- Home
- Sports
- Cricket
- ഒടുവില് നിര്ണായക തീരുമാനമെടുത്ത് ജയ് ഷാ, ബംഗ്ലാദേശ് ടി20 ലോകകപ്പില് നിന്ന് പുറത്ത്, പകരം സ്കോട്ട്ലൻഡ് കളിക്കും
ഒടുവില് നിര്ണായക തീരുമാനമെടുത്ത് ജയ് ഷാ, ബംഗ്ലാദേശ് ടി20 ലോകകപ്പില് നിന്ന് പുറത്ത്, പകരം സ്കോട്ട്ലൻഡ് കളിക്കും
ടി20 ലോകകപ്പില് നിന്ന് ബംഗ്ലാദേശ് പിന്മാറിയതായി ഐസിസി ഔദ്യോഗികമായി സ്ഥിരീകരിച്ചു. ബംഗ്ലാദേശിന് പകരക്കാരായി സ്കോട്ലന്ഡിനെ ലോകകപ്പില് ഉള്പ്പെടുത്തി.
പിന്മാറ്റം സ്ഥിരീകരിച്ച് ഐസിസി, പകരക്കാരെ പ്രഖ്യാപിച്ചു
ടി20 ലോകകപ്പില് നിന്ന് ബംഗ്ലാദേശ് പിന്മാറിയതായി ഔദ്യോഗികമായി സ്ഥിരീകരീച്ച് ഐസിസി. ബംഗ്ലാദേശിന് പകരം സ്കോട്ലന്ഡ് ടി20 ലോകകപ്പില് കളിക്കുമെന്ന് ഐസിസി വ്യക്തമാക്കി. ബംഗ്ലാദേശിന് പകരം സ്കോട്ലന്ഡിനെ ലോകകപ്പില് ഉള്പ്പെടുത്തിയതായി ഐസിസി കത്തിലൂടെ ബംഗ്ലാദേശ് ക്രിക്കറ്റ് ബോര്ഡിനെ അറിയിച്ചു. ഇന്നലെ ദുബായില് ചെയര്മാന് ജയ് ഷായുടെ അധ്യക്ഷയതില് ചേര്ന്ന യോഗത്തിലാണ് ബംഗ്ലാദേശിന്റെ പിന്മാറ്റം ഐസിസി സ്ഥിരീകരിച്ചത്.
പകരമെത്തുക സ്കോട്ലന്ഡ്
ബംഗ്ലാദേശ് പിന്മാറിയതോടെ, ഗ്രൂപ്പ് സിയിൽ അവർക്ക് പകരക്കാരായി സ്കോട്ട്ലൻഡിനെ ഉള്പ്പെടുത്തി. യൂറോപ്യൻ ക്വാളിഫയറിൽ നെതർലൻഡ്സ്, ഇറ്റലി, ജേഴ്സി എന്നീ ടീമുകൾക്ക് പിന്നിലായിപ്പോയതിനാൽ 2026-ലെ ടി20 ലോകകപ്പിന് യോഗ്യത നേടാൻ സ്കോട്ട്ലൻഡിന് നേരത്തെ സാധിച്ചിരുന്നില്ല.
എന്തുകൊണ്ട് സ്കോട്ലന്ഡ്
മുൻ ഐസിസി ടൂർണമെന്റുകളിലെ മികച്ച പ്രകടനങ്ങളും നിലവിലെ 14-ാം റാങ്കുമാണ് സ്കോട്ട്ലൻഡിന് ലോകകപ്പിലേക്ക് വഴിതുറന്നത്. കഴിഞ്ഞ ടി20 ലോകകപ്പില് ഗ്രൂപ്പ് ബിയിൽ ഇംഗ്ലണ്ടിന് തുല്യമായ പോയന്റുകൾ നേടിയെങ്കിലും നെറ്റ് റൺറേറ്റിന്റെ അടിസ്ഥാനത്തിൽ സ്കോട്ട്ലൻഡ് മൂന്നാം സ്ഥാനത്തേക്ക് പിന്തള്ളപ്പെടുകയായിരുന്നു. 2022 ലോകകപ്പില് ഗ്രൂപ്പ് ഘട്ടത്തിൽ കരുത്തരായ വെസ്റ്റ് ഇൻഡീസിനെ പരാജയപ്പെടുത്തിയെങ്കിലും, ഗ്രൂപ്പിൽ മൂന്നാം സ്ഥാനത്തായതിനാൽ സൂപ്പർ 12 ഘട്ടത്തിലേക്ക് യോഗ്യത നേടാൻ അവർക്ക് സാധിച്ചില്ല. 2021 ലോകകപ്പിലാകട്ടെ ബംഗ്ലാദേശിനെ ഗ്രൂപ്പ് ഘട്ടത്തിൽ അട്ടിമറിക്കുകയും ഗ്രൂപ്പ് ചാമ്പ്യന്മാരായി സൂപ്പർ 12-ലേക്ക് മുന്നേറുകയും ചെയ്തിരുന്നു. എന്നാൽ സൂപ്പർ 12 പോരാട്ടങ്ങളിൽ ഒരു വിജയം പോലും നേടാൻ അവർക്ക് കഴിഞ്ഞില്ല.
