വിമാനത്തില്‍ പൈലറ്റിനും കോ-പൈലറ്റിനും രണ്ട് തരം ഭക്ഷണം നിര്‍ബന്ധം; ഈ നിയമത്തിന് പിന്നിലെ കാരണം ഇതാണ്

വിചിത്രമെന്ന് തോന്നാമെങ്കിലും പൈലറ്റുമാർക്കുള്ള ഈ ഭക്ഷണ നിയമത്തിന് പിന്നിൽ വ്യക്തമായ കാരണമുണ്ട്. ലോകമെമ്പാടുമുള്ള വിമാനക്കമ്പനികൾ എന്തിനാണ് പൈലറ്റിനും കോ-പൈലറ്റിനും വ്യത്യസ്‌ത ഭക്ഷണങ്ങള്‍ ഒരുക്കുന്നതെന്ന് വിശദമായി അറിയാം. 

Image Credit : X

കര്‍ശന നിയമങ്ങള്‍

വിമാനം പറത്തുന്ന പൈലറ്റുമാരുടെ കാര്യത്തിൽ വിമാനക്കമ്പനികൾ വലിയ മുൻകരുതലുകൾ എടുക്കാറുണ്ട്. കോക്ക്പിറ്റിൽ സാധാരണയായി പൈലറ്റും കോ-പൈലറ്റും ഉണ്ടാകും. ടേക്ക് ഓഫ് മുതൽ ലാൻഡിംഗ് വരെ ഇരുവരും എപ്പോഴും ജാഗരൂകരായിരിക്കണം. ചെറിയൊരു പിഴവ് പോലും നൂറുകണക്കിന് ആളുകളുടെ ജീവന് ഭീഷണിയാകും. അതിനാൽ, ഇവരുമായി ബന്ധപ്പെട്ട ഓരോ കാര്യവും അധികൃതർ മുൻകൂട്ടി സൂക്ഷ്മമായി പരിശോധിക്കും.

Image Credit : Getty

ഭക്ഷണ നിയമങ്ങള്‍

കോക്ക്പിറ്റിലിരിക്കുന്ന പൈലറ്റും കോ-പൈലറ്റും ഭക്ഷണകാര്യത്തിലും കർശനമായ നിയമങ്ങൾ പാലിക്കുന്നുണ്ട്. പൈലറ്റിനും കോ-പൈലറ്റിനും ഒരേതരം ഭക്ഷണം നൽകാറില്ല. അതായത്, രണ്ടുപേർക്കും വ്യത്യസ്തമായ ഭക്ഷണമാണ് വിതരണം ചെയ്യുന്നത്.

Image Credit : Gemini

ഭക്ഷ്യവിഷബാധ

ഇതിന് പിന്നിലെ പ്രധാന കാരണം 'ഫുഡ് പോയിസണിംഗ്' അഥവാ ഭക്ഷ്യവിഷബാധയാണ്. ഒരുപക്ഷേ, പൈലറ്റുമാര്‍ക്ക് നൽകുന്ന ഭക്ഷണത്തിൽ എന്തെങ്കിലും പ്രശ്നമുണ്ടായി ഭക്ഷ്യവിഷബാധയേറ്റാൽ പൈലറ്റും കോ-പൈലറ്റും ഒരേ സമയം രോഗികളാകാൻ സാധ്യതയുണ്ട്. അങ്ങനെയൊരു സാഹചര്യത്തിൽ വിമാനം നിയന്ത്രിക്കുന്നത് വളരെ ബുദ്ധിമുട്ടാകും.

