ആകെ 30 താരങ്ങളാണ് മോക് ഓക്ഷനില് പങ്കെടുത്തത്. ന്യൂസിലൻഡ് താരങ്ങലായ രച്ചിന് രവീന്ദ്രക്കും ഡെവോണ് കോണ്വെക്കും മോക് ഓക്ഷനില് ആവശ്യക്കാരുണ്ടായില്ല.
അബുദാബി: ഐപിഎല് മിനി താരലേലം നാളെ നടക്കുന്നതിന് മുന്നോടിയായി അബുദാബിയില് സ്റ്റാര് സ്പോര്ട്സ് സംഘടിപ്പിച്ച മോക് ഓക്ഷനില് റെക്കോര്ഡ് തുക സ്വന്തമാക്കി ഓസ്ട്രേലിയന് ഓള് റൗണ്ടര് കാമറൂണ് ഗ്രീന്. മോക് ഓക്ഷനില് കൊല്ക്കത്ത നൈറ്റ് റൈഡേഴ്സിനെ പ്രതിനിധീകരിച്ച് പങ്കെടുത്ത മുന് താരം റോബിന് ഉത്തപ്പ കാമറൂണ് ഗ്രീനിനായി 30.50 കോടി രൂപയാണ് വാരിയെറിഞ്ഞത്. ചെന്നൈ താരമായിരുന്ന ശ്രീലങ്കന് പേസര് മതീഷ് പതിരാനയെ സ്വന്തമാക്കാൻ ഉത്തപ്പ 13 കോടിയും മുടക്കി. ഇംഗ്ലണ്ട് വിക്കറ്റ് കീപ്പര് ജോണി ബെയര്സ്റ്റോയെ 2.5 കോടിക്കും രാഹുല് ത്രിപാഠിയെ 75 ലക്ഷം രൂപക്കും കൊല്ക്കത്തക്കായി റോബിന് ഉത്തപ്പ ടീമിലെത്തിച്ചു.
അതേസമയം ചെന്നൈ സൂപ്പര് കിംഗ്സിനെ പ്രതിനിധീകരിച്ച മോക് ഓക്ഷനില് പങ്കെടുത്ത സുരേഷ് റെയ്ന സ്പിന്നര് രാഹുല് ചാഹറിനായി 10 കോടി രൂപ ചെലവഴിച്ചതും ശ്രദ്ധേയമായി. ദക്ഷിണാഫ്രിക്കന് പേസര് ആന്റിച്ച് നോര്ക്യക്കായി റെയ്ന 7.5 കോടി രൂപയും ഇന്ത്യൻ ടെസ്റ്റ് താരം സര്ഫറാസ് ഖാന് 7 കോടി രൂപയും മുടക്കാന് റെയ്ന തയാറായി. മുന് ഇന്ത്യൻ പേസര് ശിവം മാവിയെ 2.5 കോടി കൊടുത്ത് സ്വന്തമാക്കിയ സുരേഷ് റെയ്ന ശ്രീലങ്കന് സ്പിന്നര് വാനിന്ദു ഹസരങ്കയെ അടിസ്ഥാനവിലയായ രണ്ട് കോടിക്ക് ടീമിലെത്തിച്ചു.
കാമറൂണ് ഗ്രീന് കഴിഞ്ഞാല് മോക് ഓക്ഷനില് ഏറ്റവും കൂടുതല് തുക ലഭിച്ചത് ഇംഗ്ലണ്ട് ഓള് റൗണ്ടര് ലിയാം ലിവിംഗ്സ്റ്റണായിരുന്നു. ലക്നൗവിനെ പ്രതിനിധീകരിച്ച് പങ്കെടുത്ത ഇര്ഫാന് പത്താന് ലിവിംഗ്സ്റ്റണായി 19 കോടി രൂപയാണ് മുടക്കിയത്. ആര്സിബിയെ പ്രതിനിധീകരിച്ച് പങ്കെടുത്ത മുന് ഇന്ത്യൻ നായകന് അനില് കുംബ്ലെ ഇന്ത്യൻ പേസര് ചേതന് സക്കരിയക്കായി 6.5 കോടി മുടക്കിയപ്പോൾ കൊല്ക്കത്ത മുന് താരം വെങ്കടേഷ് അയ്യര്ക്കായി ആറ് കോടിയും ഇന്ത്യൻ പേസര് നവദീപ് സെയ്നിക്കായി 1.75 കോടിയും മുടക്കി.
