ആർത്തവ തീയതികളിലെ ചെറിയ വ്യതിയാനങ്ങൾ എപ്പോഴും ആശങ്കാജനകമല്ലെങ്കിലും, പെട്ടെന്നുണ്ടാകുന്ന മാറ്റങ്ങളോ രക്തസ്രാവത്തിലെ വ്യത്യാസങ്ങളോ ശരീരത്തിലെ ഏതെങ്കിലും ആരോഗ്യപ്രശ്നങ്ങളുടെ ലക്ഷണമാകാം.
ഒരു സ്ത്രീയുടെ മൊത്തത്തിലുള്ള ആരോഗ്യത്തിന്റെ സുപ്രധാന സൂചകമാണ് ആർത്തവചക്രം. ആർത്തവ തീയതികളിലെ ചെറിയ വ്യതിയാനങ്ങൾ എപ്പോഴും ആശങ്കാജനകമല്ലെങ്കിലും, പെട്ടെന്നുണ്ടാകുന്ന മാറ്റങ്ങളോ രക്തസ്രാവത്തിലെ വ്യത്യാസങ്ങളോ ശരീരത്തിലെ ഏതെങ്കിലും ആരോഗ്യപ്രശ്നങ്ങളുടെ ലക്ഷണമാകാം. ആർത്തവചക്രത്തെ സ്വാധീനിക്കുന്ന ഒരു പ്രധാന ഘടകമാണ് ശരീരത്തിലെ ഇരുമ്പിന്റെ കുറവ്. ഇരുമ്പ് ശരീരത്തിന് ഒഴിച്ചുകൂടാനാവാത്ത ധാതുവാണ്.
ഇരുമ്പിന്റെ കുറവ് ആർത്തവം വൈകാൻ കാരണമാകുമോ
ഇതിന്റെ കുറവ് പ്രത്യുത്പാദന വ്യവസ്ഥയെ സാരമായി ബാധിക്കുന്നു. അതിനാൽ ഇരുമ്പിന്റെ കുറവ് ആർത്തവം വൈകാൻ കാരണമാകുന്നു. ശരീരത്തിൽ ഇരുമ്പിന്റെ അളവ് അമിതമായി കുറയുന്നത് ആർത്തവം വൈകുന്നതിനും ചിലപ്പോൾ ആർത്തവം നിൽക്കുന്നതിനും കാരണമായേക്കാം. എന്നാൽ ആർത്തവം വൈകുന്നതിന് പിന്നിലെ ഒരേയൊരു കാരണം ഇരുമ്പിന്റെ കുറവ് മാത്രമായിരിക്കണമെന്നില്ല. ശരീരത്തിലുടനീളം ഓക്സിജൻ എത്തിക്കുന്ന ചുവന്ന രക്താണുക്കളിലെ ഹീമോഗ്ലോബിൻ ഉത്പാദിപ്പിക്കാൻ ഇരുമ്പ് അത്യാവശ്യമാണ്. ഇരുമ്പിന്റെ അളവ് വളരെ കുറയുമ്പോൾ ഹീമോഗ്ലോബിൻ ഉത്പാദനം കുറയുകയും ഇത് അയൺ ഡെഫിഷ്യൻസി അനീമിയയിലേക്ക് നയിക്കുകയും ചെയ്യുന്നു. പ്രത്യുത്പാദന വ്യവസ്ഥയുടെ സുഗമമായ പ്രവർത്തനത്തിന് കൃത്യമായ പോഷകാഹാരം, ഓക്സിജൻ ലഭ്യത, ഹോർമോൺ സന്തുലിതാവസ്ഥ എന്നിവ ആവശ്യമായതിനാൽ ഇരുമ്പിന്റെ കുറവ് ആർത്തവചക്രത്തെ ബാധിക്കുന്നു.
ഇരുമ്പിന്റെ കുറവ് ആർത്തവത്തെ എങ്ങനെ ബാധിക്കുന്നു?
ഇരുമ്പിന്റെ കുറവ് ഹോർമോൺ ഉത്പാദനത്തെയും അതിന്റെ സന്തുലിതാവസ്ഥയെയും ബാധിക്കുന്നു. കൃത്യമായ ആർത്തവചക്രത്തിന് ആവശ്യമായ ഹോർമോൺ സമതുലിതാവസ്ഥ തെറ്റുന്നതോടെ ആർത്തവം ക്രമം തെറ്റുകയോ വൈകുകയോ ചെയ്യുന്നു.
Related Articles
അമിത രക്തസ്രാവത്തിന് ഇത് കാരണമാകുമോ?
ഇരുമ്പിന്റെ കുറവ് ആർത്തവം വൈകുന്നതിന് മാത്രമല്ല, അമിത രക്തസ്രാവത്തിനും കാരണമാകും. വിളർച്ച രക്തം കട്ടപിടിക്കുന്ന പ്രക്രിയയെ ബാധിക്കുന്നത് വഴി ദീർഘനേരമുള്ളതോ അമിതമായതോ ആയ രക്തസ്രാവത്തിലേക്ക് നയിച്ചേക്കാം. അമിത രക്തസ്രാവം ശരീരത്തിൽ നിന്ന് കൂടുതൽ ഇരുമ്പ് നഷ്ടപ്പെടാൻ ഇടയാക്കുന്നു. ഈ സമയത്ത് ഇരുമ്പിന്റെ അളവ് വീണ്ടും വർദ്ധിപ്പിച്ചില്ലെങ്കിൽ കുറവ് കൂടുതൽ കഠിനമാവുകയും അത് വീണ്ടും ആർത്തവ ക്രമക്കേടുകൾക്ക് കാരണമാവുകയും ചെയ്യും.
ഗർഭാശയത്തെ ബാധിക്കുമോ?
ഇരുമ്പിന്റെ കുറവ് ഗർഭാശയത്തിന്റെ ആരോഗ്യത്തെയും ഗർഭാശയ ഭിത്തിയുടെ ആരോഗ്യത്തെയും ബാധിക്കാം. എൻഡോമെട്രിയത്തിന്റെ വികാസത്തിൽ ഉണ്ടാകുന്ന തടസ്സങ്ങൾ ആർത്തവത്തിന്റെ സമയം, രക്തസ്രാവത്തിന്റെ അളവ് എന്നിവയിൽ മാറ്റങ്ങൾ വരുത്തും. എന്നാൽ ആർത്തവത്തിലുണ്ടാകുന്ന എല്ലാ മാറ്റങ്ങൾക്കും കാരണം ഇരുമ്പിന്റെ കുറവാകണമെന്നില്ല, മറ്റ് നിരവധി ആരോഗ്യപ്രശ്നങ്ങളും ഇതിന് കാരണമാകാം.
