286 റണ്സ് ഒന്നാം ഇന്നിംഗ്സ് ലീഡ് വഴങ്ങി രണ്ടാം ഇന്നിംഗ്സ് ആരംഭിച്ച വെസ്റ്റ് ഇന്ഡീസ്, ജഡേജയുടെ സ്പിന്നിന് മുന്നില് തകര്ന്നു.
അഹമ്മദാബാദ്: വെസ്റ്റ് ഇന്ഡീസിനെതിരെ ആദ്യ ക്രിക്കറ്റ് ടെസ്റ്റില് ഇന്ത്യ ഒന്നാം ഇന്നിംഗ്സ് അഞ്ചിന് 448 എന്ന നിലയില് അവസാനിപ്പിച്ചു. മൂന്നാം ദിനം ഇന്ത്യ ബാറ്റിംഗിന് ഇറങ്ങിയിരുന്നില്ല. ഇന്നിംഗ്സ് ഡിക്ലയര് ചെയ്തതായി അറിയിക്കുകയായിരുന്നു. ധ്രുവ് ജുറല് (125), രവീന്ദ്ര ജഡേജ (പുറത്താവാതെ 104), കെ എല് രാഹുല് (100) എന്നിവരുടെ സെഞ്ചുറികളാണ് ഇന്ത്യയെ മികച്ച സ്കോറിലേക്ക് നയിച്ചിരുന്നത്. 286 റണ്സിന്റെ ഒന്നാം ഇന്നിംഗ്സ് ലീഡാണ് ഇന്ത്യ നേടിയത്. മറുപടി ബാറ്റിംഗ് ആരംഭിച്ച വിന്ഡീസ് ലഞ്ചിന് പിരിയുമ്പോള് അഞ്ചിന് 66 എന്ന നിലയിലാണ്. ജഡേജ മൂന്ന് വിക്കറ്റ് നേടി. ഇന്ത്യയെ ഇനിയും ബാറ്റിംഗിന് അയക്കണമെങ്കില് വിന്ഡീസ് ഇനിയും 220 റണ്സില് കൂടുതല് നേടണം. നേരത്തെ സന്ദര്ശകരുടെ ഒന്നാം ഇന്നിംഗ്സ് 162 റണ്സിന് അവസാനിച്ചിരുന്നു.
മുഹമ്മദ് സിറാജാണ് വിന്ഡീസിന്റെ തകര്ച്ചയ്ക്ക് തുടക്കമിട്ടത്. ഇന്ന് സ്കോര്ബോര്ഡില് 12 റണ്സുള്ളപ്പോള് ടാഗ്നരെയ്ന് ചന്ദര്പോളിന്റെ വിക്കറ്റ് വിന്ഡീസിന് നഷ്ടമായി. സിറാജിന്റെ പന്ത് പുള് ചെയ്യാന് ശ്രമിച്ച ചന്ദര്പോള് സ്ക്വയര് ലെഗില് നിതീഷ് കുമാര് റെഡ്ഡിക്ക് ക്യാച്ച് നല്കി. നിതീഷ് ഇടത്തോട്ട് ഡൈവ് ചെയ്താണ് പന്ത് കയ്യിലൊതുക്കിയത്. സിറാജ് നല്കിയ തുടക്കം ജഡേജ ഏറ്റെടുത്തു. ജോണ് കാംബെല് (14), ബ്രന്ഡന് കിംഗ് (5), ഷായ് ഹോപ്പ് (1) എന്നിവരെയാണ് ജഡേജ മടക്കിയത്. റോസ്റ്റണ് ചേസ് (1) കുല്ദീപ് യാദവിന്റെ പന്തില് പുറത്താവുകയും ചെയ്തതോടെ അഞ്ചിന് 46 എന്ന നിലയിലായി വിന്ഡീസ്. പന്ത് കുത്തിതിരിയുന്ന പിച്ചില് ബാറ്റ് ചെയ്യുക വിന്ഡീസിനെ സംബന്ധിച്ചിടത്തോളം ദുഷ്കരമായ കാര്യമായിരിക്കും. ചായയ്ക്ക് മുമ്പ് കളി തീര്ക്കാനായിരിക്കും വിന്ഡീസ് ശ്രമിക്കുക.
