ബ്രെഡ് റോളുകൾ, പേസ്ട്രികൾ, ഡോനട്ട്സ് തുടങ്ങിയ മധുരമുള്ള ഭക്ഷണപദാർത്ഥങ്ങൾ രക്തത്തിലെ പഞ്ചസാരയുടെ അളവ് പെട്ടെന്ന് ഉയരാൻ കാരണമാകുമെന്ന് ഡയറ്റീഷ്യൻ രഞ്ജന സിംഗ് പറഞ്ഞു.
ഒരു ദിവസത്തെ ഏറ്റവും പ്രധാനപ്പെട്ട ഭക്ഷണമാണ് പ്രാതൽ. ദിവസം മുഴുവനുമുള്ള ഊർജ്ജം നൽകുന്നതിന് പ്രാതൽ സഹായിക്കുന്നു. എന്നാൽ പ്രാതലിൽ അനാരോഗ്യകരമായ ഭക്ഷണങ്ങൾ ഉൾപ്പെടുത്തിയാൽ ക്ഷീണവും വയറു വീർത്തതുപോലെയുള്ള അസ്വസ്ഥതയും അനുഭവപ്പെട്ടേക്കാം.
രാവിലെ എളുപ്പത്തിൽ ലഭ്യമാകുന്ന പല ഭക്ഷണങ്ങളും രക്തത്തിലെ പഞ്ചസാരയുടെ അളവ് പെട്ടെന്ന് ഉയർത്തുകയും ദിവസം തുടങ്ങുന്നതിനു മുൻപേ തന്നെ ശരീരത്തിന്റെ മെറ്റബോളിസം മന്ദഗതിയിലാക്കുകയും ചെയ്യുന്നു. ചില ഭക്ഷണങ്ങൾ മുഴുവൻ ഊർജ്ജസ്വലത നിലനിർത്തുന്നതിനും പ്രതിരോധശേഷി കൂട്ടാനും സഹായിക്കുന്നു.
ബ്രെഡ് റോളുകൾ, പേസ്ട്രികൾ, ഡോനട്ട്സ് തുടങ്ങിയ മധുരമുള്ള ഭക്ഷണപദാർത്ഥങ്ങൾ രക്തത്തിലെ പഞ്ചസാരയുടെ അളവ് പെട്ടെന്ന് ഉയരാൻ കാരണമാകുമെന്ന് ഡയറ്റീഷ്യൻ രഞ്ജന സിംഗ് പറഞ്ഞു. പഞ്ചസാരയുടെ അളവിലുണ്ടാകുന്ന ഈ പെട്ടെന്നുള്ള വർദ്ധനവ് പിന്നീട് അതിവേഗത്തിലുള്ള കുറവിനും കാരണമാകുന്നു. ഇത് ഭക്ഷണം കഴിച്ചതിന് തൊട്ടുപിന്നാലെ തന്നെ ക്ഷീണവും വിശപ്പും മന്ദതയും അനുഭവപ്പെടാൻ ഇടയാക്കുന്നു.
Related Articles
പ്രഭാതഭക്ഷണത്തിൽ സമോസ, ആലു ടിക്കി, എണ്ണമയം കൂടുതലുള്ള പൊരിച്ച പൊറോട്ട എന്നിവ ഉൾപ്പെടുത്തുന്നത് അവ ദഹനവ്യവസ്ഥയ്ക്ക് അമിതഭാരമുണ്ടാക്കുന്നു. ദിവസത്തിന്റെ തുടക്കത്തിൽ തന്നെ എണ്ണമയമുള്ള ഭക്ഷണങ്ങൾ കഴിക്കുന്നത് ദഹനം മന്ദഗതിയിലാക്കുകയും വയറു വീർക്കുന്നതിനും അസിഡിറ്റിക്കും കാരണമാവുകയും ചെയ്യുന്നു. കൂടാതെ, ദീർഘകാലാടിസ്ഥാനത്തിൽ ഹൃദ്രോഗസാധ്യത വർദ്ധിപ്പിക്കുകയും ചെയ്യുന്നു.
പാക്ക് ചെയ്ത പഴച്ചാറുകളിലും മധുരം ചേർത്ത പാനീയങ്ങളിലും നാരുകളും അവശ്യ വിറ്റാമിനുകളും അടങ്ങിയിട്ടില്ല. അധിക പഞ്ചസാരയും കൃത്രിമ രുചിക്കൂട്ടുകളും അടങ്ങിയ ഇത്തരം പാനീയങ്ങൾ രക്തത്തിലെ ഇൻസുലിൻ്റെ അളവ് പെട്ടെന്ന് ഉയർത്താനും ശരീരഭാരം കൂടാനും കാരണമാകുന്നു.
