സാംസങ് ഗാലക്‌സി ഇസഡ് ട്രൈഫോൾഡ് വീണ്ടും വിപണിയില്‍; സ്വന്തമാക്കാൻ ഇത് അവസാന അവസരമോ?

സ്‍മാർട്ട്ഫോൺ രംഗത്ത് പുതുമകളുമായി മുന്നേറുന്ന സാംസങ് തങ്ങളുടെ അത്യാധുനിക മോഡലായ ഗാലക്സി Z ട്രൈഫോൾഡ് വീണ്ടും വിപണിയിൽ എത്തിക്കുകയാണ്. എന്നാൽ, ഈ തിരിച്ചുവരവ് ദീർഘകാലത്തേക്കുള്ളത് അല്ല എന്ന സൂചനകളാണ് ലഭിക്കുന്നത്.

Image Credit : Getty

ഗാലക്‌സി ഇസഡ് ട്രൈഫോൾഡ്

ദക്ഷിണ കൊറിയയിൽ ഇതിനകം തന്നെ ഗാലക്‌സി ഇസഡ് ട്രൈഫോൾഡ് മോഡൽ സാംസങ് നിർത്തലാക്കിയിരുന്നു. യുഎസിലും സ്റ്റോക്ക് തീർന്നതോടെ വിൽപ്പന അവസാനിപ്പിക്കാനായിരുന്നു കമ്പനിയുടെ പദ്ധതി. എങ്കിലും, ഏപ്രിൽ 10 മുതൽ യുഎസിൽ പരിമിതമായ തോതിൽ വീണ്ടും ലഭ്യമാക്കാൻ കമ്പനി തീരുമാനിച്ചു. ഈ ഫോണിന്‍റെ വില്‍പനയ്‌ക്കായി സാംസങ്ങിന്‍റെ വെബ്‌സൈറ്റില്‍ കൗണ്ട്‌ഡൗണ്‍ തുടങ്ങി. 

Image Credit : Samsung

എവിടെ നിന്ന് വാങ്ങാം

സാംസങ്ങിന്‍റെ ഔദ്യോഗിക ഓൺലൈൻ സ്റ്റോറിനൊപ്പം, ചില തെരഞ്ഞെടുത്ത റീട്ടെയിൽ ഔട്ട്ലെറ്റുകളിലും ഈ ഡിവൈസ് ലഭ്യമാകും. എന്നാൽ, സ്റ്റോക്ക് വളരെ കുറവായിരിക്കും. പല ഫിസിക്കൽ സ്റ്റോറുകൾക്കും ഒരോ രണ്ടെണ്ണം മാത്രമേ ലഭിക്കുകയുള്ളു. ഓൺലൈൻ പ്ലാറ്റ്ഫോമുകളിൽ കുറച്ച് കൂടുതലായി ലഭിക്കാമെങ്കിലും, ആവശ്യക്കാർക്ക് ഇത് സ്വന്തമാക്കുന്നത് എളുപ്പമാകില്ല എന്നാണ് വിലയിരുത്തൽ.

Image Credit : Samsung

ഫോണിന്‍റെ വില

കഴിഞ്ഞ വർഷം ഡിസംബർ 12-ന് ദക്ഷിണ കൊറിയയിൽ അവതരിപ്പിച്ച ഗാലക്സി Z ട്രൈഫോൾഡ്, സാംസങ്ങിന്റെ എൻജിനീയറിംഗ് കഴിവിന്റെ പ്രദർശനമായിരുന്നു. അതേസമയം വലിയ വിപണികളെയും വൻ വിൽപ്പനയും ലക്ഷ്യമിട്ട് പുറത്തിറക്കിയ ഉൽപ്പന്നമായിരുന്നില്ല ഇത്. അതിന്‍റെ വിലയും സവിശേഷതകളും കണക്കിലെടുക്കുമ്പോൾ, സമ്പന്ന ഉപഭോക്താക്കളെയും ടെക് പ്രേമികളെയും ലക്ഷ്യമിട്ടതാണ് ഈ മോഡൽ. യുഎസിൽ ഇത് ഏകദേശം 2,899 ഡോളർ (ഏകദേശം 2.68 ലക്ഷം രൂപ) വിലയിൽ പുറത്തിറങ്ങിയിരുന്നു.

Image Credit : Samsung

ഫ്ലാഗ്‌ഷിപ്പ് ഫീച്ചറുകള്‍

ട്രിപ്പിൾ-ഫോൾഡ് ഡിസൈൻ ആണ് ഈ സ്‍മാർട്ട്ഫോണിന്‍റെ പ്രധാന ആകർഷണം. രണ്ട് ഹിഞ്ചുകൾ ഉപയോഗിച്ച് ഇത് ഏകദേശം 10 ഇഞ്ച് വലുപ്പമുള്ള ടാബ്‌ലെറ്റ് സ്ക്രീനായി മാറ്റാൻ സാധിക്കും. 120 ഹെര്‍ട്‌സ് റിഫ്രെഷ് റേറ്റും 1,600 നിറ്റ് വരെ ബ്രൈറ്റ്‌നസും ഉള്ള എൽടിപിഒ അമോലെഡ് ഡിസ്പ്ലേയാണ് ഇതിൽ ഉപയോഗിച്ചിരിക്കുന്നത്. 5,600 എംഎഎച്ച് ശേഷിയുള്ള ബാറ്ററിയും 45 വാട്‌സ് ഫാസ്റ്റ് ചാർജിംഗും, കൂടാതെ ക്വാൽക്കം സ്‍നാപ് ഡ്രാഗൺ എലൈറ്റ് ചിപ്സെറ്റും ഈ ഫോണിന് കരുത്ത് നൽകുന്നു.

Image Credit : Samsung

എന്തുകൊണ്ട് നിര്‍ത്തി!

ഗാലക്‌സി ഇസഡ് ട്രൈഫോൾഡിന്‍റെ ക്യാമറ വിഭാഗത്തിൽ 200എംപി പ്രധാന സെൻസർ ഉൾപ്പെടെ മൂന്ന് റിയർ ക്യാമറകളും, 10എംപി ഫ്രണ്ട് ക്യാമറയും ഉൾപ്പെടുത്തിയിട്ടുണ്ട്. ഉയർന്ന നിർമ്മാണ ചെലവും സങ്കീർണ്ണമായ ഡിസൈനും കാരണം ഈ മോഡൽ നിലനിർത്തുന്നത് വെല്ലുവിളിയായതിനാൽ, ഇത് അവസാനമായി വിപണിയിൽ എത്തുന്നതായിരിക്കാം എന്ന് വിദഗ്‌ധര്‍ വിലയിരുത്തുന്നു.