- Home
- Sports
- Cricket
- ആദ്യ പന്തില് അഭിഷേക് വീണു, പിന്നാലെ സൂര്യയും, നല്ല തുടക്കം മുതലാക്കാനാവാതെ സഞ്ജുവും മടങ്ങി, അടിതെറ്റി ഇന്ത്യ
ആദ്യ പന്തില് അഭിഷേക് വീണു, പിന്നാലെ സൂര്യയും, നല്ല തുടക്കം മുതലാക്കാനാവാതെ സഞ്ജുവും മടങ്ങി, അടിതെറ്റി ഇന്ത്യ
ന്യൂസിലന്ഡ് ഉയര്ത്തിയ 216 റണ്സ് വിജയലക്ഷ്യം പിന്തുടരുന്ന ഇന്ത്യക്ക് കൂട്ടത്തകര്ച്ച.ആദ്യ പന്തിൽ അഭിഷേക് ശർമയും പിന്നാലെ സൂര്യകുമാർ യാദവും പുറത്തായി. മികച്ച തുടക്കം ലഭിച്ച സഞ്ജു സാംസൺ 24 റൺസിന് പുറത്തായതോടെ ഇന്ത്യ പതറി.
അടി തെറ്റി ഇന്ത്യ
ടി20 പരമ്പരയിലെ നാലാം മത്സരത്തില് ന്യൂസിലന്ഡിനെതിരെ 216 റണ്സ് വിജയലക്ഷ്യം പിന്തുടരുന്ന ഇന്ത്യക്ക് 4 വിക്കറ്റ് നഷ്ടം. ഇന്നിംഗ്സിലെ ആദ്യ പന്തില് തന്നെ വെടിക്കെട്ട് ഓപ്പണര് അഭിഷേക് ശര്മയെ നഷ്ടമായ ഇന്ത്യ ഒടുവില് വിവരം ലഭിക്കുമ്പോള് 10 ഓവറില് 4 വിക്കറ്റ് നഷ്ടത്തില് 77 റണ്സെന്ന നിലയിലാണ്. 28 പന്തില് 35 റണ്സുമായി റിങ്കു സിംഗും 3 പന്തില് 8 റണ്സുമായി ശിവം ദുബെയും ക്രീസില്. അഭിഷേക് ശര്മ(0) സൂര്യകുമാര് യാദവ്(8), സഞ്ജു സാംസൺ(24), ഹാര്ദ്ദിക് പാണ്ഡ്യ(2) എന്നിവരുടെ വിക്കറ്റുകളാണ് ഇന്ത്യക്ക് നഷ്ടമായത്.
ഞെട്ടിയ തുടക്കം
കഴിഞ്ഞ കളിയില് നിന്ന് വ്യത്യസ്തമായി മാന്റ് ഹെന്റിയുടെ ആദ്യ ഓവറില് സ്ട്രൈക്ക് ചെയ്തത് അഭിഷേക് ശര്മയായിരുന്നു. നേരിട്ട ആദ്യ പന്തില് തന്നെ ക്രീസില് നിന്ന് ചാടിയിറങ്ങി ഹെന്റിയെ സിക്സ് അടിക്കാന് നോക്കിയ അഭിഷേകിനെ തേര്ഡ്മാന് ബൗണ്ടറിയില് ഡെവോണ് കോണ്വെ തകര്പ്പന് ക്യാച്ചിലൂടെ പുറത്താക്കി. ക്യാപ്റ്റൻ സൂര്യകുമാര് യാദവാണ് മൂന്നാം നമ്പറില് ക്രീസിലെത്തിയത്.