ഇന്ത്യക്ക് ഇന്നലെ ശുഭ്മാന് ഗില് (50), രാഹുല്, ജുറല് എന്നിവരുടെ വിക്കറ്റുകളാണ് ഇന്ത്യക്ക് നഷ്ടമായത്. രണ്ട് വിക്കറ്റ് നഷ്ടത്തില് 121 എന്ന നിലയിലാണ് ഇന്ത്യ രണ്ടാം ദിനം ആരംഭിച്ചത്. എന്നാല് വ്യക്തിഗത സ്കോറിനോട് 32 റണ്സ് കൂടി കൂട്ടിചേര്ത്ത് ഗില് മടങ്ങി. രാഹുലിനൊപ്പം 98 റണ്സ് ചേര്ക്കാന് ഗില്ലിന് സാധിച്ചിരുന്നു. റോസ്റ്റണ് ചേസിന്റെ പന്തില് ജസ്റ്റിന് ഗ്രീവ്സിനായിരുന്നു ക്യാച്ച്. ശേഷം, രാഹുല് സെഞ്ചുറി പൂര്ത്തിയാക്കി. ടെസ്റ്റ് കരിയറില് 11-ാം സെഞ്ചുറിയാണ് രാഹുല് നേടിയത്. ഇന്ത്യയില് രണ്ടാമത്തെ ടെസ്റ്റ് സെഞ്ചുറിയും. സെഞ്ചുറി പൂര്ത്തിയാക്കിയതിന് പിന്നലെ രാഹുല് പുറത്തായി. ജോമല് വറിക്കാന്റെ പന്തില് ഷോര്ട്ട് കവറില് ജസ്റ്റിന് ഗ്രീവ്സിന് ക്യാച്ച്.
Related Articles
പിന്നാലെ ജുറല് - ജഡേജ സഖ്യം ക്രീസില് ഒത്തുചേര്ന്നു. ഇരുവരും 206 റണ്സാണ് കൂട്ടിചേര്ത്തത്. ഇതിനിടെ ജുറല് തന്റെ കന്നി സെഞ്ചുറി പൂര്ത്തിയാവുകയും ചെയ്തു. മൂന്ന് സിക്സും 15 ഫോറും ഉള്പ്പെടുന്ന ജുറലിന്റെ ഇന്നിംഗ്സ് അവസാനിപ്പിച്ചത് സ്പിന്നര് ഖാരി പിയേറെയാണ്. വിക്കറ്റ് കീപ്പര് ഷായ് ഹോപ്പിന് ക്യാച്ച് നല്കിയാണ് ജുറല് മടങ്ങുന്നത്. അധികം വൈകാതെ ജഡേജയും സെഞ്ചുറി പൂര്ത്തിയാക്കി. ക്രീസില് തുടരുന്ന ഇന്ത്യന് വൈസ് ക്യാപ്റ്റന് ഇതുവരെ അഞ്ച് സിക്സും ആറ് ഫോറും നേടിയിട്ടുണ്ട്. ടെസ്റ്റ് കരിയറിലെ ആറാം സെഞ്ചുറിയാണ് ജഡേജ നേടിയത്. നേരത്തെ, മികച്ച തുടക്കമായിരുന്നു ഇന്ത്യക്ക്. ഒന്നാം വിക്കറ്റില് യശസ്വി ജയ്സ്വാള് (36) രാഹുല് സഖ്യം 68 റണ്സ് ചേര്ത്തു. എന്നാല് ജയ്സ്വാളിനെ വീഴ്ത്താന് വിന്ഡീസ് പേസര് ജെയ്ഡന് സീല്സിന് സാധിച്ചു. വിക്കറ്റ് കീപ്പര് ഷായ് ഹോപ്പിന് ക്യാച്ച്. തുടര്ന്ന് ക്രീസിലെത്തിയ സായ് സുദര്ശന് (7) തിളങ്ങാനായില്ല. 19 പന്തുകള് നേരിട്ട സായ് സുദര്ശനെ റോസ്റ്റണ് ചേസ് വിക്കറ്റിന് മുന്നില് കുടുക്കി. തുടര്ന്ന് ഒന്നാം ഗില് - രാഹുല് സഖ്യം വിക്കറ്റ് പോവാതെ കാത്തു.
