കോണ്വേയ്ക്ക് സെഞ്ചുറി, ഇരട്ട പ്രഹരം നല്കി ഠാക്കൂര്; ഇന്ഡോര് ഏകദിനം ആവേശകരം
ഇന്ത്യ മുന്നോട്ടുവെച്ച 386 റണ്സ് വിജയലക്ഷ്യം തേടിയിറങ്ങിയ ന്യൂസിലന്ഡിന് രണ്ടാം പന്തില് ഹാര്ദിക് പാണ്ഡ്യ ആദ്യ തിരിച്ചടി നല്കിയിരുന്നു
ഇന്ഡോര്: മൂന്നാം ഏകദിനത്തില് ഇന്ത്യയുടെ കൂറ്റന് സ്കോര് പിന്തുടരുന്ന ന്യൂസിലന്ഡിനായി സെഞ്ചുറി കുറിച്ച് ഓപ്പണര് ദേവോണ് കോണ്വേ. 71 പന്തിലാണ് കോണ്വേ മൂന്നാം ഏകദിന ശതകം തികച്ചത്. ഇന്നിംഗ്സിലെ 24-ാം ഓവറില് യുസ്വേന്ദ്ര ചാഹലിനെ തുടര്ച്ചയായി രണ്ട് സിക്സറിന് പറത്തിയാണ് കോണ്വേ മൂന്നക്കത്തിലെത്തിയത്. ഒടുവില് റിപ്പോര്ട്ട് ലഭിക്കുമ്പോള് 27 ഓവറില് ന്യൂസിലന്ഡ് നാല് വിക്കറ്റിന് 199 റണ്സെന്ന നിലയിലാണ്. കോണ്വേയ്ക്കൊപ്പം(118*) ഗ്ലെന് ഫിലിപ്സാണ്(5*) ക്രീസില്.
ഇന്ത്യ മുന്നോട്ടുവെച്ച 386 റണ്സ് വിജയലക്ഷ്യം തേടിയിറങ്ങിയ ന്യൂസിലന്ഡിന് രണ്ടാം പന്തില് ഹാര്ദിക് പാണ്ഡ്യ ആദ്യ തിരിച്ചടി നല്കി. 2 പന്തില് 0 റണ്സെടുത്ത ഫിന് അലനെ ഹാര്ദിക് പാണ്ഡ്യ ബൗള്ഡാക്കി. എന്നാല് രണ്ടാം വിക്കറ്റില് ദേവോണ് കോണ്വേയും ഹെന്റി നിക്കോള്സും ന്യൂസിലന്ഡിനെ 100 കടത്തി. 15-ാം ഓവറിലെ അഞ്ചാം പന്തില് കുല്ദീപ് യാദവാണ് ഈ കൂട്ടുകെട്ട് പൊളിച്ചത്. 40 പന്തില് 42 റണ്സെടുത്ത നിക്കോള്സ് എല്ബിയില് പുറത്താവുകയായിരുന്നു. എന്നാല് തകര്ത്തടിച്ച് കോണ്വേ 71 പന്തില് സെഞ്ചുറി കണ്ടെത്തി. മൂന്നാമനായി ഡാരില് മിച്ചലിന്റെ വിക്കറ്റ് വീണതോടെ കിവികള് വീണ്ടും ഞെട്ടി. 31 പന്തില് 24 റണ്സെടുത്ത മിച്ചലിനെ 26-ാം ഓവറിലെ ആദ്യ പന്തില് ഷാര്ദുല് ഠാക്കൂര് വിക്കറ്റ് കീപ്പര് ഇഷാന്റെ കിഷന്റെ കൈകളില് എത്തിക്കുകയായിരുന്നു. തൊട്ടടുത്ത ബോളില് ക്യാപ്റ്റന് ടോം ലാഥം ഗോള്ഡന് ഡക്കായി ഹാര്ദിക് പാണ്ഡ്യയുടെ കൈകളിലെത്തി. എന്നാല് ഹാട്രിക് തികയ്ക്കാന് ഠാക്കൂറിനായില്ല.
ടോസ് നഷ്ടപ്പെട്ട് ബാറ്റിംഗിനിറങ്ങിയ ടീം ഇന്ത്യ രോഹിത് ശര്മ്മ, ശുഭ്മാന് ഗില് എന്നിവരുടെ സെഞ്ചുറി കരുത്തില് 50 ഓവറില് 9 വിക്കറ്റിന് 385 റണ്സ് അടിച്ചെടുത്തിരുന്നു. 85 പന്തില് 9 ഫോറും 6 സിക്സറും സഹിതം 101 റണ്സാണ് ഹിറ്റ്മാന് അടിച്ചുകൂട്ടിയത്. രോഹിത്തിന്റെ മുപ്പതാം ഏകദിന സെഞ്ചുറിയാണിത്. അതേസമയം നാലാം ഏകദിന ശതകം നേടിയ ഗില് 78 പന്തില് 13 ഫോറും 5 സിക്സും ഉള്പ്പടെ 112 റണ്ണെടുത്തു. ഒന്നാം വിക്കറ്റില് ഗില്-രോഹിത് സഖ്യം 212 റണ്സ് കൂട്ടിച്ചേര്ത്തു. രോഹിത്തിനെ ബ്രേസ്വെല്ലും ഗില്ലിനെ ടിക്നെറുമാണ് പുറത്താക്കിയത്.
വിരാട് കോലി(36), ഇഷാന് കിഷന്(17), സൂര്യകുമാര് യാദവ്(14), ഹാര്ദിക് പാണ്ഡ്യ(38 പന്തില് 54), വാഷിംഗ്ടണ് സുന്ദര്(9), ഷര്ദ്ദുല് ഠാക്കൂര്(25), കുല്ദീപ് യാദവ്(3), ഉമ്രാന് മാലിക്(2*) എന്നിങ്ങനെയാണ് മറ്റ് താരങ്ങളുടെ സ്കോര്. ന്യൂസിലന്ഡിനായി ജേക്കബ് ഡഫിയും ബ്ലെയര് ടിക്നറും മൂന്ന് വീതം വിക്കറ്റ് നേടിയപ്പോള് ബ്രേസ്വെല് ഒരാളെ മടക്കി. പക്ഷേ ഡഫി 10 ഓവറില് 100 റണ്സ് വിട്ടുകൊടുത്തു.
കിവികള്ക്ക് ആദ്യ അടി കൊടുത്ത് പാണ്ഡ്യ; ന്യൂസിലന്ഡ് തിരിച്ചടിക്കുന്നു