കേന്ദ്ര സർക്കാർ പ്രോത്സാഹിപ്പിക്കുന്ന E85 ഇന്ധനത്തിന് പെട്രോളിനേക്കാൾ വില കുറവാണെങ്കിലും മൈലേജ് കുറവായതിനാൽ ഓട്ടച്ചെലവ് കൂടാൻ സാധ്യതയുണ്ട്. ഫ്ലെക്സ്-ഫ്യൂവൽ വാഹനങ്ങളുടെ അധിക വിലയും പരിഗണിക്കുമ്പോൾ, ഉപഭോക്താവിന് സാമ്പത്തിക ലാഭം ലഭിക്കണമെങ്കിൽ വില ഇനിയും കുറയേണ്ടതുണ്ട്.
ഇറക്കുമതി ചെയ്യുന്ന ക്രൂഡ് ഓയിലിനോടുള്ള ആശ്രയം കുറയ്ക്കുകയും ശുദ്ധമായ ഇന്ധന ഉപയോഗം പ്രോത്സാഹിപ്പിക്കുകയും ചെയ്യുന്നതിനായി കേന്ദ്ര സർക്കാർ എഥനോൾ മിശ്രിത ഇന്ധനങ്ങളുടെ ഉപയോഗം വ്യാപിപ്പിക്കുകയാണ്. ഇതിന്റെ ഭാഗമായി 85 ശതമാനം എഥനോളും 15 ശതമാനം പെട്രോളും അടങ്ങിയ E85 ഇന്ധനം ഉപയോഗിക്കാൻ കഴിയുന്ന ഫ്ലെക്സ്-ഫ്യൂവൽ വാഹനങ്ങൾ വിപണിയിലെത്തിയിട്ടുണ്ട്. പ്രത്യേക ഇന്ധന പമ്പുകളും നികുതി ഇളവുകളും ലഭ്യമാക്കിയതോടെ E85-ന്റെ ലിറ്റർ വില സാധാരണ പെട്രോളിനെക്കാൾ കുറവാണ്. എന്നാൽ പമ്പിലെ കുറഞ്ഞ വില മാത്രം ഉപഭോക്താവിന് കൂടുതൽ സാമ്പത്തിക ലാഭം ഉറപ്പാക്കുന്നില്ലെന്നാണ് വിദഗ്ധരുടെ വിലയിരുത്തൽ.
ലിറ്ററിന് കുറഞ്ഞ വില, പക്ഷേ മൈലേജിൽ കുറവ്
ഡൽഹിയിലും മുംബൈയിലും E85-ന്റെ നിലവിലെ വില ലിറ്ററിന് ഏകദേശം 82.12 രൂപ ആണ്. അതേസമയം പെട്രോളിന് ഡൽഹിയിൽ ഏകദേശം 102 രൂപയും മുംബൈയിൽ 111 രൂപയുമാണ് വില. വിലയിൽ വ്യക്തമായ വ്യത്യാസമുണ്ടെങ്കിലും എഥനോളിന്റെ ഊർജസാന്ദ്രത പെട്രോളിനേക്കാൾ കുറവായതിനാൽ ഒരേ ദൂരം സഞ്ചരിക്കാൻ കൂടുതൽ ഇന്ധനം ആവശ്യമായി വരും.
സാധാരണ E20 പെട്രോളിൽ ഓടുന്ന വാഹനങ്ങൾക്ക് ലിറ്ററിന് ശരാശരി 18 മുതൽ 20 കിലോമീറ്റർ വരെ മൈലേജ് ലഭിക്കുമ്പോൾ, E85 ഉപയോഗിക്കുന്ന വാഹനങ്ങൾക്ക് ശരാശരി 13 മുതൽ 14 കിലോമീറ്റർ മാത്രമാണ് മൈലേജ് ലഭിക്കുക. ഇതനുസരിച്ച് പെട്രോൾ വാഹനത്തിന്റെ ഓട്ടച്ചെലവ് കിലോമീറ്ററിന് ഏകദേശം 5.67 രൂപ ആണെങ്കിൽ, E85 വാഹനത്തിന് അത് ഏകദേശം 6.08 ആയി ഉയരും. അതിനാൽ എഥനോൾ ലിറ്ററിന് വില കുറവാണെങ്കിലും കിലോമീറ്ററിന് ചെലവ് അൽപ്പം കൂടുതലാകാൻ സാധ്യതയുണ്ട്.
