ജമ്മു കശ്മീരിലെ ബുദ്ഗാമിൽ ഏറ്റുമുട്ടൽ. ലഷ്കർ ഇ തൊയ്ബ ഭീകരനെ വധിച്ചതായി കരസേന. ബുദ്ഗാം ജില്ലയിലെ യൂസ്മാർഗിലുള്ള കൊറാഗ് മേഖലയിലാണ് ഏറ്റുമുട്ടൽ ഉണ്ടായത്. മേഖലയിൽ തെരച്ചിൽ തുടരുന്നതായി കരസേന അറിയിച്ചു.
ദില്ലി: ജമ്മു കശ്മീരിലെ ബുദ്ഗാമിൽ ഉണ്ടായ ഏറ്റുമുട്ടലിൽ ലഷ്കർ ഇ തൊയ്ബ ഭീകരനെ കരസേന വധിച്ചു. ബുദ്ഗാം ജില്ലയിലെ യൂസ്മാർഗിലുള്ള കൊറാഗ് മേഖലയിൽ ഇൻ്റലിജൻസ് വിവരത്തെ തുടർന്നു നടത്തിയ സംയുക്ത ഓപ്പറേഷനിടെയാണ് ഏറ്റുമുട്ടൽ ഉണ്ടായത്. കരസേനയും ജമ്മു കശ്മീർ പൊലീസും സിആർപിഎഫും ചേർന്നാണ് ഓപ്പറേഷൻ നടത്തിയത്. കൊല്ലപ്പെട്ട ഭീകരനെക്കുറിച്ചുള്ള കൂടുതൽ വിവരങ്ങൾ കരസേന പുറത്തുവിട്ടിട്ടില്ല. മേഖലയിൽ ഓപ്പറേഷൻ തുടരുകയാണെന്ന് കരസേന അറിയിച്ചു.
ചൊവ്വാഴ്ച വൈകുന്നേരം കൊറാഗ് പ്രദേശത്ത് തെരച്ചിൽ നടത്തുന്നതിനിടെയാണ് സൈനികർ സംശയാസ്പദമായ നീക്കങ്ങൾ ശ്രദ്ധിച്ചത്. തുടർന്ന് സൈനികർ ഭീകരരെ നേരിടുകയും കീഴടങ്ങാൻ ആവശ്യപ്പെടുകയും ചെയ്തു. എന്നാൽ ഭീകരർ വെടിയുതിർത്തുകൊണ്ടാണ് ഇതിനോട് പ്രതികരിച്ചത്. സുരക്ഷാ സേനയും ശക്തമായി തിരിച്ചടിച്ചതോടെ ഇരുവിഭാഗവും തമ്മിൽ കടുത്ത വെടിവെപ്പ് ഉണ്ടായി. കൊല്ലപ്പെട്ട ഭീകരൻ നിരോധിത സംഘടനയായ ലഷ്കർ ഇ തൊയ്ബ അംഗമാണെന്ന് കരസേന തിരിച്ചറിഞ്ഞു.
കൊല്ലപ്പെട്ടത് ലഷ്കർ ഇ തൊയ്ബ കമാൻഡർ ഫൗസി മൂസയാണെന്ന് റിപ്പോർട്ടുണ്ട്. ജമ്മു കശ്മീരിൽ നടന്ന വിവിധ ആക്രമണങ്ങളിൽ ഉൾപ്പെട്ട ഭീകരനാണ് മൂസ. യൂസ്മാർഗിൽ സെപ്റ്റംബർ അഞ്ചിന് ഉണ്ടായ ഏറ്റുമുട്ടലിൽ മൂസ രക്ഷപ്പെട്ടിരുന്നു. ഈ സംഭവത്തിൽ മൂസയുടെ അടുത്ത സഹായി യാസിറിനെ കരസേന വധിച്ചിരുന്നു. അതേസമയം മേഖലയിൽ കൂടുതൽ ഭീകരർ ഉണ്ടോയെന്ന് കണ്ടെത്താനായി തെരച്ചിൽ തുടരുകയാണ്.
