അപ്രതീക്ഷിതമായി ഉണ്ടാകുന്ന സന്ധിവേദന, കാൽവിരലുകളിലോ മുട്ടുകളിലോ ഉണ്ടാകുന്ന വീക്കം, വിട്ടുമാറാത്ത കാഠിന്യം എന്നിവ ഉയർന്ന യൂറിക് ആസിഡിന്റെ ലക്ഷണമാവാം.
ശരീരത്തിൽ യൂറിക് ആസിഡിന്റെ അളവ് ഉയരുന്നത് ഇന്ന് പ്രായഭേദമന്യേ പലരിലും കണ്ടുവരുന്ന ഒരു പൊതു പ്രശ്നമായി മാറിയിരിക്കുന്നു. അപ്രതീക്ഷിതമായി ഉണ്ടാകുന്ന സന്ധിവേദന, കാൽവിരലുകളിലോ മുട്ടുകളിലോ ഉണ്ടാകുന്ന വീക്കം, വിട്ടുമാറാത്ത കാഠിന്യം എന്നിവ ഉയർന്ന യൂറിക് ആസിഡിന്റെ ലക്ഷണമാവാം. നമ്മൾ കഴിക്കുന്ന ഭക്ഷണങ്ങളിലെ പ്യൂരിൻ എന്ന ഘടകത്തെ ശരീരം വിഘടിപ്പിക്കുമ്പോഴാണ് യൂറിക് ആസിഡ് ഉണ്ടാകുന്നത്. ഇത് കൃത്യസമയത്ത് ശ്രദ്ധിക്കാതിരുന്നാൽ ഗൗട്ട് രോഗത്തിനും, വൃക്കയിലെ കല്ലുകൾക്കും, സന്ധികൾക്ക് കേടുപാടുകൾ ഉണ്ടാവാനും കാരണമാകും. ശരീരത്തിന് പുറന്തള്ളാൻ കഴിയുന്നതിലും കൂടുതൽ യൂറിക് ആസിഡ് ഉത്പാദിപ്പിക്കപ്പെടുമ്പോൾ, അവ ക്രിസ്റ്റലുകളായി സന്ധികളിൽ അടിയുകയും വീക്കവും വേദനയും ഉണ്ടാക്കുകയും ചെയ്യുന്നു. ഭക്ഷണക്രമത്തിൽ വരുത്തുന്ന ചെറിയ മാറ്റങ്ങൾ കൊണ്ട് ഇതിൽ നിന്ന് വലിയ ആശ്വാസം നേടാനാകും.
യൂറിക് ആസിഡ് നിയന്ത്രിക്കുന്നതിൽ ഭക്ഷണത്തിനുള്ള പങ്കെന്താണ്?
യൂറിക് ആസിഡ് നിയന്ത്രിക്കുന്നതിൽ ഭക്ഷണരീതിക്ക് വലിയ പങ്കുണ്ട്. യൂറിക് ആസിഡ് പെട്ടെന്ന് ഉയരുന്നത് ഭക്ഷണക്രമവുമായി നേരിട്ട് ബന്ധപ്പെട്ടിരിക്കുന്നു. ചില ഘട്ടങ്ങളിൽ മരുന്നുകൾ ആവശ്യമാണെങ്കിലും, ഭക്ഷണത്തിൽ വരുത്തുന്ന മാറ്റങ്ങളാണ് ഇതിനെ നിയന്ത്രിക്കാനുള്ള ആദ്യത്തെയും ഏറ്റവും ഫലപ്രദവുമായ മാർഗ്ഗം. യൂറിക് ആസിഡ് കൂടുതലാണെങ്കിൽ ഉടൻ ഒഴിവാക്കേണ്ട ഭക്ഷണങ്ങൾ ഇതാണ്.