ടോസ് നേടി ബാറ്റിംഗിനെത്തിയ വിന്ഡീസിന് സ്കോര് സൂചിപ്പിക്കും പോലെ തകര്ച്ചയോടെയായിരുന്നു വിന്ഡീസിന്റെ തുടക്കം. 20 റണ്സിനിടെ രണ്ട് ഓപ്പണര്മാരും മടങ്ങി. റണ്സെടുക്കും മുമ്പ് ടാഗ്നരെയ്ന് ചന്ദര്പോള്, സിറാജിന്റെ പന്തില് പുറത്തായി. വിക്കറ്റ് കീപ്പര് ധ്രുവ് ജുറലിന് ക്യാച്ച്. പിന്നാലെ ജോണ് ക്യാംപെലും (8) മടങ്ങി. ഇത്തവണ ജസ്പ്രിത് ബുമ്രയുടെ പന്തില് ജുറലിന് ക്യാച്ച്. തൊട്ടുപിന്നാലെ ബ്രന്ഡന് കിംഗിനെ (13) സിറാജ് ബൗള്ഡാക്കി. അടുത്തത് അലിക് അതനാസെയുടെ (12) ഊഴമായിരുന്നു. സിറാജിന്റെ തന്നെ പന്തില് സ്ലിപ്പില് കെ എല് രാഹുലിന് ക്യാച്ച്. ഷായ് ഹോപ്പിനെ (26) കുല്ദീപ് ബൗള്ഡാക്കുക കൂടി ചെയ്തതോടെ അഞ്ചിന് 90 എന്ന നിലയിലായി വിന്ഡീസ്. ശേഷിക്കുന്ന അഞ്ച് വിക്കറ്റുകള് 72 റണ്സിനിടെ വിന്ഡീസിന് നഷ്ടമായി. ഗ്രീവ്സിന് പുറമെ റോസ്റ്റണ് ചേസ് (24), ഖാരി പിയേരെ (11), ജോമല് വറിക്കന് (8), ജുവാന് ലയ്നെ (1) എന്നിവരാണ് പുറത്തായ മറ്റുതാരങ്ങള്. നാല് വിക്കറ്റ് നേടിയ മുഹമ്മദ് സിറാജ്, മൂന്ന് പേരെ പുറത്താക്കിയ ജസ്പ്രിത് ബുമ്ര എന്നിവരാണ് വിന്ഡീസിനെ തകര്ത്തത്. കുല്ദീപ് യാദവ് രണ്ട് വിക്കറ്റ് വീഴ്ത്തി.
ഇന്ത്യ: യശസ്വി ജയ്സ്വാള്, കെ എല് രാഹുല്, സായ് സുദര്ശന്, ശുഭ്മാന് ഗില് (ക്യാപ്റ്റന്), ധ്രുവ് ജുറെല് (വിക്കറ്റ് കീപ്പര്), രവീന്ദ്ര ജഡേജ, വാഷിംഗ്ടണ് സുന്ദര്, നിതീഷ് കുമാര് റെഡ്ഡി, കുല്ദീപ് യാദവ്, ജസ്പ്രീത് ബുമ്ര, മുഹമ്മദ് സിറാജ്.
വെസ്റ്റ് ഇന്ഡീസ്: ടാഗ്നരൈന് ചന്ദര്പോള്, ജോണ് കാംബെല്, അലിക്ക് അത്നാസെ, ബ്രാന്ഡന് കിംഗ്, ഷായ് ഹോപ്പ് (വിക്കറ്റ് കീപ്പര്), റോസ്റ്റണ് ചേസ് (ക്യാപ്റ്റന്), ജസ്റ്റിന് ഗ്രീവ്സ്, ജോമെല് വാരിക്കന്, ഖാരി പിയറി, ജോഹാന് ലെയ്ന്, ജെയ്ഡന് സീല്സ്.