ലോകകപ്പിലെ ഗ്രൂപ്പുകളും ടീമുകളും
ഗ്രൂപ്പ് എ: ഇന്ത്യ, യു.എസ്.എ, നെതർലൻഡ്സ്, നമീബിയ, പാകിസ്ഥാൻ.
ഗ്രൂപ്പ് ബി: ശ്രീലങ്ക, ഓസ്ട്രേലിയ, സിംബാബ്വെ, ഒമാൻ, അയർലൻഡ്.
ഗ്രൂപ്പ് സി: ഇംഗ്ലണ്ട്, വെസ്റ്റ് ഇൻഡീസ്, സ്കോട്ട്ലൻഡ്, ഇറ്റലി, നേപ്പാൾ.
ഗ്രൂപ്പ് ഡി: അഫ്ഗാനിസ്ഥാൻ, ന്യൂസിലൻഡ്, സൗത്ത് ആഫ്രിക്ക, കാനഡ, യു.എ.ഇ
നിലപാടിലുറച്ച് ഐസിസിയും ബംഗ്ലാദേശും
ടി20 ലോകകപ്പിലെ ബംഗ്ലാദേശിന്റെ മത്സരങ്ങൾ ശ്രീലങ്കയിലേക്ക് മാറ്റണമെന്ന ബിസിബിയുടെ ആവശ്യം ഐസിസി കഴിഞ്ഞ ദിവസം തള്ളിയിരുന്നു. 2026 ഫെബ്രുവരി 7-ന് ആരംഭിക്കുന്ന ലോകകപ്പ് നിശ്ചയിച്ച പ്രകാരം ഇന്ത്യയിലും ശ്രീലങ്കയിലുമായി തന്നെ നടക്കുമെന്ന് ഐസിസി ബോർഡ് യോഗം തീരുമാനിച്ചിരുന്നു. ഇതിന് പിന്നാലെ ഇന്ത്യയിൽ ലോകകപ്പ് മത്സരങ്ങൾ കളിക്കില്ലെന്ന തീരുമാനത്തിൽ തങ്ങൾ ഉറച്ചുനിൽക്കുകയാണെന്നും ബംഗ്ലാദേശിന്റെ മത്സരങ്ങള് ഇന്ത്യയില് നിന്ന് മാറ്റിയില്ലെങ്കില് ലോകകപ്പ് ബഹിഷ്കരിക്കുമെന്നും ബിസിബി പ്രസിഡന്റ് അമിനുൽ ഇസ്ലാം ബുൾബുൾ പ്രഖ്യാപിച്ചിരുന്നു.
വിവാദം തുടങ്ങിയത് മുസ്തഫിസുറിനെ പുറത്താക്കിയതിന് പിന്നാലെ
ബംഗ്ലാദേശിൽ ന്യൂനപക്ഷങ്ങൾക്കെതിരായ അതിക്രമങ്ങൾക്കിടെ ഇന്ത്യൻ ക്രിക്കറ്റ് കൺട്രോൾ ബോർഡിന്റെ (ബിസിസിഐ) നിർദ്ദേശപ്രകാരം കൊൽക്കത്ത നൈറ്റ് റൈഡേഴ്സ് ടീമിൽ നിന്ന് ബംഗ്ലാദേശ് പേസർ മുസ്തഫിസുർ റഹ്മാനെ ഒഴിവാക്കിയ ശേഷമാണ് പ്രതിസന്ധി ഉടലെടുത്തത്. പിന്നാലെ കളിക്കാരുടെ സുരക്ഷ സംബന്ധിച്ച ആശങ്കകൾ ചൂണ്ടിക്കാട്ടി മത്സരങ്ങൾ ഇന്ത്യയ്ക്ക് പുറത്തേക്ക് മാറ്റണമെന്ന ആവശ്യവുമായി ബംഗ്ലാദേശ് ക്രിക്കറ്റ് ബോര്ഡ് രംഗത്തെത്തുകയായിരുന്നു. വേദി ശ്രീലങ്കയിലേക്ക് മാറ്റണമെന്നും ഗ്രൂപ്പ് മാറ്റണമെന്നുമായിരുന്നു ബംഗ്ലാദേശിന്റെ പ്രധാന ആവശ്യം.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!
