ഹൃദ്രോഗവും വൃക്കരോഗവും തമ്മിൽ പരസ്പര ബന്ധമുണ്ടെന്ന് ലോകാരോഗ്യ സംഘടന ചൂണ്ടിക്കാട്ടുന്നു. അതായത്, വൃക്കരോഗം ഹൃദ്രോഗത്തിന് കാരണമാകുന്നതുപോലെ തന്നെ ഹൃദ്രോഗം വൃക്കരോഗത്തിനും കാരണമാകാം. പ്രമേഹം, ഉയർന്ന രക്തസമ്മർദ്ദം തുടങ്ങിയ രോഗാവസ്ഥകൾ ഇവ രണ്ടിനുമുള്ള സാധ്യത വർദ്ധിപ്പിക്കുകയും ചെയ്യുന്നു.
ഹൃദ്രോഗവും വൃക്കരോഗവും തമ്മിൽ അടുത്ത ബന്ധമുണ്ട്. വൃക്കയ്ക്കുണ്ടാകുന്ന തകരാറുകൾ വളരെ വെെകിയാകും പലരും അറിയുന്നത്. രക്തം, മൂത്രം എന്നിവയുടെ പരിശോധനകളും പതിവ് ആരോഗ്യ പരിശോധനകളും ഹൃദ്രോഗികൾക്ക് വിട്ടുമാറാത്ത വൃക്കരോഗം നേരത്തേ കണ്ടെത്താനും, ഭാവിയിൽ ഹൃദയ-വൃക്ക സംബന്ധമായ ആരോഗ്യപ്രശ്നങ്ങൾക്കുള്ള സാധ്യത കുറയ്ക്കാനും സഹായിക്കും.
ഹൃദയം വൃക്കകളിലേക്ക് രക്തം പമ്പ് ചെയ്യുമ്പോൾ ശരീരത്തിലെ ദ്രാവകങ്ങൾ, ഇലക്ട്രോലൈറ്റുകൾ, രക്തസമ്മർദ്ദം എന്നിവയെ വൃക്കകൾ നിയന്ത്രിക്കുന്നു. ഇവയിലൊന്നിനുണ്ടാകുന്ന തകരാറ് മറ്റേ അവയവത്തിന് അധിക സമ്മർദ്ദം ഉണ്ടാക്കിയേക്കാം. ഹൃദ്രോഗവും വൃക്കരോഗവും തമ്മിൽ പരസ്പര ബന്ധമുണ്ടെന്ന് ലോകാരോഗ്യ സംഘടന ചൂണ്ടിക്കാട്ടുന്നു. അതായത്, വൃക്കരോഗം ഹൃദ്രോഗത്തിന് കാരണമാകുന്നതുപോലെ തന്നെ ഹൃദ്രോഗം വൃക്കരോഗത്തിനും കാരണമാകാം. പ്രമേഹം, ഉയർന്ന രക്തസമ്മർദ്ദം തുടങ്ങിയ രോഗാവസ്ഥകൾ ഇവ രണ്ടിനുമുള്ള സാധ്യത വർദ്ധിപ്പിക്കുകയും ചെയ്യുന്നു.
വിട്ടുമാറാത്ത വൃക്കരോഗം പലപ്പോഴും ലക്ഷണങ്ങളൊന്നും പ്രകടമാക്കാതെയാണ് രൂപപ്പെടുന്നത് എന്നതാണ് ഇതിലെ പ്രധാന പ്രശ്നം. വേദനയോ മൂത്രമൊഴിക്കുന്നതിലെ മാറ്റങ്ങളോ മറ്റ് പ്രകടമായ ലക്ഷണങ്ങളോ ഇല്ലാതെ തന്നെ ഒരാൾക്ക് വൃക്കയ്ക്ക് കാര്യമായ തകരാറ് സംഭവിക്കാം. അതിനാൽ, ഹൃദ്രോഗം, ഹൃദയസ്തംഭനം, ഉയർന്ന രക്തസമ്മർദ്ദം അല്ലെങ്കിൽ പ്രമേഹം എന്നിവയുള്ളവർക്ക്, ദീർഘകാല ഹൃദയ സംരക്ഷണത്തിന്റെ ഭാഗമായി പതിവായി വൃക്കകളുടെ പ്രവർത്തനം പരിശോധിക്കുന്നത് വളരെ പ്രധാനമാണ്. വൃക്കരോഗം നേരത്തേ കണ്ടെത്തുന്നതിനായുള്ള പ്രധാനപ്പെട്ട ലക്ഷണങ്ങളെ കുറിച്ചാണ് ഇനി പറയുന്നത്.