സംസ്കരിച്ച കോൺഫ്ലേക്കുകളിലും രുചി ചേർത്ത ഇൻസ്റ്റന്റ് ഓട്സിലും പലപ്പോഴും ഒളിഞ്ഞിരിക്കുന്ന പഞ്ചസാരയും പ്രിസർവേറ്റീവുകളും അടങ്ങിയിട്ടുണ്ടാകാം. ഇവ പെട്ടെന്ന് തയ്യാറാക്കാമെന്ന സൗകര്യം നൽകുന്നുണ്ടെങ്കിലും, ഇവയിൽ നാരുകളും (fiber) ഗുണമേന്മയുള്ള പ്രോട്ടീനും കുറവാണ്. ഇത് ഉച്ചഭക്ഷണത്തിന് മുൻപായിത്തന്നെ വിശപ്പ്, അസ്വസ്ഥത, ഊർജ്ജം പെട്ടെന്ന് കുറയുന്ന അവസ്ഥ എന്നിവയ്ക്ക് കാരണമാകുന്നു.
ബ്രേക്ക് ഫാസ്റ്റിന് ബ്രെഡും ജാമും ഉൾപ്പെടുത്തുന്നത് ആരോഗ്യകരമല്ല. വെളുത്ത ബ്രെഡ് മോശം മെറ്റബോളിസത്തിന് ഇടയാക്കുന്നു. ഇത് ശരീരത്തിന് അവശ്യ വിറ്റാമിനുകൾ, ആരോഗ്യകരമായ കൊഴുപ്പുകൾ, നാരുകൾ എന്നിവ നഷ്ടപ്പെടുത്തുന്നു.
ബേക്കൺ, സോസേജ്, സംസ്കരിച്ച മാംസം എന്നിവയിൽ സോഡിയം, നൈട്രേറ്റുകൾ, പൂരിത കൊഴുപ്പുകൾ എന്നിവ ഉയർന്ന അളവിൽ അടങ്ങിയിട്ടുണ്ട്. പ്രഭാതഭക്ഷണത്തിൽ ഇവ പതിവായി ഉൾപ്പെടുത്തുന്നത് ശരീരത്തിൽ വീക്കം വർദ്ധിപ്പിക്കാനും രക്തസമ്മർദ്ദം ഉയർത്താനും ഹൃദയ-രക്തക്കുഴൽ വ്യവസ്ഥയിൽ അനാവശ്യ സമ്മർദ്ദം ചെലുത്താനും കാരണമാകുന്നു.
ഫ്ലേവേർഡ് യോഗർട്ടുകൾ പലപ്പോഴും ആരോഗ്യകരമാണെന്ന് പലരും കരുതുന്നുണ്ട്., അവയിൽ പലതിലും ഒരു കാൻഡി ബാറിലെന്നപോലെ ഉയർന്ന അളവിൽ പഞ്ചസാര അടങ്ങിയിട്ടുണ്ട്. അമിതമായ പഞ്ചസാര പ്രോബയോട്ടിക്സിലൂടെ ലഭിക്കുന്ന ഗുണങ്ങളെ ഇല്ലാതാക്കുകയും, കുടലിന്റെ ആരോഗ്യം മെച്ചപ്പെടുത്തുന്നതിന് പകരം രക്തത്തിലെ പഞ്ചസാരയുടെ അളവ് കുത്തനെ ഉയർത്തുകയും ചെയ്യുന്നു. അതിനാൽ, അവയ്ക്ക് പകരം സാധാരണ തൈര് കഴിക്കുക.
വെറും വയറ്റിൽ മധുരമുള്ള കാപ്പിയോ കടുപ്പമുള്ള ചായയോ കുടിക്കുന്നത് അമിതമായ ഗ്യാസ്ട്രിക് ആസിഡ് ഉൽപാദനത്തിന് കാരണമാകുന്നു. ഈ ശീലം നെഞ്ചെരിച്ചിൽ, ദഹനപ്രശ്നങ്ങൾ, സമ്മർദ്ദ ഹോർമോൺ വർദ്ധനവ് എന്നിവയിലേക്ക് നയിക്കുന്നു.
