ഓസ്ട്രേലിയന് പര്യടനത്തിനുള്ള ഇന്ത്യയുടെ ടി20 ടീമിനെ പ്രഖ്യാപിച്ചു. സൂര്യകുമാര് യാദവ് നയിക്കുന്ന 16 അംഗ ടീമില് സഞ്ജു സാംസണെ ഉള്പ്പെടുത്തി.
അഹമ്മദാബാദ്: ഓസ്ട്രേലിയന് പര്യടനത്തിനുള്ള ഏകദിന ടീമില് നിന്ന് സഞ്ജു സാംസണിനെ തഴഞ്ഞെങ്കിലും ടി20 ടീമില് താരത്തെ ഉള്പ്പെടുത്തി. പതിനാറംഗ ടീമിനെ നയിക്കുന്ന സൂര്യകുമാര് യാദവാണ്. ശുഭ്മാന് ഗില് വൈസ് ക്യാപ്റ്റനും. ഏഷ്യാ കപ്പില് കളിച്ച ടീമില് നിന്നുളള പ്രധാന മാറ്റം, ഹാര്ദിക് പാണ്ഡ്യക്ക് പകരം നിതീഷ് കുമാര് റെഡ്ഡി ടീമിലെത്തി എന്നുള്ളത്. പരിക്കിനെ തുടര്ന്ന് ഹാര്ദിക് ഏഷ്യാ കപ്പ് ഫൈനല് മത്സരം കളിച്ചിരുന്നില്ല. ജസ്പ്രിത് ബുമ്ര പേസ് ഡിപ്പാര്ട്ട്മെന്റ് നയിക്കുമ്പോള് മുഹമ്മദ് സിറാജിനെ പരിഗണിച്ചില്ല. വാഷിംഗ്ടണ് സുന്ദറിനേയും ടീമിലേക്ക് തിരിച്ചുവിളിച്ചു.
ബുമ്രയ്ക്ക് പുറമെ ഹര്ഷിത് റാണ, അര്ഷ്ദീപ് സിംഗ് എന്നിവരാണ് ടീമിലെ മറ്റു പേസര്മാര്. ശിവം ദുബെ, നിതീഷ് കുമാര് റെഡ്ഡി എന്നിവര് പേസ് ഓള്റൗണ്ടര്മാരും. വാഷിംഗ്ടണ് സുന്ദര്, കുല്ദീപ് യാദവ്, വരുണ് ചക്രവര്ത്തി, അക്സര് പട്ടേല് എന്നിവരാണ് ടീമിലെ സ്പിന്നര്മാര്. സഞ്ജുവിനൊപ്പം വിക്കറ്റ് കീപ്പറായി ജിതേഷ് ശര്മയും ടീമില് ഇടം നേടി. ഗില്, നിതീഷ് കുമാര് റെഡ്ഡി, അക്സര് പട്ടേല്, ഹര്ഷിത് റാണ, വാഷിംഗ്ടണ് സുന്ദര് എന്നിവരാണ് രണ്ട് ഫോര്മാറ്റിനുള്ള ടീമിലും ഉള്പ്പെട്ട താരങ്ങള്.
ഓസ്ട്രേലിയന് പര്യടനത്തിനുള്ള ഇന്ത്യയുടെ ടി20 ടീം: സൂര്യകുമാര് യാദവ് (ക്യാപ്റ്റന്), അഭിഷേക് ശര്മ, ശുഭ്മാന് ഗില് (വൈസ് ക്യാപ്റ്റന്), നിതീഷ് കുമാര് റെഡ്ഡി, ശിവം ദുബെ, അക്സര് പട്ടേല്, ജിതേഷ് ശര്മ (വിക്കറ്റ് കീപ്പര്), വരുണ് ചക്രവര്ത്തി, ജസ്പ്രിത് ബുമ്ര, അര്ഷ്ദീപ് സിംഗ്, കുല്ദീപ് യാദവ്, ഹര്ഷിത് റാണ, സഞ്ജു സാംസണ് (വിക്കറ്റ് കീപ്പര്), റിങ്കു സിംഗ്, വാഷിംഗ്ടണ് സുന്ദര്.
Related Articles
നേരത്തെ, ഏകദിന ടീമിന്റെ ക്യാപ്റ്റനായി ശുഭ്മാന് ഗില്ലിനെ നിയമിച്ചിരുന്നു. രോഹിത് ശര്മയെ ഏകദിന ടീമിന്റെ നായകസ്ഥാനത്ത് മാറ്റുമെന്ന് നേരത്തെ വാര്ത്തകളുണ്ടായിരുന്നു. രോഹിത്തിനൊപ്പം വിരാട് കോലി ടീമിനൊപ്പം തുടരും. ശ്രേയസ് അയ്യരാണ് ടീമിന്റെ വൈസ് ക്യാപ്റ്റന്. സഞ്ജു സാംസണ് ടീമിലിടം ലഭിച്ചിരുന്നില്ല. കെ എല് രാഹുലാണ് പ്രധാന വിക്കറ്റ് കീപ്പറായി. ബാക്ക് അപ്പ് കീപ്പറായി ധ്രുവ് ജുറലും. നേരത്തെ, സഞ്ജുവിനെ ബാക്ക് അപ്പ് കീപ്പറായി ടീമില് ഉള്പ്പെടുത്തുമെന്ന് വാര്ത്തകളുണ്ടായിരുന്നു.
ഓസീസിനെതിരെ ഏകദിന പരമ്പരയ്ക്കുള്ള ഇന്ത്യന് ടീം: ശുഭ്മാന് ഗില് (ക്യാപ്റ്റന്), രോഹിത് ശര്മ, വിരാട് കോലി, ശ്രേയസ് അയ്യര് (വൈസ് ക്യാപ്റ്റന്, അക്സര് പട്ടേല്, കെ എല് രാഹുല് (വിക്കറ്റ് കീപ്പര്, നിതീഷ് കുമാര് റെഡ്ഡി, വാഷിംഗ്ടണ് സുന്ദര്, കുല്ദീപ് യാദവ്, ഹര്ഷിത് റാണ, മുഹമ്മദ് സിറാജ്, അര്ഷ്ദീപ് സിംഗ്, പ്രസിദ് കൃഷ്ണ, ധ്രുവ് ജുറല്.