ബൗണ്ടറി അടിച്ചു തുടങ്ങി സൂര്യ, പിന്നാലെ വീണു
ആദ്യ ഔവറില് ബൗണ്ടറി നേടിയ സൂര്യ ഹെന്റിയുടെ റിട്ടേണ് ക്യാച്ചില് നിന്ന് തലനാരിഴക്ക് രക്ഷപ്പെട്ടു. രണ്ടാം ഓവറില് ആദ്യ പന്ത് നേരിട്ട സഞ്ജുവിന് ആദ്യ രണ്ട് പന്തുകളില് റണ്ണെടുക്കാനായില്ല. മൂന്നാം പന്തില് സഞ്ജു സിംഗിളെടുത്തു. വീണ്ടും സൂര്യയുടെ ബൗണ്ടറി. എന്നാല് അവസാന പന്തില് സൂര്യയെ തകര്പ്പൻ റിട്ടേണ് ക്യാച്ചിലൂടെ ജേക്കബ് ഡഫി മടക്കിയതോടെ ഇന്ത്യ പതറി.
സഞ്ജുവിന്റെ ആദ്യ ബൗണ്ടറി
മൂന്നാം ഓവറിലെ ആദ്യ പന്തില് ഹെന്റിയെ ബൗണ്ടറി കടത്തിയാണ് സഞ്ജു ആദ്യ ബൗണ്ടറി നേടിയത്. അതേ ഓവറില് ഒരു ബൗണ്ടറി കൂടി സഞ്ജു നേടി.പിന്നാലെ സാക്രി ഫോക്സ് എറിഞ്ഞ നാലാം ഓവറില് തുടര്ച്ചയായി സിക്സുകള് പറത്തി റിങ്കു സിംഗ് അക്കൗണ്ട് തുറന്നു.ജേക്കബ് ഡഫിക്കെതിരെ പവര്പ്ലേയിലെ അവസാന ഓവറില് സിക്സ് അടിച്ചു കരുത്തുകാട്ടിയ സഞ്ജു പവര് പ്ലേയില് ഇന്ത്യയെ 53 റണ്സിലെത്തിച്ചു.
വീണ്ടും നിരാശ
എന്നാല് നല്ല തുടക്കം മുതലാക്കാനാവാതെ സഞ്ജു മിച്ചല് സാന്റ്നറുടെ അടുത്ത ഓവറില് പ്രതിരോധിക്കാനുള്ള ശ്രമത്തില് ക്ലീന് ബൗള്ഡായി മടങ്ങി. 15 പന്തില് 3 ബൗണ്ടറിയും ഒരു സിക്സും പറത്തിയ സഞ്ജു 24 റണ്സ് നേടി.
പവറില്ലാതെ പാണ്ഡ്യയും വീണു
സഞ്ജു പുറത്തായതിന് പിന്നാലെ ക്രീസിലെത്തിയ ഹാര്ദ്ദിക് പാണ്ഡ്യ സാന്റ്നറുടെ പന്തില് സാക്രി ഫോക്സിന് ക്യാച്ചാ നല്കി പുറത്തായി. 5 പന്ത് നേരിട്ട പാണ്ഡ്യ രണ്ട് റണ്സ് മാത്രമാണ് നേടിയത്. ഇതോടെ ഇന്ത്യ 63-4ലേക്ക് കൂപ്പുകുത്തി.
തകര്ത്തടിച്ച് കിവീസ്
നേരത്തെ ടോസ് നഷ്ടമായി ആദ്യം ബാറ്റ് ചെയ്ത ന്യൂസിലന്ഡ് 20 ഓവറില് 7 വിക്കറ്റ് നഷ്ടത്തില് 215 റണ്സെടുത്തു. 36 പന്തില് 62 റണ്സെടുത്ത ടിം സൈഫര്ട്ടാണ് ന്യൂസിലന്ഡിന്റെ ടോപ് സ്കോറര്. ഡെവോണ് കോണ്വെ 23 പന്തില് 44 റണ്സെടുത്തപ്പോള് ഗ്ലെന് ഫിലിപ്സ് 16 പന്തില് 24 റണ്സെടുത്തു. ഡാരില് മിച്ചല് 18 പന്തില് 39 റണ്സെടുത്ത് പുറത്താകാതെ നിന്നു. ഇന്ത്യക്കായി കുല്ദീപ് യാദവും അര്ഷ്ദീപ് സിംഗും രണ്ട് വിക്കറ്റ് വീതമെടുത്തു.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!