1. റെഡ് മീറ്റ്
റെഡ് മീറ്റിൽ പ്യൂരിന്റെ അളവ് വളരെ കൂടുതലാണ്. ഇത് പതിവായി കഴിക്കുന്നത് യൂറിക് ആസിഡ് ഉയരുന്നതിനും ഗൗട്ട് രോഗത്തിനും സന്ധിവീക്കത്തിനും കാരണമാകുന്നു.
Related Articles
2. ഓർഗൻ മീറ്റ്
മൃഗങ്ങളുടെ കരൾ, വൃക്ക തുടങ്ങിയ ഓർഗൻ മീറ്റിൽ കടുത്ത പ്യൂരിൻ അടങ്ങിയിട്ടുണ്ട്. ഉയർന്ന യൂറിക് ആസിഡോ ഗൗട്ടോ ഉള്ളവർ ഇവ പൂർണ്ണമായും ഒഴിവാക്കണം. ഇവ ചെറിയ അളവിൽ കഴിച്ചാൽ പോലും കഠിനമായ വേദനയ്ക്ക് കാരണമായേക്കാം.
3. ചില തരം കടൽമത്സ്യങ്ങൾ
ചെമ്മീൻ, മത്തി, നെത്തോലി, ഷെൽഫിഷ് തുടങ്ങിയവ ഗൗട്ട് ഉണ്ടാക്കുന്ന പ്രധാന ഘടകങ്ങളാണ്. ഇവയ്ക്ക് പകരം സാൽമൺ പോലുള്ള പ്യൂരിൻ കുറഞ്ഞ മത്സ്യങ്ങൾ മിതമായ അളവിൽ കഴിക്കുന്നതാണ് സുരക്ഷിതം.
4. സംസ്കരിച്ചതും ജങ്ക് ഫുഡുകളുമായ ആഹാരങ്ങൾ
പാക്കറ്റ് ലഘുഭക്ഷണങ്ങൾ, വറുത്തതും പൊരിച്ചതുമായ വിഭവങ്ങൾ, ഫാസ്റ്റ് ഫുഡ് എന്നിവ ശരീരത്തിൽ വീക്കം കൂട്ടുകയും മെറ്റബോളിസത്തെ തകരാറിലാക്കുകയും ചെയ്യുന്നു. ഇവയിൽ പ്യൂരിൻ നേരിട്ട് അടങ്ങിയിട്ടില്ലെങ്കിലും, യൂറിക് ആസിഡ് നിയന്ത്രണത്തെയും സന്ധികളുടെ ആരോഗ്യത്തെയും ഇവ പ്രതികൂലമായി ബാധിക്കും.
5. മദ്യം
യൂറിക് ആസിഡിനെ പുറന്തള്ളാനുള്ള ശരീരത്തിന്റെ ശേഷിയെ മദ്യം തടസ്സപ്പെടുത്തുന്നു. ബിയറിൽ മദ്യത്തിന് പുറമെ പ്യൂരിനും അടങ്ങിയിരിക്കുന്നതിനാൽ ഇത് ഇരട്ടി അപകടമാണ്. ഗൗട്ട് ലക്ഷണങ്ങൾ ഉള്ളപ്പോൾ ബിയർ പൂർണ്ണമായും ഒഴിവാക്കാനാണ് ഡോക്ടർമാർ നിർദ്ദേശിക്കുന്നത്.
6. മധുരപാനീയങ്ങളും സോഫ്റ്റ് ഡ്രിങ്കുകളും
മധുരപാനീയങ്ങളിൽ അടങ്ങിയിരിക്കുന്ന ഫ്രക്ടോസ് ശരീരത്തിൽ യൂറിക് ആസിഡ് ഉത്പാദനം നേരിട്ട് വർദ്ധിപ്പിക്കുന്നു. യൂറിക് ആസിഡ് കൂട്ടുന്ന ഒരേയൊരു കാർബോഹൈഡ്രേറ്റ് ഫ്രക്ടോസ് ആണ്.
