ഒരറ്റത്ത് കാലുറപ്പിച്ച ബിസ്മ മറൂഫ് 45 പന്തില് അമ്പത് തികച്ചപ്പോള് സഹതാരം ആയിഷ നസീം വെടിക്കെട്ട് മോഡിലായിരുന്നു
കേപ്ടൗണ്: വനിതാ ട്വന്റി 20 ലോകകപ്പില് പാകിസ്ഥാനെതിരെ ഇന്ത്യക്ക് 150 റണ്സ് വിജയലക്ഷ്യം. തുടക്കത്തില് നിശ്ചിത ഇടവേളകളില് വിക്കറ്റ് വീഴ്ത്തിയിട്ടും ടീം ഇന്ത്യക്ക് മുതലാക്കാനായില്ല. ക്യാപ്റ്റന് ബിസ്മ മറൂഫിന്റെ അര്ധസെഞ്ചുറിയും ആയിഷ നസീമിന്റെ വെടിക്കെട്ടും പാകിസ്ഥാന് 20 ഓവറില് നാല് വിക്കറ്റ് നഷ്ടത്തില് 149 റണ്സ് സമ്മാനിക്കുകയായിരുന്നു. ബിസ്മ 55 പന്തില് 68* ഉം, ആയിഷ 25 പന്തില് 43* ഉം റണ്സെടുത്തു. ഇന്ത്യക്കായി രാധാ യാദവ് രണ്ടും ദീപ്തി ശര്മ്മയും പൂജ വസ്ത്രക്കറും ഓരോ വിക്കറ്റും നേടി.
പാകിസ്ഥാന് വനിതകള്ക്ക് ഇന്നിംഗ്സിന്റെ തുടക്കത്തിലെ പ്രഹരം നല്കിയാണ് ടീം ഇന്ത്യ തുടങ്ങിയത്. രണ്ടാം ഓവറിലെ നാലാം പന്തില് ഓപ്പണര് ജാവെറിയ ഖാനെ നഷ്ടമായി. ആറ് പന്തില് എട്ട് റണ്സെടുത്ത താരത്തെ ദീപ്തി ശര്മ്മ ഷോര്ട് ഫൈനില് ക്യാപ്റ്റന് ഹര്മന്പ്രീത് കൗറിന്റെ കൈകളില് എത്തിക്കുകയായിരുന്നു. എങ്കിലും ഒരറ്റത്ത് ക്യാപ്റ്റന് ബിസ്മ മറൂഫ് സ്കോര് കണ്ടെത്തിയതോടെ പാകിസ്ഥാന് പവര്പ്ലേയില് 39-1 എന്ന സ്കോറിലെത്തി. പാകിസ്ഥാനെ കരകയറ്റാനുള്ള ബിസ്മ-മുനീബ ശ്രമം പവര്പ്ലേ കഴിഞ്ഞ് തൊട്ടടുത്ത ഓവറില് രാധാ യാദവ് അവസാനിപ്പിച്ചു. 14 പന്തില് 12 റണ്സെടുത്ത മുനീബ അലിയെ ക്രീസ് വിട്ടിറങ്ങിയതിന് റിച്ച ഘോഷ് സ്റ്റംപ് ചെയ്യുകയായിരുന്നു.
ഒരോവറിന്റെ ഇടവേളയില് പാകിസ്ഥാന് മൂന്നാം പ്രഹരവും കിട്ടി. 2 പന്തില് അക്കൗണ്ട് തുറക്കും മുന്നേ സൂപ്പര് താരം നിദാ ധറിനെ പൂജ വസ്ത്രക്കര് തകര്പ്പന് ബൗണ്സറില് പുറത്താക്കി. ധര് പുള് ഷോട്ടിന് ശ്രമിച്ചപ്പോള് വിക്കറ്റിന് പിന്നില് റിച്ച ഘോഷ് സുരക്ഷിതമായി പന്ത് പിടികൂടി അപ്പീല് ചെയ്തു. റിവ്യൂ എടുത്ത ഹര്മന്പ്രീത് കൗറിന്റെ തീരുമാനം വിജയിക്കുകയായിരുന്നു. 10 ഓവര് പൂര്ത്തിയാകുമ്പോള് പാക് വനിതകളുടെ സ്കോര് മൂന്ന് വിക്കറ്റിന് 58 റണ്സ്. 13-ാം ഓവറിലെ ആദ്യ പന്തില് സിദ്രാ അമീനെ(14 പന്തില് 12) രാധാ യാദവ് റിച്ചയുടെ കൈകളിലെത്തിച്ചതോടെ പാകിസ്ഥാന് വീണ്ടും പ്രതിരോധത്തിലായി. അപ്പോഴും ഒരറ്റത്ത് കാലുറപ്പിച്ച ബിസ്മ മറൂഫ് 45 പന്തില് അമ്പത് തികച്ചപ്പോള് സഹതാരം ആയിഷ നസീം വെടിക്കെട്ട് മോഡിലായിരുന്നു. ഇരുവരും കൂടുതല് നഷ്ടങ്ങളില്ലാതെ പാകിസ്ഥാനെ മികച്ച സ്കോറിലെത്തിച്ചു.
നേരത്തെ ടോസ് നേടിയ പാകിസ്ഥാന് ക്യാപ്റ്റന് ബിസ്മ മറൂഫ് ബാറ്റിംഗ് തെരഞ്ഞെടുക്കുകയായിരുന്നു. കൈവിരലിന് പരിക്കേറ്റ വൈസ് ക്യാപ്റ്റന് സ്മൃതി മന്ഥാനയില്ലാതെയാണ് ടീം ഇന്ത്യ കളിക്കാനിറങ്ങിയത്. ലോകകപ്പിന് മുന്നോടിയായി ഓസ്ട്രേലിയക്കെതിരെ നടന്ന സന്നാഹ മത്സരത്തിലാണ് സ്മൃതിക്ക് പരിക്കേറ്റത്. പരിക്കിനെ തുടര്ന്ന് ബംഗ്ലാദേശിനെതിരായ സന്നാഹ മത്സരം ഇന്ത്യന് വൈസ് ക്യാപ്റ്റന് നഷ്ടമായിരുന്നു. പാകിസ്ഥാനെതിരെ സ്മൃതിക്ക് പകരം യഷ്ടിക ഭാട്യ ഓപ്പണറാവും. വനിതാ ടി20 ലോകകപ്പുകളില് ആറ് തവണ ഇന്ത്യയും പാകിസ്ഥാനും നേര്ക്കുനേര് വന്നപ്പോള് നാലിലും വിജയിച്ചത് നീലപ്പടയാണ്. സ്റ്റാര് സ്പോര്ട്സ് നെറ്റ്വര്ക്കിലൂടെയും ഡിസ്നി+ ഹോട്സ്റ്റാറിലൂടെയും മത്സരം തല്സമയം കാണാം.
വനിതാ ടി20 ലോകകപ്പ്: പാകിസ്ഥാനെ തുടക്കത്തിലെ വിറപ്പിച്ച് ഇന്ത്യന് വനിതകള്
