സോഷ്യൽ മീഡിയയിലൂടെ പ്രശസ്തയായ 'ഇച്ചാപ്പി' എന്ന ശ്രീലക്ഷ്മിയുടെ വിവാഹമാണ്. പൂർണ്ണമായും സ്വന്തം അധ്വാനം കൊണ്ട് നടത്തുന്ന വിവാഹം, അടുത്ത ബന്ധുക്കൾ മാത്രം പങ്കെടുക്കുന്ന സ്വകാര്യ ചടങ്ങായിരിക്കുമെന്ന് അവർ അറിയിച്ചു. .
സോഷ്യൽ മീഡിയയിൽ സജീവമായ പലർക്കും സുപരിചിതമായ മുഖമായിരിക്കും 'ഇച്ചാപ്പി' എന്ന ശ്രീലക്ഷ്മിയുടേത്. ഷീറ്റ് കൊണ്ട് മറച്ച ചെറിയ വീട്ടിൽ നിന്നും കണ്ടന്റുകൾ സൃഷ്ടിച്ചു തുടങ്ങിയ ഇച്ചാപ്പി, പിന്നീട് 19-ാം വയസിൽ സ്വന്തം അധ്വാനം കൊണ്ട് വീടു വെച്ച കഥയും സമൂഹമാധ്യമങ്ങളിൽ വൈറലായിരുന്നു. ജീവിതപങ്കാളിയാകാൻ പോകുന്ന സൗരവിനെ ഇച്ചാപ്പി ഔദ്യോഗികമായി പരിചയപ്പെടുത്തിയും മലയാളികൾ ഏറ്റെടുത്തു. ഉടനെ വിവാഹം ഉണ്ടാകുമെന്നും ഇച്ചാപ്പി അറിയിച്ചിരുന്നു. പേളി മാണിയാണ് ഇച്ചാപ്പിയുടെ വിവാഹസാരി സെലക്ട് ചെയ്തത്.
വിവാഹത്തിന്റെ കൂടുതൽ വിശേഷങ്ങളാണ് ഇച്ചാപ്പി പുതിയ വീഡിയോയിൽ പങ്കുവെയ്ക്കുന്നത്. കൊച്ചിന്റെ ഇഷ്ടം നോക്കിയാണ് കല്യാണം നടത്തുന്നത്. അവളുടെ സന്തോഷമാണ് എനിക്ക് ഏറ്റവും പ്രധാനപ്പെട്ടതെന്നായിരുന്നു ഇച്ചാപ്പിയുടെ അച്ഛന് പറഞ്ഞത്. സ്വന്തം ചെലവിലാണ് മോള് ഇതെല്ലാം നടത്തുന്നത്. അതില് തങ്ങള്ക്കൊരുപാട് സന്തോഷമുണ്ടെന്നും മാതാപിതാക്കൾ പറയുന്നു.
ചെറിയൊരു വിവാഹം ആയിരിക്കുമെന്നും മീഡിയയെ എല്ലാം അറിയിച്ച് നടത്താൻ മാത്രം താൻ വളർന്നു എന്നു വിശ്വസിക്കുന്നില്ലെന്നും ഇച്ചാപ്പി പുതിയ വീഡിയോയിൽ പറയുന്നു. തീർത്തും സ്വകാര്യമായി വിവാഹം നടത്താനാണ് തന്റെയും വീട്ടുകാരുടെയും ആഗ്രഹമെന്നും അതിനുശേഷം നടത്തുന്ന റിസപ്ഷനിൽ സുഹൃത്തുക്കളെയും നാട്ടുകാരെയുമൊക്കെ ക്ഷണിച്ചിട്ടുണ്ടെന്നും ഇച്ചാപ്പി കൂട്ടിച്ചേർത്തു. ''ഞാനും അപ്പുവും (സൗരവ്) ഒന്നിച്ചുള്ള ഫോട്ടോ എഐ വെച്ച് കല്യാണ ഫോട്ടോ പോലെ സോഷ്യല്മീഡിയയിലൂടെ പ്രചരിച്ചിരുന്നു. അത് കണ്ടതും അമ്മയ്ക്ക് സങ്കടം വന്നു. മോളുടെ കല്യാണം കഴിഞ്ഞല്ലേയെന്ന് ഇവിടെയുള്ളവര് ചോദിച്ചപ്പോള് അമ്മ ഞെട്ടിപ്പോയി. മീഡിയ ഒക്കെ വന്ന് കല്യാണം കവര് ചെയ്യാനും മാത്രം ഞാന് വളര്ന്നെന്ന് തോന്നുന്നില്ല. അതുകൊണ്ട് തികച്ചും സ്വകാര്യമായാണ് കല്യാണം നടത്തുന്നത്. അതിനാലാണ് കല്യാണത്തീയതി പുറത്തുവിടാത്തത്'', എന്ന് ഇച്ചാപ്പി കൂട്ടിച്ചേർത്തി.
Related Articles
