2026 റോയൽ എൻഫീൽഡ് ക്ലാസിക് 350-യിൽ അസിസ്റ്റ് & സ്ലിപ്പർ ക്ലച്ചും യുഎസ്ബി ടൈപ്പ്-സി ഫാസ്റ്റ് ചാർജിങ് പോർട്ടും പുതിയതായി ഉൾപ്പെടുത്തി. ഈ മാറ്റങ്ങൾ ഡ്യുവൽ-ചാനൽ എബിഎസ് വേരിയന്റുകളിൽ ലഭ്യമാണ്, അതേസമയം 349 സിസി ജെ-സീരീസ് എഞ്ചിൻ മാറ്റമില്ലാതെ തുടരുന്നു.

ഇന്ത്യൻ ഇരുചക്ര വാഹന വിപണിയിലെ ഏറ്റവും ജനപ്രിയ മോഡലുകളിലൊന്നായ റോയൽ എൻഫീൽഡ് ക്ലാസിക് 350 ൽ കൂടുതൽ ഫീച്ചറുകൾ ഉൾപ്പെടുത്തി കമ്പനി. 2026 മോഡൽ ക്ലാസിക് 350-യിൽ റൈഡർമാർക്ക് കൂടുതൽ സൗകര്യവും മെച്ചപ്പെട്ട റൈഡിംഗ് അനുഭവവും നൽകുന്ന രണ്ട് പ്രധാന ഫീച്ചറുകളാണ് പുതുതായി ഉൾപ്പെടുത്തിയിരിക്കുന്നത്. അസിസ്റ്റ് & സ്ലിപ്പർ ക്ലച്ചും യുഎസ്ബി ടൈപ്പ്-സി ഫാസ്റ്റ് ചാർജിങ് പോർട്ടുമാണ് പുതിയ സവിശേഷതകൾ. ഈ അപ്‌ഡേറ്റുകൾ ക്ലാസിക് 350-യുടെ എല്ലാ ഡ്യുവൽ-ചാനൽ എബിഎസ് വേരിയന്റുകളിലും ലഭ്യമാണ്. ഒമ്പത് വ്യത്യസ്ത കളർ ഓപ്ഷനുകളിലാണ് മോട്ടോർസൈക്കിൾ വിപണിയിലെത്തുന്നത്.

എന്താണ് പുതിയ അസിസ്റ്റ് & സ്ലിപ്പർ ക്ലച്ചിന്റെ ഗുണം?

ക്ലാസിക് 350-യിലെ ഏറ്റവും പ്രധാനപ്പെട്ട മെക്കാനിക്കൽ മാറ്റമാണ് അസിസ്റ്റ് & സ്ലിപ്പർ ക്ലച്ച്. ക്ലച്ച് ലിവർ അമർത്താൻ ആവശ്യമായ ബലം കുറയ്ക്കുന്നതിനാൽ നഗരത്തിലെ തിരക്കേറിയ ട്രാഫിക്കിലൂടെ സഞ്ചരിക്കുമ്പോൾ റൈഡർക്ക് കൂടുതൽ സൗകര്യം ലഭിക്കും. ഗിയർ മാറ്റം കൂടുതൽ സ്‍മൂത്താകുന്നതിനൊപ്പം, ഉയർന്ന വേഗത്തിൽ ഡൗൺഷിഫ്റ്റ് ചെയ്യുമ്പോൾ പിൻചക്രം ചാടാനുള്ള സാധ്യത കുറയ്ക്കാനും ഈ സംവിധാനം സഹായിക്കും. ഇതിലൂടെ റൈഡിംഗ് കൂടുതൽ സുരക്ഷിതവും ആത്മവിശ്വാസം നൽകുന്നതുമായ അനുഭവമാകുമെന്നാണ് കമ്പനി പറയുന്നത്.

യാത്രകളിൽ ഉപകാരപ്പെടുന്ന ഫാസ്റ്റ് ചാർജിങ് പോർട്ട്

യുഎസ്ബി ടൈപ്പ്-സി ഫാസ്റ്റ് ചാർജിങ് പോർട്ടാണ് മറ്റൊരു പ്രധാന പുതുമ. ദീർഘദൂര യാത്രകളിലും ദൈനംദിന യാത്രകളിലും സ്മാർട്ട്ഫോണുകളും മറ്റ് അനുയോജ്യമായ ഉപകരണങ്ങളും എളുപ്പത്തിൽ ചാർജ് ചെയ്യാൻ ഈ സൗകര്യം സഹായിക്കും. ഇന്നത്തെ റൈഡർമാരുടെ ആവശ്യങ്ങൾ കണക്കിലെടുത്തുള്ള പ്രായോഗിക ഫീച്ചറായാണ് ഇതിനെ വിലയിരുത്തുന്നത്.

എഞ്ചിനിൽ മാറ്റമില്ല

പുതിയ ഫീച്ചറുകൾ എത്തിയെങ്കിലും എഞ്ചിനിൽ മാറ്റമില്ല. 349 സിസി സിംഗിൾ സിലിണ്ടർ, എയർ-ഓയിൽ കൂൾഡ് ജെ-സീരീസ് എഞ്ചിനാണ് ക്ലാസിക് 350-യിൽ തുടർന്നും ഉപയോഗിക്കുന്നത്. 5-സ്പീഡ് ഗിയർബോക്സുമായി ജോടിയാക്കിയിരിക്കുന്ന ഈ എഞ്ചിൻ മികച്ച ലോ-എൻഡ് ടോർക്കിനും സ്മൂത്ത് പവർ ഡെലിവറിക്കും പേരുകേട്ടതാണ്. ഈ സവിശേഷതകളാണ് ക്ലാസിക് 350-യെ റോയൽ എൻഫീൽഡിന്റെ ഏറ്റവും കൂടുതൽ വിറ്റഴിക്കപ്പെടുന്ന മോഡലുകളിലൊന്നാക്കി മാറ്റിയത്.

വില എത്ര?

പുതിയ ക്ലാസിക് 350-യുടെ എക്‌സ്-ഷോറൂം വില 1.87 ലക്ഷം രൂപ മുതൽ ആരംഭിക്കുന്നു. റെഡ്ഡിച്ച് റെഡ് വേരിയന്റിന് 1.87 ലക്ഷം രൂപയാണ് പ്രാരംഭ വില. ഹാൽസിയോൺ ബ്ലാക്ക്, മദ്രാസ് റെഡ്, ജോധ്പൂർ ബ്ലൂ, മെഡാലിയൻ ബ്രോൺസ്, കമാൻഡോ സാൻഡ്, സ്റ്റെൽത്ത് ബ്ലാക്ക്, ഗൺ ഗ്രേ, എമറാൾഡ് എന്നീ വേരിയന്റുകൾക്കും വ്യത്യസ്ത വിലകളാണ് നിശ്ചയിച്ചിരിക്കുന്നത്. ടോപ്പ് വേരിയന്റായ എമറാൾഡിന്റെ എക്‌സ്-ഷോറൂം വില 2.23 ലക്ഷം രൂപയാണ്.