മെറ്റബോളിസം, ഊർജ്ജസ്വലത, മുടിയുടെ വളർച്ച, മാനസികാവസ്ഥ എന്നിവയെല്ലാം നിയന്ത്രിക്കുന്ന ഹോർമോണുകൾ ഉത്പാദിപ്പിക്കുന്നത് തൈറോയ്ഡ് ആണ്.
അമിതമായ ക്ഷീണം, നിരന്തരമുള്ള തളർച്ച, മുടികൊഴിച്ചിൽ എന്നിവയെല്ലാം പലപ്പോഴും മാനസിക സമ്മർദ്ദം മൂലമുണ്ടാകുന്ന പ്രശ്നങ്ങളായാണ് നമ്മൾ കണക്കാക്കാറുള്ളത്. എന്നാൽ നിങ്ങളുടെ ശരീരത്തിലെ തൈറോയ്ഡ് ഗ്രന്ഥിയുടെ പ്രവർത്തനവുമായി ഇവയ്ക്ക് അടുത്ത ബന്ധമുണ്ട്. മെറ്റബോളിസം, ഊർജ്ജസ്വലത, മുടിയുടെ വളർച്ച, മാനസികാവസ്ഥ എന്നിവയെല്ലാം നിയന്ത്രിക്കുന്ന ഹോർമോണുകൾ ഉത്പാദിപ്പിക്കുന്നത് തൈറോയ്ഡ് ആണ്. ഈ ഹോർമോണുകളുടെ അളവിൽ വ്യതിയാനമുണ്ടാകുമ്പോൾ അത് വിട്ടുമാറാത്ത ക്ഷീണത്തിലേക്കും മുടികൊഴിച്ചിലിലേക്കും നയിക്കാം.
ഈ ലക്ഷണങ്ങൾ അവഗണിക്കരുത്
1. വിട്ടുമാറാത്ത ക്ഷീണം
രാത്രി നന്നായി ഉറങ്ങിയിട്ടും രാവിലെ എഴുന്നേൽക്കുമ്പോൾ കടുത്ത തളർച്ചയും ക്ഷീണവും അനുഭവപ്പെടുന്നുണ്ടെങ്കിൽ അത് തൈറോയ്ഡ് ഹോർമോണിന്റെ അസന്തുലിതാവസ്ഥ കാരണമാകാം. ഹൈപ്പോതൈറോയ്ഡിസം ഉള്ളവരിൽ മെറ്റബോളിസം മന്ദഗതിയിലാകുന്നത് ശരീരത്തിലെ ഊർജ്ജ ഉത്പാദനം കുറയ്ക്കുന്നു. ഇത് ദിവസം മുഴുവൻ നീണ്ടുനിൽക്കുന്ന ക്ഷീണത്തിന് കാരണമാകും.
2. അമിതമായ മുടികൊഴിച്ചിൽ
Related Articles
സാധാരണ രീതിയിലുള്ള മുടികൊഴിച്ചിലിനേക്കാൾ കൂടുതൽ മുടി കൊഴിയുകയോ, മുടിയുടെ കട്ടി കുറഞ്ഞ് വരികയോ ചെയ്യുന്നത് തൈറോയ്ഡ് പ്രശ്നത്തിന്റെ ലക്ഷണമാകാം. തൈറോയ്ഡ് ഹോർമോണുകൾ മുടിയുടെ വളർച്ചയെ നേരിട്ട് ബാധിക്കുന്നതിനാലാണ് ഇങ്ങനെ സംഭവിക്കുന്നത്.
3. ശരീരഭാരത്തിലെ വ്യത്യാസങ്ങൾ
ഭക്ഷണരീതിയിലോ ജീവിതശൈലിയിലോ വലിയ മാറ്റങ്ങൾ വരുത്താതിരുന്നിട്ടും ശരീരഭാരം പെട്ടെന്ന് കൂടുകയോ കുറയുകയോ ചെയ്യുന്നത് തൈറോയ്ഡിന്റെ പ്രശ്നമാണ്.
4. വരണ്ട ചർമ്മവും പൊട്ടിപ്പോകുന്ന നഖങ്ങളും
ശരീരത്തിലെ കോശങ്ങളുടെ പുനരുൽപ്പാദനം മന്ദഗതിയിലാകുന്നതോടെ ചർമ്മത്തിലെ ഈർപ്പം നഷ്ടപ്പെടുകയും ചർമ്മം വരണ്ടുപോവുകയും ചെയ്യും. ഇതിനൊപ്പം തന്നെ നഖങ്ങൾ ബലമില്ലാതാവുക, നഖങ്ങളിൽ വരകൾ വീഴുക, പെട്ടെന്ന് പൊട്ടിപ്പോവുക എന്നിവയും തൈറോയ്ഡ് കുറയുന്നതിന്റെ ലക്ഷണങ്ങളാണ്.
5. മാനസികാവസ്ഥയിലെ മാറ്റങ്ങൾ
തൈറോയ്ഡ് ഗ്രന്ഥിയുടെ പ്രവർത്തനം തലച്ചോറിന്റെ പ്രവർത്തനങ്ങളെയും ന്യൂറോട്രാൻസ്മിറ്ററുകളെയും നേരിട്ട് ബാധിക്കാറുണ്ട്. ഇതിന്റെ ഫലമായി കാര്യങ്ങളിൽ ശ്രദ്ധ കേന്ദ്രീകരിക്കാൻ ബുദ്ധിമുട്ട് അനുഭവപ്പെടുക, അകാരണമായ ദേഷ്യം, മൂഡ് സ്വിങ്സ്, വിഷാദരോഗ ലക്ഷണങ്ങൾ എന്നിവ ഉണ്ടാകാം.
6. ശ്രദ്ധിക്കേണ്ടത്
ഈ ലക്ഷണങ്ങൾ തുടർച്ചയായി കാണപ്പെടുന്നുണ്ടെങ്കിൽ സ്വയം ചികിത്സ ചെയ്യാതെ ഡോക്ടറെ കണ്ട് തൈറോയ്ഡ് പരിശോധന നടത്താൻ മടിക്കരുത്.
