Health Tips: ക്യാന്സര് സാധ്യത കുറയ്ക്കുന്ന അഞ്ച് പഴങ്ങള്...
ക്യാന്സര് സാധ്യതയെ കുറയ്ക്കാന് ചില ഭക്ഷണങ്ങൾക്കാകുമെന്നാണ് പഠനങ്ങള് പറയുന്നത്. അത്തരത്തില് ക്യാന്സര് സാധ്യതയെ കുറയ്ക്കാന് ഡയറ്റില് ഉള്പ്പെടുത്തേണ്ട ചില പഴങ്ങളെ പരിചയപ്പെടാം...
![these fruits could lower your risk of cancer these fruits could lower your risk of cancer](https://static-ai.asianetnews.com/images/01hjw8n5et6n6507z2g76j3k6v/fotojet--46-_363x203xt.jpg)
അനിയന്ത്രിതമായ കോശവളർച്ച ശരീരത്തിലെ മറ്റുകലകളെയും ബാധിക്കുന്ന അവസ്ഥയാണ് ക്യാന്സര്. തുടക്കത്തില് കണ്ടെത്തിയാല് ഒട്ടുമിക്ക ക്യാന്സര് രോഗങ്ങളെയും തടയാന് കഴിയും. എന്നാല് ക്യാന്സറുകളില് പലതും തുടക്കത്തിലെ ലക്ഷണങ്ങള് കാണിക്കാത്തവയാണ്.
ക്യാന്സര് സാധ്യതയെ കുറയ്ക്കാന് ചില ഭക്ഷണങ്ങൾക്കാകുമെന്നാണ് പഠനങ്ങള് പറയുന്നത്. അത്തരത്തില് ക്യാന്സര് സാധ്യതയെ കുറയ്ക്കാന് ഡയറ്റില് ഉള്പ്പെടുത്തേണ്ട ചില പഴങ്ങളെ പരിചയപ്പെടാം...
ഒന്ന്...
ബെറി പഴങ്ങള് ആണ് ആദ്യമായി ഈ പട്ടികയില് ഉള്പ്പെടുന്നത്. സ്ട്രോബെറി, റാസ്ബെറി, ബ്ലാക്ക്ബെറി, ബ്ലൂബെറി തുടങ്ങിയവ ക്യാന്സര് സാധ്യതയെ കുറയ്ക്കാന് സഹായിക്കുന്നു. ഇതില് അടങ്ങിയിരിക്കുന്ന ആന്റി ഓക്സിഡന്റുകളും വിറ്റാമിനുകളും ധാതുക്കളും ക്യാൻസർ കോശങ്ങൾക്കെതിരെ പോരാടാൻ സഹായിക്കും.
രണ്ട്...
ഓറഞ്ച്, മുന്തിരി തുടങ്ങിയ സിട്രസ് പഴങ്ങളാണ് രണ്ടാമതായി ഈ പട്ടികയില് ഉള്പ്പെടുന്നത്. സിട്രസ് പഴങ്ങളിലെ വിറ്റാമിൻ സി, ഫോളേറ്റ്, കാത്സ്യം എന്നിവ സ്തനാർബുദ സാധ്യതയെ കുറയ്ക്കുമെന്നാണ് പഠനങ്ങള് പറയുന്നത്. വിറ്റാമിന് സി ധാരാളം അടങ്ങിയ ഇവ രോഗ പ്രതിരോധശേഷി കൂട്ടുകയും ചെയ്യും.
മൂന്ന്...
ആപ്പിളാണ് അടുത്തതായി ഈ പട്ടികയില് ഉള്പ്പെടുന്നത്. വിറ്റാമിനുകളും ഫൈബറും മറ്റ് ആന്റി ഓക്സിഡന്റുകളും അടങ്ങിയ ആപ്പിള് പതിവായി കഴിക്കുന്നതും ക്യാന്സര് സാധ്യതയെ കുറയ്ക്കാന് സഹായിച്ചേക്കാം.
നാല്...
മാതളനാരങ്ങയാണ് നാലാമതായി ഈ പട്ടികയില് ഉള്പ്പെടുന്നത്. സ്തനാർബുദം ഉൾപ്പെടെയുള്ള ക്യൻസര് സാധ്യതയെ ചെറുക്കാന് മാതളനാരങ്ങയ്ക്ക് കഴിയുമെന്ന് പല പഠനങ്ങളും സൂചിപ്പിക്കുന്നു.
അഞ്ച്...
കിവിയാണ് അവസാനമായി ഈ പട്ടികയില് ഉള്പ്പെടുന്നത്. വിറ്റാമിന് സിയും മറ്റ് ആന്റി ഓക്സിഡന്റുകളും അടങ്ങിയ കിവിയും ക്യാന്സര് സാധ്യതയെ കുറയ്ക്കാന് സഹായിക്കും.
ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില് മാറ്റം വരുത്തുക.
Also read: കാത്സ്യത്തിന്റെ കുറവ് തിരിച്ചറിയാം ഈ ലക്ഷണങ്ങളിലൂടെ...