Image Credit : Generated by google gemini AI

വ്യത്യസ്‌ത നിയമങ്ങള്‍

അതുകൊണ്ടാണ് രണ്ടുപേർക്കും വ്യത്യസ്ത ഭക്ഷണം നൽകുന്നത്. ഒരാൾക്ക് അസുഖം വന്നാലും മറ്റേയാൾക്ക് വിമാനത്തിന്‍റെ നിയന്ത്രണം ഏറ്റെടുക്കാൻ കഴിയും. രണ്ട് പൈലറ്റുമാരും ഒരേ സമയം രോഗികളാകുന്നത് ഒഴിവാക്കാനാണ് ഈ ക്രമീകരണം. ഈ വിഷയത്തിൽ ഓരോ എയർലൈൻസിനും വ്യത്യസ്ത നിയമങ്ങളാണുള്ളത്. എങ്കിലും മിക്ക വിമാനക്കമ്പനികളും പൈലറ്റുമാർക്ക് നൽകുന്ന ഭക്ഷണത്തിന്റെ കാര്യത്തിൽ അതീവ ജാഗ്രത പുലർത്തുന്നു.

Image Credit : Getty

വേറെയും നിബന്ധനകള്‍

ചില പ്രീമിയം വിമാനക്കമ്പനികൾ ഒരു പടി കൂടി കടന്നുള്ള നിയമങ്ങൾ നടപ്പിലാക്കിയിട്ടുണ്ട്. പൈലറ്റുമാർക്ക് നൽകുന്ന ഭക്ഷണം വ്യത്യസ്തമായിരിക്കണം എന്ന് മാത്രമല്ല, അത് വ്യത്യസ്ത ഷെഫുമാർ (പാചകക്കാർ) തയ്യാറാക്കിയതോ അല്ലെങ്കിൽ വ്യത്യസ്ത ബാച്ചുകളിൽ പാകം ചെയ്തതോ ആയിരിക്കണം എന്നും ഇവർ നിഷ്കർഷിക്കുന്നു. ഇതിലൂടെ ഒരു ബാച്ച് ഭക്ഷണം മോശമായാലും, ഒരു പൈലറ്റെങ്കിലും സുരക്ഷിതനായിരിക്കും.

Image Credit : Gemini

ഭക്ഷണം കഴിക്കാനും വ്യത്യസ്‌ത സമയം

ഭക്ഷണം വ്യത്യസ്തമാണെന്ന് മാത്രമല്ല, ഇരുവരും ഭക്ഷണം കഴിക്കുന്ന സമയത്തിലും വ്യത്യാസമുണ്ടാകും. ഒരു പൈലറ്റ് ഭക്ഷണം കഴിച്ച് കുറഞ്ഞത് 30 മുതൽ 60 മിനിറ്റിന് ശേഷം മാത്രമേ മറ്റേയാൾ ഭക്ഷണം കഴിക്കാവൂ എന്ന് ചില കമ്പനികൾക്ക് നിയമമുണ്ട്. കാരണം, ഭക്ഷ്യവിഷബാധയുണ്ടായാൽ അതിന്‍റെ ലക്ഷണങ്ങൾ ആദ്യത്തെ പൈലറ്റിൽ കണ്ടുതുടങ്ങുമ്പോഴേക്കും രണ്ടാമത്തെയാൾ ആ ഭക്ഷണം കഴിക്കുന്നത് തടയാൻ ഇത് സഹായിക്കും.

Image Credit : Getty

എന്തുകൊണ്ട് ഇത്ര കര്‍ശനം?

ഈ നിയമം കർശനമാക്കാൻ ചില ഗുരുതരമായ സംഭവങ്ങൾ കാരണമായിട്ടുണ്ട്. 1982-ൽ ബോസ്റ്റണിൽ നിന്ന് ലിസ്ബണിലേക്ക് പോവുകയായിരുന്ന ഒരു വിമാനത്തിലെ പൈലറ്റും കോ-പൈലറ്റും ഉൾപ്പെടെ പത്ത് ജീവനക്കാർ 'ടപ്പിയോക്ക പുഡ്ഡിംഗ്' കഴിച്ച് അവശരായിരുന്നു. ഭാഗ്യവശാൽ, വിമാനം സുരക്ഷിതമായി തിരിച്ചിറക്കാൻ സാധിച്ചു. ഇത്തരം സംഭവങ്ങൾക്ക് ശേഷമാണ് ഈ നിയമം കർശനമായി നടപ്പിലാക്കിയത്.