോഗിച്ച് വെറും 50 മിനിറ്റിനുള്ളിൽ ബാറ്ററി 20 മുതൽ 80 ശതമാനം വരെ ചാർജ് ചെയ്യാൻ കഴിയുമെന്ന് കമ്പനി അവകാശപ്പെടുന്നു. 

ഡിസൈൻ 
വിൻഡ്‌സർ ഇവി പ്രോ അടിസ്ഥാനപരമായി ഒരു പുതിയ വേരിയന്റായതിനാൽ, അതിൽ വലിയ സൗന്ദര്യവർദ്ധക മാറ്റങ്ങളൊന്നുമില്ല. എംജി ഹെക്ടറിനെ അനുസ്മരിപ്പിക്കുന്ന 18 ഇഞ്ച് അലോയ് വീലുകൾക്ക് മാത്രമേ പുതിയ ഡിസൈൻ ലഭിക്കൂ. ഇതിനുപുറമെ, വിൻഡ്‌സർ ഇവി പ്രോയ്ക്ക് നിലവിലെ മോഡലിന്റെ അതേ സ്റ്റൈലിംഗ് ഘടകങ്ങളുണ്ട്. മുന്നിലും പിന്നിലും കണക്റ്റുചെയ്‌ത എൽഇഡി ലൈറ്റ്‌ബാറുകളുള്ള സ്പ്ലിറ്റ് ഹെഡ്‌ലൈറ്റ് സജ്ജീകരണം, പിൻവലിക്കാവുന്ന ഫ്ലഷ് ഡോർ ഹാൻഡിലുകൾ, വലിയ വിൻഡോ ഏരിയ മുതലായവ പുതിയ മോഡലിലും ലഭിക്കുന്നു. സെലാഡൺ ബ്ലൂ, ഗ്ലേസ് റെഡ്, അറോറ സിൽവർ നിറങ്ങൾ എന്നിവ ഉൾപ്പെടുന്ന മൂന്ന് പുതിയ കളർ ഓപ്ഷനുകളോടെ കമ്പനി ഇത് വിപണിയിൽ അവതരിപ്പിച്ചു. 

ഇന്റീരിയർ
വിൻഡ്‌സർ ഇവി പ്രോയുടെ ക്യാബിനിൽ ചില പ്രത്യേക മാറ്റങ്ങൾ വരുത്തിയിട്ടുണ്ട്. ഇത് സ്റ്റാൻഡേർഡ് മോഡലിൽ നിന്ന് വ്യത്യസ്തമാക്കുന്നു. പുതുതായി രൂപകൽപ്പന ചെയ്തതും നിറമുള്ളതുമായ സീറ്റുകൾ, മുൻവശത്തെ ആംറെസ്റ്റിൽ പുതിയ ബീജ് അപ്ഹോൾസ്റ്ററി, മേൽക്കൂര, കോളം ലൈനറുകൾ എന്നിവ ഇതിലുണ്ട്. സ്റ്റാൻഡേർഡ് മോഡലിൽ കമ്പനി പൂർണ്ണമായും കറുപ്പ് നിറത്തിലുള്ള ഇന്റീരിയർ കളർ സ്‍കീം നൽകിയിരിക്കുന്നു. 

