പോക്കോയുടെ മറ്റൊരു സ്മാര്ട്ട്ഫോണ് കൂടി ഇന്ത്യന് വിപണിയിലേക്ക്, ഹാന്ഡ്സെറ്റിന്റെ ടീസര് ഇറങ്ങി
ദില്ലി: ചൈനീസ് ബ്രാന്ഡായ പോക്കോ ഇന്ത്യയിൽ ഒരു സ്മാർട്ട്ഫോൺ കൂടി പുറത്തിറക്കുന്നു. പേര് കമ്പനി സ്ഥിരീകരിച്ചിട്ടില്ലെങ്കിലും ഇത് പോക്കോ എം7 പ്ലസ് (Poco M7 Plus) ആയിരിക്കുമെന്നാണ് റിപ്പോർട്ടുകൾ. പുതിയ സ്മാർട്ട്ഫോണിന്റെ ലോഞ്ചിംഗിനെക്കുറിച്ച് സൂചന നൽകുന്നതിനായി പോക്കോ ഇന്ത്യയും ഫ്ലിപ്കാർട്ടും അവരുടെ വെബ്സൈറ്റുകളിൽ ഒരു പ്രത്യേക മൈക്രോസൈറ്റ് സൃഷ്ടിച്ചിട്ടുണ്ട്. ഫോണിന്റെ കറുത്ത ഫിനിഷിലുള്ള പിൻഭാഗത്തെ ഡിസൈൻ ടീസർ വെളിപ്പെടുത്തുന്നു. ഡ്യുവൽ റിയർ ക്യാമറ സജ്ജീകരണവും വരാനിരിക്കുന്ന ഫോണിലുണ്ട് എന്നാണ് ടീസര് വ്യക്തമാക്കുന്നത്.
പോക്കോ ഔദ്യോഗികമായി പേരും ലോഞ്ച് തീയതിയും വെളിപ്പെടുത്തിയിട്ടില്ല. എങ്കിലും വരാനിരിക്കുന്ന സ്മാര്ട്ട്ഫോണ് ഓഗസ്റ്റ് 13ന് പോക്കോ എം 7 പ്ലസ് എന്ന പേരിൽ പുറത്തിറങ്ങും എന്നാണ് സ്ഥിരീകരിക്കാത്ത റിപ്പോർട്ടുകൾ. വരാനിരിക്കുന്ന ഫോൺ പോക്കോ എം6 പ്ലസിനേക്കാൾ മെച്ചപ്പെടുത്തലുകൾ വാഗ്ദാനം ചെയ്യുമെന്നാണ് പ്രതീക്ഷിക്കുന്നു. ടീസറിലെ "എല്ലാവർക്കും പവർ" എന്ന ടാഗ്ലൈൻ ഈ ഡിവൈസ് വലിയ ബാറ്ററിയുമായി വരുമെന്ന് സൂചിപ്പിക്കുന്നു. പോക്കോ എം7 പ്ലസിൽ 33 വാട്സ് ഫാസ്റ്റ് ചാര്ജിംഗ് പിന്തുണയുള്ള 7,000 എംഎഎച്ച് ബാറ്ററി ഉണ്ടാകുമെന്നാണ് മറ്റൊരു പ്രതീക്ഷ. ക്വാൽകോമിന്റെ സ്നാപ്ഡ്രാഗൺ 6s ജെൻ 3 ചിപ്സെറ്റിലാവും ഫോണിന്റെ പ്രവര്ത്തനം.
പോക്കോ ലോഞ്ച് ചെയ്യാനിരിക്കുന്ന സ്മാര്ട്ട്ഫോണിന് 15,000 രൂപയിൽ താഴെയെ വിലയുണ്ടാകുകയുള്ളൂ എന്നും റിപ്പോർട്ടുകൾ സൂചിപ്പിക്കുന്നു. പോക്കോ എം7 പ്ലസിൽ 144 ഹെര്ട്സ് റിഫ്രഷ് റേറ്റ് ഉള്ള 6.9 ഇഞ്ച് ഡിസ്പ്ലേ ഉണ്ടാകുമെന്നാണ് വിവരം. 50 മെഗാപിക്സൽ പ്രൈമറി റിയർ ക്യാമറ സെൻസറും ഉണ്ടായിരിക്കും. സെൽഫികൾക്കും വീഡിയോ ചാറ്റുകൾക്കുമായി 8 മെഗാപിക്സൽ ഫ്രണ്ട് ഫേസിംഗ് ക്യാമറയും ഉണ്ടാവുമെന്നാണ് സൂചനകള്.
Related Articles
കഴിഞ്ഞ വർഷം ഓഗസ്റ്റിൽ 13,499 രൂപ പ്രാരംഭ വിലയിൽ പുറത്തിറങ്ങിയ പോക്കോ എം6 പ്ലസിനെ അപേക്ഷിച്ച് പോക്കോ എം7 പ്ലസിൽ കൂടുതൽ അപ്ഗ്രേഡുകള് കമ്പനി കൊണ്ടുവരുമെന്ന് പ്രതീക്ഷിക്കുന്നു. എം6 പ്ലസിന്റെ 6 ജിബി റാം + 128 ജിബി സ്റ്റോറേജ് വേരിയന്റിന് 13,499 രൂപയാണ് പ്രാരംഭ വില. 8 ജിബി വരെ റാമുമായി ജോടിയാക്കിയ സ്നാപ്ഡ്രാഗൺ 4 ജെൻ 2 എഇ (ആക്സിലറേറ്റഡ് എഡിഷൻ) ചിപ്സെറ്റ് സജ്ജീകരിച്ചിരിക്കുന്നു. 120 ഹെര്ട്സ് റിഫ്രഷ് റേറ്റും കോർണിംഗ് ഗൊറില്ല ഗ്ലാസ് 3 സംരക്ഷണവുമുള്ള 6.79 ഇഞ്ച് ഫുൾ-എച്ച്ഡി+ ഡിസ്പ്ലേയാണ് ഫോണിനുള്ളത്. 108 മെഗാപിക്സൽ പ്രൈമറി സെൻസറും 2 മെഗാപിക്സൽ മാക്രോ സെൻസറും ഉൾക്കൊള്ളുന്ന ഡ്യുവൽ റിയർ ക്യാമറ യൂണിറ്റും ലഭിക്കുന്നു. 13 മെഗാപിക്സൽ സെൽഫി ഷൂട്ടറും ഐപി53-റേറ്റഡ് ബിൽഡും ഉള്ള പോക്കോ എം6 പ്ലസ് ഹാന്ഡ്സെറ്റ് 33 വാട്സ് വയർഡ് ഫാസ്റ്റ് ചാർജിംഗ് പിന്തുണയുള്ള 5,030 എംഎഎച്ച് ബാറ്ററി പിന്തുണയോടെയാണ് വിപണിയിലെത്തിയിരുന്നത്.