Related Articles
ഫ്ലെക്സ്-ഫ്യൂവൽ വാഹനങ്ങൾക്ക് കൂടുതൽ വില
E85 ഇന്ധനം ഉപയോഗിക്കാൻ പ്രത്യേകമായി രൂപകൽപ്പന ചെയ്ത ഫ്ലെക്സ്-ഫ്യൂവൽ വാഹനങ്ങൾ മാത്രമേ അനുയോജ്യമാകൂ. നിലവിൽ മാരുതി സുസുക്കി വാഗൺആർ ZXi+ ഫ്ലെക്സ്-ഫ്യൂവൽ പതിപ്പ് അവതരിപ്പിച്ചിട്ടുണ്ട്. ഈ മോഡലിന്റെ എക്സ്-ഷോറൂം വില ഏകദേശം 7.24 ലക്ഷം രൂപ ആണ്. ഡൽഹിയിൽ ഓൺ-റോഡ് വില ഏകദേശം 8.13 ലക്ഷം രൂപയും മുംബൈയിൽ 8.52 ലക്ഷം രൂപയും ആണ്. സമാന പെട്രോൾ മോഡലിനെ അപേക്ഷിച്ച് ഏകദേശം 86,000 അധികം ചെലവാകുന്നതിനാൽ തുടക്ക നിക്ഷേപവും വർധിക്കുന്നു.
രാജ്യത്തിന് ദീർഘകാല നേട്ടം
വ്യവസായ മേഖലയിലെ വിലയിരുത്തലുകൾ പ്രകാരം, E85-ന്റെ വില പെട്രോളിന്റെ ഏകദേശം 70 ശതമാനത്തോളം താഴെയാകുകയോ, വാഹനങ്ങളുടെ ഇന്ധനക്ഷമത ഗണ്യമായി മെച്ചപ്പെടുകയോ ചെയ്താൽ മാത്രമേ ഉപഭോക്താക്കൾക്ക് സാമ്പത്തികമായി കൂടുതൽ പ്രയോജനം ലഭിക്കൂ. അതേസമയം, എഥനോൾ ഇന്ധനത്തിന്റെ വ്യാപക ഉപയോഗം ഇന്ത്യയുടെ ക്രൂഡ് ഓയിൽ ഇറക്കുമതി കുറയ്ക്കാനും ഊർജസുരക്ഷ വർധിപ്പിക്കാനും കരിമ്പ് കർഷകർക്ക് കൂടുതൽ വിപണി ഉറപ്പാക്കാനും വാഹനങ്ങളിൽ നിന്നുള്ള മലിനീകരണം കുറയ്ക്കാനും സഹായിക്കുമെന്നാണ് വിലയിരുത്തൽ. അതിനാൽ വ്യക്തിഗത ഉപഭോക്താക്കൾക്ക് ഉടൻ വലിയ സാമ്പത്തിക നേട്ടം ലഭിക്കണമെന്നില്ലെങ്കിലും, രാജ്യത്തിന്റെ ദീർഘകാലാടിസ്ഥാനത്തിലുള്ള ശുദ്ധവും സ്വയംപര്യാപ്തവുമായ ഗതാഗത നയത്തിൽ E85 പ്രധാന പങ്ക് വഹിക്കുമെന്നാണ് വിദഗ്ധരുടെ അഭിപ്രായം.