ഫീച്ചറുകൾ
പുതിയ എംജി വിൻഡ്‌സർ ഇവി പ്രോയിൽ കമ്പനി ചില പ്രത്യേക സവിശേഷതകൾ ഉൾപ്പെടുത്തിയിട്ടുണ്ട്. V2V (വാഹനത്തിൽ നിന്ന് വാഹനത്തിലേക്ക്) V2L (വാഹനത്തിൽ നിന്ന് ലോഡ്) തുടങ്ങിയ സൗകര്യങ്ങൾ ഇതിൽ ഒരുക്കിയിട്ടുണ്ട്. ഈ സവിശേഷതകളുപയോഗിച്ച്, നിങ്ങൾക്ക് ഒരു ഇലക്ട്രിക് കാറിൽ നിന്ന് മറ്റൊരു ഇലക്ട്രിക് കാറിലേക്ക് ചാർജ് ചെയ്യാൻ കഴിയും. ഇതുകൂടാതെ, നിങ്ങളുടെ ഇലക്ട്രിക് കാറിൽ നിന്ന് മറ്റ് ഇലക്ട്രോണിക് ഉപകരണങ്ങൾക്കും പവർ നൽകാം. ഇതോടൊപ്പം, ലെവൽ-2 അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം (ADAS) പോലുള്ള സുരക്ഷാ സവിശേഷതകളും കമ്പനി ഈ ഇലക്ട്രിക് കാറിൽ ഉൾപ്പെടുത്തിയിട്ടുണ്ട്. വലിയ ബാറ്ററി കാരണം ഈ കാറിന്റെ ബൂട്ട് സ്പേസ് അൽപ്പം കുറഞ്ഞിട്ടുണ്ട്, എങ്കിലും, ഇതിന് 579 ലിറ്റർ ബൂട്ട് സ്പേസ് ഉണ്ട്, അതേസമയം സ്റ്റാൻഡേർഡ് വേരിയന്റിന് ചെറിയ ബാറ്ററി കാരണം 604 ലിറ്റർ ബൂട്ട് സ്പേസ് ഉണ്ട്. 

വില
പുതിയ വിൻഡ്‌സർ പ്രോയുടെ പ്രാരംഭ എക്സ്-ഷോറൂം വില 17.49 ലക്ഷം രൂപയാണ്. ഈ വില ആദ്യത്തെ 8,000 യൂണിറ്റുകൾക്ക് മാത്രമേ ബാധകമാകൂ. ഇതിനർത്ഥം ഭാവിയിൽ കമ്പനി ഈ കാറിന്റെ വില വർദ്ധിപ്പിക്കും എന്നാണ്. ബാറ്ററി ആസ്-എ-സർവീസ് (BaaS) സ്കീം പ്രകാരം, ഈ ഇലക്ട്രിക് എംപിവിയുടെ പ്രാരംഭ എക്സ്-ഷോറൂം വില 12.50 ലക്ഷം രൂപയാണ്. ഈ പദ്ധതി പ്രകാരം, ഉപഭോക്താക്കൾ ബാറ്ററിയുടെ വാടക നൽകണം. ഈ സ്കീമിൽ ബാറ്ററിയുടെ വില ഉൾപ്പെടുന്നില്ല, വാഹന ഉടമ ഓടിച്ച കിലോമീറ്ററിനെ അടിസ്ഥാനമാക്കി പ്രതിമാസ അടിസ്ഥാനത്തിൽ ചാർജ് ഈടാക്കും.

ബുക്കിംഗുകൾ
എംജി മോട്ടോർ ഈ പുതിയ ഇലക്ട്രിക് കാറിന്റെ ഔദ്യോഗിക ബുക്കിംഗ് മെയ് 8 മുതൽ ആരംഭിക്കും. കമ്പനിയുടെ ഔദ്യോഗിക വെബ്‌സൈറ്റിലൂടെയും അംഗീകൃത ഡീലർഷിപ്പിലൂടെയും ഇത് ബുക്ക് ചെയ്യാം. ഈ മാസം മുതൽ ഇതിന്റെ ഡെലിവറിയും ആരംഭിക്കും. 

എതിരാളികൾ
രാജ്യത്ത് ഏറ്റവും കൂടുതൽ വിറ്റഴിക്കപ്പെടുന്ന ഇലക്ട്രിക് കാറുകളിൽ ഒന്നായി നിലവിൽ എംജി വിൻഡ്‌സർ മാറി. ഇലക്ട്രിക് വാഹന വിഭാഗത്തിൽ ടാറ്റ മോട്ടോഴ്‌സിനും മഹീന്ദ്രയ്ക്കുമൊക്കെ കടുത്ത മത്സരം നൽകിയിരിക്കുകയാണ് ഈ കാർ.