സെലിബ്രിറ്റി മേക്കപ്പ് ആർട്ടിസ്റ്റായ ജാൻമണി ദാസ് തനിക്ക് നേരിട്ട ലൈംഗികാതിക്രമത്തെക്കുറിച്ച് വെളിപ്പെടുത്തി. പ്രായമായ ഒരാൾ തന്നെ കയറിപ്പിടിച്ചതായി രഞ്ജിനി ഹരിദാസിനോടാണ് പറഞ്ഞത്.
സെലിബ്രിറ്റി മേക്കപ്പ് ആർട്ടിസ്റ്റുകളിൽ ശ്രദ്ധേയയായ ആളാണ് ജാൻമണി ദാസ്. മലയാളികൾക്ക് ജാൻമണി പരിചിതയാകുന്നത് ബിഗ് ബോസ് മലയാളം സീസൺ 6ലൂടെയാണ്. ഷോയിൽ എത്തി ശ്രദ്ധിക്കപ്പെട്ട താരം അവതാരക രഞ്ജിനി ഹരിദാസിന്റെ പേഴ്സണൽ മേക്കപ്പ് ആർട്ടിസ്റ്റ് കൂടിയാണ്. ഇരുവരും ഒന്നിച്ചുള്ള രസകരമായ വീഡിയോ രഞ്ജിനി തന്റെ യുട്യൂബ് ചാനലിൽ പങ്കിടാറുണ്ട്. അത്തരത്തിൽ പങ്കിട്ടൊരു വീഡിയോയിൽ ഞെട്ടിക്കുന്നൊരു കാര്യം പറയുകയാണ് ജാൻമണി.
തന്നെ ഒരാൾ കയറിപ്പിടിച്ചെന്നാണ് ജാൻമണി വിഷമത്തോടെ രഞ്ജിനി ഹരിദാസിനോട് പറയുന്നത്. 'ഇന്നലെ ഒരാളെന്നെ പീഡിപ്പിക്കാൻ നോക്കി. എന്റെ ഡ്രസിലെ പൂക്കൾ കൊള്ളാമല്ലോന്ന് പറഞ്ഞ് എന്റെ നെഞ്ചത്ത് ആണ് അയാൾ കയറിപ്പിടിച്ചത്. ഒരു കിളവനാണ് അത്. ഒരടി കൊടുത്തിട്ട് അയാളുടെ ഭാര്യയെ ഫോണിൽ ഞാന് വിളിച്ചു. എങ്ങനെയാണ് ആന്റി നിങ്ങള് ഇയാളുടെ കൂടെ ജീവിക്കുന്നതെന്ന് ചോദിച്ചു. അയാള്ക്ക് കൊച്ചുമകള് വരെയുണ്ട്. ഷോക്കിംഗ് ആയിപ്പോയി ഞാന്, വിയര്ത്ത് പോയി. ഇതെല്ലാം ചെയ്തിട്ട് അയാള് ഓടി മുറിയില് കയറി. വാതിലടച്ചു. വീട്ടില് ഭാര്യയുണ്ട്. പിന്നെ എന്തിന് പുറത്ത് പോയി ആള്ക്കാരെ കയറിപ്പിടിക്കുന്നത്', എന്നായിരുന്നു ജാൻമണിയുടെ വാക്കുകൾ.
പൊലീസിൽ പരാതി കൊടുത്തില്ലേന്നാണ് ഇതെല്ലാം കേട്ട് ഞെട്ടിയ രഞ്ജിനി ഹരിദാസ് ചോദിച്ചത്. 'അയാള്ക്ക് ഭാര്യയും മക്കളുമില്ലെ. സിമ്പതിയില് വീണു. അവര് കരച്ചിലായിരുന്നു', എന്നായിരുന്നു ജാൻമണിയുടെ മറുപടി. 'ജാന്മണിയെ കയറിപ്പിടിക്കാന് ധൈര്യമുള്ളവനാണ് കേട്ടോ. ഇത് വിദ്യാഭ്യസത്തിന്റെ പ്രശ്നമൊന്നും അല്ല. കിളവനായാലും കൊച്ചുകുട്ടി ആയാലും. ഇത്രയും ഫ്രസ്ട്രേറ്റഡ് ആയിട്ടുള്ള സമൂഹമോ? ഇതൊന്നും ചിരിച്ച് കളയേണ്ട വിഷയമല്ല. പൊലീസ് സ്റ്റേഷനില് പോയി പരാതി കൊടുക്കണം', എന്ന് ജാൻമണിയോട് രഞ്ജനി പറയുന്നുണ്ട്.
Related Articles
