കോലിയുടെ പ്രകടനത്തെ വാനോളം പുകഴ്ത്തിയ ഗിൽ, അദ്ദേഹത്തിന് പൂർണ സ്വാതന്ത്ര്യം നൽകണമെന്നും വ്യക്തമാക്കി. കൂടാതെ 2027 ലോകകപ്പ് ലക്ഷ്യമിട്ട് ടീമിൽ വരുത്തേണ്ട മാറ്റങ്ങളെക്കുറിച്ചും ഗിൽ സംസാരിച്ചു.
തിരുവനന്തപുരം: വിരാട് കോലിയുടേയും ക്യാപ്റ്റന് ശുഭ്മാന് ഗില്ലിന്റെയും സെഞ്ചുറിയുടെ മികവില് വെസ്റ്റ് ഇന്ഡീസിനെതിരായ ഒന്നാം ഏകദിനത്തില് ഇന്ത്യ ഗംഭീര വിജയം സ്വന്തമാക്കിയിരുന്നു. തിരുവനന്തപുരം ഗ്രീന്ഫീല്ഡ് സ്റ്റേഡിയത്തില് നടന്ന മത്സരത്തില് എട്ട് വിക്കറ്റിനാണ് ഇന്ത്യയുടെ ജയം. ഈ വിജയത്തോടെ മൂന്ന് മത്സരങ്ങളുടെ പരമ്പരയില് ഇന്ത്യ 1-0 ന് മുന്നിലെത്തി. വെസ്റ്റ് ഇന്ഡീസ് ഉയര്ത്തിയ 296 റണ്സ് വിജയലക്ഷ്യം, തകര്പ്പന് ബാറ്റിംഗിലൂടെ ഇന്ത്യ വെറും 41.4 ഓവറില് അനായാസം മറികടക്കുകയായിരുന്നു.
തുടക്കം മുതല് ആക്രമണോത്സുകമായ ശൈലി പുറത്തെടുത്ത വിരാട് കോലി പുറത്താകാതെ 88 പന്തുകളില് നിന്ന് 139 റണ്സ് വാരിക്കൂട്ടി. കരിയറിലെ ഏറ്റവും മികച്ച ഫോമിലൂടെ കടന്നുപോകുന്ന താരം, 10 ഫോറുകളും 9 സിക്സറുകളുമാണ് അടിച്ചുക്കൂട്ടിയത്. മത്സരത്തില് സെഞ്ച്വറി നേടിയ ക്യാപ്റ്റന് ശുഭ്മാന് ഗില്ലും (110 പന്തില് 110) കോഹ്ലിയും ചേര്ന്ന് നേടിയ 151 റണ്സിന്റെ കൂട്ടുകെട്ടാണ് ഇന്ത്യയുടെ വിജയത്തിന് അടിത്തറയിട്ടത്. മത്സരശേഷം ഗില്, കോലിയെ കുറിച്ചും അദ്ദേഹത്തിന്റെ ഇന്നിംഗ്സിനെ കുറിച്ചും സംസാരിച്ചു.
രാജ്യത്തിനായി നിരവധി മത്സരങ്ങള് വിജയകരമായി ഫിനിഷ് ചെയ്തു കൊടുത്തിട്ടുള്ള വിരാട് കോലിക്ക് കളിയില് പൂര്ണ സ്വാതന്ത്ര്യം നല്കാനാണ് താന് ആഗ്രഹിക്കുന്നതെന്ന് ഗില് വ്യക്തമാക്കി. 'രാജ്യത്തിനായി അത്രയധികം മത്സരങ്ങള് ജയിപ്പിച്ചു തന്നിട്ടുള്ള, നിരന്തരം മികച്ച പ്രകടനം പുറത്തെടുക്കുന്ന ഒരാളെ നമ്മള് എന്തിന് നിയന്ത്രിക്കണം? അന്നേ ദിവസം അദ്ദേഹത്തിന് എങ്ങനെയാണോ കളിക്കാന് തോന്നുന്നത് അതുപോലെ കളിക്കട്ടെ. കാരണം അദ്ദേഹം ഫോമിലാകുമ്പോള് ഒറ്റയ്ക്ക് മത്സരങ്ങള് വിജയിപ്പിക്കാനുള്ള കഴിവ് അദ്ദേഹത്തിനുണ്ട്.' ഗില് മത്സരശേഷം പറഞ്ഞു.
ഇതോടൊപ്പം ടീമിന്റെ ദീര്ഘകാല ലക്ഷ്യങ്ങളെക്കുറിച്ചും ഗില് സംസാരിച്ചു. 2027-ലെ ഏകദിന ലോകകപ്പ് ലക്ഷ്യമാക്കി മുന്നേറുന്ന ഇന്ത്യന് ടീമിന് ബാറ്റിംഗ് നിരയില് കൂടുതല് ആഴം ആവശ്യമാണെന്ന് ഗില് അഭിപ്രായപ്പെട്ടു. എട്ടാം നമ്പരില് ബാറ്റ് ചെയ്യാനെത്തി 25-30 റണ്സ് സംഭാവന ചെയ്യാന് കഴിയുന്ന ഒരു താരത്തെ കണ്ടെത്തേണ്ടത് നിര്ണായകമാണെന്നും, നിര്ണായക ഘട്ടങ്ങളില് മികച്ച സ്കോര് നേടാന് ഇത് ടീമിനെ സഹായിക്കുമെന്നും ഗില് കൂട്ടിച്ചേര്ത്തു.