Related Articles
സീറം ക്രിയാറ്റിനിൻ, eGFR
സാധാരണയായി വൃക്കകൾ പുറന്തള്ളുന്ന ഒരു മാലിന്യമായ 'സീറം ക്രിയാറ്റിനിൻ' (serum creatinine) അളവ് ഒരു സാധാരണ രക്തപരിശോധനയിലൂടെ കണ്ടെത്താനാകും. വൃക്കകൾ എത്ര കാര്യക്ഷമമായാണ് രക്തം ശുദ്ധീകരിക്കുന്നത് എന്ന് സൂചിപ്പിക്കുന്ന 'എസ്റ്റിമേറ്റഡ് ഗ്ലോമെറുലാർ ഫിൽട്രേഷൻ റേറ്റ്' (eGFR) കണക്കാക്കാൻ, ഡോക്ടർമാർ ക്രിയാറ്റിനിൻ പരിശോധനാഫലത്തോടൊപ്പം മറ്റ് ഘടകങ്ങളെയും കൂടി ആശ്രയിക്കുന്നു. കുറഞ്ഞത് മൂന്ന് മാസത്തോളം eGFR നിരക്ക് 60 mL/min/1.73 m2-ൽ താഴെയായി തുടരുന്നത് വിട്ടുമാറാത്ത വൃക്കരോഗത്തെ (CKD) സൂചിപ്പിക്കാം.
മൂത്രത്തിലെ ആൽബുമിൻ-ക്രിയാറ്റിനിൻ അനുപാതം
വൃക്കകൾക്ക് സംഭവിക്കുന്ന പ്രാരംഭഘട്ടത്തിലുള്ള തകരാറുകൾ കണ്ടെത്തുന്നതിനുള്ള ഏറ്റവും ലളിതമായ മാർഗ്ഗങ്ങളിലൊന്നാണ് മൂത്രത്തിലെ ആൽബുമിൻ-ക്രിയാറ്റിനിൻ അനുപാതം (uACR). ആരോഗ്യകരമായ വൃക്കകൾ രക്തത്തിലെ പ്രോട്ടീനായ ആൽബുമിനെ ശരീരത്തിൽ തന്നെ നിലനിർത്തുന്നു; എന്നാൽ വൃക്കയിലെ ഫിൽട്ടറിംഗ് സംവിധാനത്തിന് (അരിക്കൽ പ്രക്രിയയ്ക്ക്) തകരാറുണ്ടാകുമ്പോൾ ആൽബുമിൻ മൂത്രത്തിലൂടെ പുറത്തേക്ക് പോകാൻ ഇടയാകുന്നു. eGFR നിരക്ക് 60-ന് മുകളിലാണെങ്കിൽ പോലും, uACR 30 mg/g-ൽ കൂടുതലാണെങ്കിൽ അത് വൃക്ക തകരാറിനെ സൂചിപ്പിക്കുന്നു.
രക്തസമ്മർദ്ദം
രക്തസമ്മർദ്ദം ഹൃദയത്തിന്റെയും വൃക്കയുടെയും ആരോഗ്യത്തെ സൂചിപ്പിക്കുന്ന ഒരു ഘടകമാണ്. ദീർഘകാലം നീണ്ടുനിൽക്കുന്ന ഉയർന്ന രക്തസമ്മർദ്ദം വൃക്കയ്ക്കുള്ളിലെ ചെറിയ രക്തക്കുഴലുകൾക്ക് കേടുപാടുകൾ വരുത്തിയേക്കാം. അതേസമയം, വൃക്കയുടെ പ്രവർത്തനം കുറയുന്നത് രക്തസമ്മർദ്ദം നിയന്ത്രിക്കുന്നത് കൂടുതൽ പ്രയാസകരമാക്കുകയും ചെയ്യാം.
രക്തത്തിലെ ഗ്ലൂക്കോസ് അല്ലെങ്കിൽ HbA1c
ഹൃദ്രോഗത്തിനും വൃക്കരോഗത്തിനും ഒരു പ്രധാന കാരണമാണ് പ്രമേഹം. രക്തത്തിലെ ഗ്ലൂക്കോസിന്റെ അളവ് കൂടുന്നത് വൃക്കയിലെ ഫിൽട്ടറിംഗ് യൂണിറ്റുകളെ ക്രമേണ തകരാറിലാക്കാം. ഇതിന്റെ പ്രാരംഭ ലക്ഷണമായി പലപ്പോഴും 'ആൽബുമിനൂറിയ' (മൂത്രത്തിലൂടെ ആൽബുമിൻ എന്ന പ്രോട്ടീൻ നഷ്ടപ്പെടുന്നത്) കണ്ടുവരുന്നു. ടൈപ്പ് 2 പ്രമേഹമുള്ളവർ വർഷത്തിലൊരിക്കലെങ്കിലും eGFR, uACR പരിശോധനകൾക്ക് വിധേയരാകണമെന്ന് അമേരിക്കൻ ഡയബറ്റിസ് അസോസിയേഷൻ വ്യക്തമാക്കുന്നു.
പതിവ് മൂത്രപരിശോധന
മൂത്രത്തിലെ രക്തം, പ്രോട്ടീൻ അല്ലെങ്കിൽ മറ്റ് അസ്വാഭാവികതകൾ എന്നിവയുടെ സാന്നിധ്യം പോലുള്ള അധിക സൂചനകൾ നൽകാൻ ഒരു അടിസ്ഥാന മൂത്രപരിശോധനയ്ക്ക് സാധിക്കും. വിട്ടുമാറാത്ത വൃക്കരോഗം വിലയിരുത്തുന്നതിൽ uACR, eGFR എന്നിവയ്ക്ക് പകരമാവില്ലെങ്കിലും, തുടർപരിശോധന ആവശ്യമാണോ എന്ന് തീരുമാനിക്കാൻ ഡോക്ടർമാരെ സഹായിക്കാൻ ഇതിന് കഴിയും.