Related Articles
ഡല്ഹി ക്യാപിറ്റല്സിനെ പ്രതിനിധീകരിച്ച് പങ്കെടുത്ത മുഹമ്മദ് കൈഫ് ദക്ഷിണാഫ്രിക്കന് താരം ഡേവിഡ് മില്ലര്ക്കായി 9.5 കോടിയും പേസര് ലുങ്കി എന്ഗിഡിക്കായി 6.5 കോടിയും മുടക്കി. ഇന്ത്യൻ ഓപ്പണറായിരുന്ന പൃഥ്വി ഷായെ 2.75 കോടി രൂപ മുടക്കി ഡല്ഹി സ്വന്തമാക്കിയതും ശ്രദ്ധേയമായി. ഗുജറാത്ത് ടൈറ്റന്സിനെ പ്രതിനിധീകരിച്ച് പങ്കെടുത്ത ചേതേശ്വര് പൂജാര വിജയ് ശങ്കറെയും ഇംഗ്ലണ്ട് വിക്കറ്റ് കീപ്പര് ജാമി സ്മിത്തിനെയും രണ്ട് കോടി വീതം നല്കി ടീമിലെത്തിച്ചു.
രാജസ്ഥാന് റോയല്സിനെ പ്രതിനിധീകരിച്ച് പങ്കെടുത്ത ആകാശ് ചോപ്ര ഇന്ത്യൻ ലെഗ് സ്പിന്നര് രവി ബിഷ്ണോയിയെ 11.50 കോടി രൂപക്ക് സ്വന്തമാക്കി. ഹൈദരാബാദിനായി മോക്ക് ഓക്ഷനില് പങ്കെടുത്ത എസ് ബദരീനാഥ് ദക്ഷിണാഫ്രിക്കന് പേസര് ജെറാള്ഡ് കോട്സിയെ 8 കോടി രൂപക്കും ഇന്ത്യൻ പേസര് ആകാശ് ദീപിനെ 5 കോടി രൂപക്കും സ്വന്തമാക്കി.
ലേലത്തില് കുറഞ്ഞ തുക കൈയിലുള്ള മുംബൈ ഇന്ത്യൻസ് മോക്ക് ഓക്ഷനില് ശക്തമായി രംഗത്തിറങ്ങിയില്ല. അഭിനവ് മുകുന്ദാണ് മുംബൈയെ പ്രതിനിധീകരിച്ച് പങ്കെടുത്തത്. പഞ്ചാബിനെ പ്രതിനിധീകരിച്ച് പങ്കെടുത്ത സഞ്ജയ് ബംഗാര് ഓസ്ട്രേലിയന് ഓപ്പണര് ജേക്ക് ഫ്രേസര് മക്ഗുര്ഗിനെ രണ്ട് കോടി രൂപക്ക് ടീമിലെത്തിച്ചു. ആകെ 30 താരങ്ങളാണ് മോക് ഓക്ഷനില് പങ്കെടുത്തത്. ന്യൂസിലൻഡ് താരങ്ങലായ രച്ചിന് രവീന്ദ്രക്കും ഡെവോണ് കോണ്വെക്കും മോക് ഓക്ഷനില് ആവശ്യക്കാരുണ്ടായില്ല.
മോക് ഓക്ഷനിലെ വിലകൂടിയ താരങ്ങള്
- കാമറൂൺ ഗ്രീൻ - 30.50 കോടി രൂപ (കൊല്ക്കത്ത)
- ലിയാം ലിവിംഗ്സ്റ്റൺ - 19 കോടി രൂപ (ലക്നൗ)
- 3. മതീഷ പതിരാന - 13 കോടി രൂപ (കൊല്ക്കത്ത)
- 4. രവി ബിഷ്ണോയി - 11.50 കോടി രൂപ (രാജസ്ഥാന്)
- 5. രാഹുൽ ചാഹർ - 10 കോടി രൂപ (ചെന്നൈ)
