സ്റ്റേഡിയത്തില്‍ വിഐപികള്‍ക്ക് മാത്രം മദ്യം; ഖത്തര്‍ ലോകകപ്പിലെ നിയന്ത്രണം ഇങ്ങനെ
സ്റ്റേഡിയങ്ങൾക്കുള്ളിലെ ബാറുകൾ ഉണ്ടാകില്ല, അതേസമയം രാത്രി 10 മുതൽ പുലർച്ചെ 1 വരെ പരിമിതമായ എണ്ണം ഫാൻ സോണുകളില്‍ മാത്രമേ മദ്യം ലഭ്യമാകൂ.
ദോഹ: ഖത്തർ ഫുട്ബോള്‍ ലോകകപ്പിൽ സ്റ്റേഡിയങ്ങൾക്കുള്ളിൽ മദ്യം ലഭ്യമകില്ലെന്ന് റിപ്പോര്‍ട്ടുകള്‍. രാത്രി വൈകി ഏതാനും മണിക്കൂറുകളോളം തിരഞ്ഞെടുത്ത ഫാൻ സോണുകളിൽ മാത്രമേ മദ്യം വിൽക്കുകയുള്ളൂവെന്നാണ് സംഘാടകരുമായി ബന്ധപ്പെട്ട വൃത്തങ്ങളെ ഉദ്ധരിച്ച് പുറത്തുവരുന്ന റിപ്പോര്‍ട്ട്.
പൊതുസ്ഥലത്ത് മദ്യപിക്കുന്നത് നിയമവിരുദ്ധമായ രാജ്യമാണ് ഖത്തര്‍. ഖത്തര്‍ ലോകകപ്പിന് മുന്നോടിയായുള്ള ഒരു പ്രധാന ചർച്ചാവിഷയമാണ് മദ്യത്തിന്‍റെ ലഭ്യത. ലോകകപ്പ് സ്റ്റേഡിയങ്ങളിലെ വിഐപി ലോഞ്ചുകളിൽ ബിയർ, ഷാംപെയ്ൻ, വൈൻ, സ്പിരിറ്റ് എന്നിവ നൽകുമെന്ന് ഫിഫ വെബ്‌സൈറ്റ് പറയുന്നു, ഗെയിമുകൾക്ക് മുമ്പും ശേഷവും വേദിക്ക് പുറത്തുള്ള സ്ഥലങ്ങളിൽ ബിയർ വിൽപ്പനയ്‌ക്കെത്തുമെന്നും റിപ്പോര്‍ട്ടുണ്ട്.
സ്റ്റേഡിയങ്ങൾക്കുള്ളിലെ ബാറുകൾ ഉണ്ടാകില്ല, അതേസമയം രാത്രി 10 മുതൽ പുലർച്ചെ 1 വരെ പരിമിതമായ എണ്ണം ഫാൻ സോണുകളില്‍ മാത്രമേ മദ്യം ലഭ്യമാകൂ. പദ്ധതികളെക്കുറിച്ച് വിശദീകരിച്ചെങ്കിലും ഔദ്യോഗികമായി പ്രതികരിക്കാന്‍ ലോകകപ്പ് സംഘാടകര്‍ വിസമ്മതിച്ചതായി ഈ വാര്‍ത്ത റിപ്പോര്‍ട്ട് ചെയ്ത എഎഫ്പി പറയുന്നു.
പരീക്ഷണം വിജയകരം; ഖത്തര്‍ ലോകകപ്പില്‍ ഓഫ്‌സൈഡ് കണ്ടെത്താന്‍ പുതിയ സാങ്കേതിക വിദ്യ
ഗള്‍ഫ് മേഖലയിലെ ആദ്യ ലോകകപ്പിലെ മത്സരങ്ങൾ രാത്രി 10 മണിക്കാണ് ആരംഭിക്കുക. ഖത്തറിന്റെ വേനൽച്ചൂട് ഒഴിവാക്കാൻ നവംബർ 21 മുതൽ ഡിസംബർ 18 വരെയുള്ള ശൈത്യകാല തീയതികളിലാണ് ലോകകപ്പ് നടക്കുന്നത്. സെൻട്രൽ ദോഹയിലെ ഏകദേശം 40,000 ആളുകൾക്കുള്ള ഫിഫ ഫാൻ സോൺ സമയ നിയന്ത്രണം പാലിച്ച് മദ്യം കിട്ടുന്ന സ്ഥലമായിരിക്കും എന്നാണ് പ്രതീക്ഷിക്കപ്പെടുന്നത്.
ദോഹ ഗോൾഫ് ക്ലബ്ബ് ഇന്റർകോണ്ടിനെന്റൽ ബീച്ചും സ്പായും സിറ്റി സെന്ററിന് പുറത്തുള്ള രണ്ട് വിനോദ മേഖലകളാണ്, ഇവിടെ മദ്യപാനീയങ്ങള്‍ ലഭിക്കുമെന്ന് ജൂണിൽ പുറത്തിറക്കിയ ആസൂത്രണ രേഖ ഉദ്ധരിച്ച് എഎഫ്പി റിപ്പോര്‍ട്ട് ചെയ്യുന്നുണ്ട്. ഫിഫയും ഖത്തരി സംഘാടക സമിതിയും മദ്യ ലഭ്യത സംബന്ധിച്ച് ഉടന്‍ പ്രതികരണത്തിന് ഇല്ലെന്നാണ് വാര്‍ത്ത ഏജന്‍സിയോട് പറഞ്ഞത്.
ആവശ്യമായ സമയത്ത് വിശദാംശങ്ങൾ പ്രഖ്യാപിക്കുമെന്ന് അവർ മുമ്പ് വാഗ്ദാനം ചെയ്തിട്ടുണ്ട്.
ഖത്തറിൽ, മദ്യത്തിലേക്കുള്ള പ്രവേശനം സാധാരണയായി ചില ഹോട്ടലുകളിലെ ബാറുകളിലും റെസ്റ്റോറന്റുകളിലും മാത്രമാണ്. വിദേശത്ത് നിന്നും മദ്യം എത്തിക്കുന്നതും കുറ്റകരമായ കാര്യമാണ്.
പ്രത്യേക ലൈസൻസുള്ള അമുസ്‌ലിം പ്രവാസികൾക്ക് ദോഹയ്ക്ക് പുറത്തുള്ള ഒരു പ്രത്യേക കടയിൽ മദ്യം വാങ്ങാം. ഈ വർഷമാദ്യം, ഫാൻ സോണുകളിൽ ബിയറിന് ഏകദേശം ആറ് ഡോളർ വിലവരും, ഇത് ദോഹയിലെ ഹോട്ടലുകളിലെ ഏകദേശം 12 ഡോളറിനേക്കാൾ കുറവായിരിക്കും എന്നും സംഘാടക സമിതി വൃത്തങ്ങളെ ഉദ്ധരിച്ച് എഎഫ്പി റിപ്പോര്‍ട്ട് ചെയ്തിരുന്നു.
ഫിഫയും പങ്കുവച്ചു; കേരളത്തെ കുറിച്ചുള്ള ഫിഫ ഡോക്യുമെന്ററിക്ക് മികച്ച പ്രതികരണം
